ក្រុមសម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា អំពាវនាវដល់គ្រួសារ សហគមន៍ រដ្ឋាភិបាល និងសង្គមទាំងមូល រួមគ្នាវិនិយោគនិងគាំទ្រការបំបៅកូនដោយទឹកដោះម្តាយ ជាពិសេសក្នុងបរិបទកូវីដ-១៩ ដើម្បីពិភពលោកមួយដែលមានសុខភាពនិងនិរន្តរភាពជាងមុន។
ការអំពាវនាវនេះ ធ្វើឡើងនៅក្នុង «ទិវាសប្តាហ៍ពិភពលោកបំបៅកូនដោយទឹកដោះម្តាយនៅកម្ពុជាសម្រាប់ឆ្នាំ២០២១» ដែលប្រព្រឹត្តទៅចាប់ពីថ្ងៃទី១ ដល់ថ្ងៃទី៧ ខែសីហា ក្រោមប្រធានបទ «យើងទាំងអស់រួមគ្នាគាំពារនិងគាំទ្រការបំបៅកូនដោយទឹកដោះម្តាយ» ដែលរៀបចំដោយអង្គការ Helen Keller អង្គការ Alive & Thrive និងអង្គការទស្សនៈពិភពលោកអន្តរជាតិ-កម្ពុជា ក្នុងភាពជាដៃគូជាមួយកម្មវិធីអាហារូបត្ថម្ភថ្នាក់ជាតិ អង្គការ GIZ, MUSUFO, USAID, RTI និង អង្គការយូនីសេហ្វ។ ទិវានេះត្រូវបានប្រារព្ធធ្វើឡើងនៅជាង១២០ប្រទេសទូទាំងពិភពលោក ដើម្បីលើកកម្ពស់ការយល់ដឹងពីសារៈសំខាន់នៃការបំបៅកូនដោយទឹកដោះម្តាយសម្រាប់ការរស់រាន សុខភាព និងសុខុមាលភាពរបស់ម្តាយនិងកូនៗរបស់ពួកគាត់ ក៏ដូចជាប្រយោជន៍សម្រាប់សង្គមជាតិទាំងមូល។
យោងតាមសេចក្តីប្រកាសព័ត៌មានរួមរបស់ក្រុមសម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា នៅថ្ងៃទី០៣ ខែសីហា ឆ្នាំ២០២១នេះ លើកឡើងថា ការផ្ទុះឡើងនូវជំងឺកូវីដ-១៩ បានជំរុញឱ្យមានការយកចិត្តទុកដាក់កាន់តែខ្លាំងថែមទៀតក្នុងការគាំទ្រនិងវិនិយោគលើការបំបៅដោះកូនដោយទឹកដោះម្តាយ។
អង្គការទាំងនោះបន្តថា ការបំបែកម្តាយនិងកូន ការរំខានពីការទទួលបានសេវាសុខភាព ដូចជា ការប្រឹក្សាពីការបំបៅកូន និងការផ្សព្វផ្សាយពីផលិតផលទឹកដោះគោដោយគ្មានសីលធម៌ ក្នុងអំឡុងពេលដែលជំងឺរាតត្បាតសកលកំពុងជះឥទ្ធិពលជាអវិជ្ជមានដល់ការអនុវត្តការបំបៅដោះកូនដោយទឹកដោះម្តាយ ដែលករណីនេះ ទាមទារឱ្យមានការវិនិយោគនិងគាំទ្រដល់ការបំបៅកូនដោយទឹកដោះម្តាយកាន់តែមានភាពធំធេងថែមទៀត។
អង្គការទាំងនោះបញ្ជាក់ថា៖ «ការបង្កើនការបំបៅដោះកូនដោយទឹកដោះម្តាយ នឹងជួយសន្សំសំចៃដល់ប្រព័ន្ធសុខាភិបាលប្រទេសកម្ពុជារហូតដល់៥លានដុល្លារ និងជួយសន្សំគ្រួសារក្នុងប្រទេសកម្ពុជារហូតដល់ជាង១០៧លានដុល្លារក្នុងមួយឆ្នាំ ដែលជាតម្លៃនៃការទិញផលិតផលទឹកដោះគោសម្រាប់ទារកដែលមិនបៅទឹកដោះម្តាយ»។
ករណីនេះ ក្រសួងសុខាភិបាល និងអង្គការដៃគូអំពាវនាវឱ្យមានយុទ្ធសាស្រ្តសង្គមទាំងមូល ដើម្បីបង្កើតនូវបរិយាកាសដែលជួយដល់ការបំបៅកូនដោយទឹកដោះម្តាយ ក៏ដូចជាគាំទ្រដល់ស្រ្តីដែលជាម្តាយដែលកំពុងបំបៅដោះកូនផងដែរ។
បើតាមសេចក្តីប្រកាសព័ត៌មានរួម នៅទូទាំងពិភពលោកទាំងមូល កុមារជិត៦០០ ០០០នាក់ និងម្តាយ១០០ ០០០នាក់ បានស្លាប់ជារៀងរាល់ឆ្នាំ ដោយសារតែអត្រានៃការបំបៅកូនដោយទឹកដោះម្តាយមានកម្រិតទាប។ ដោយធ្វើឱ្យប្រសើរឡើងនូវអត្រានៃការបំបៅកូនដោយទឹកដោះម្តាយ មរណភាពចំនួន១ ០០០នាក់ និងជំងឺរាករូសចំនួន៥លានករណី លើកុមារអាយុក្រោម២ឆ្នាំ រួមទាំងមរណភាពរបស់មាតាចំនួន២៥៥នាក់ ដោយសារជំងឺមហារីកសុដន់ ក្រពេញអូវែ និងទឹកនោមផ្អែមកម្រិត២ នៅប្រទេសកម្ពុជា អាចត្រូវបានទប់ស្កាត់ជារៀងរាល់ឆ្នាំ។
ក្នុងអំឡុង«ទិវាសប្តាហ៍ពិភពលោកបំបៅកូនដោយទឹកដោះម្តាយ»នាឆ្នាំនេះ សម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា នឹងដាក់ឱ្យដំណើរការនូវប្រព័ន្ធអនឡាញមួយដែលបំពេញបន្ថែមលើប្រព័ន្ធដែលមានស្រាប់ សម្រាប់រាយការណ៍ពីការរំលោភបំពានអនុក្រឹត្យ១៣៣ ដែលចែងពីការធ្វើទីផ្សារផលិតផលសម្រាប់ចិញ្ចឹមទារកនិងកុមារ។ ការបង្កើតប្រព័ន្ធដែលធ្វើឡើងដោយអង្គការទស្សនៈពិភពលោកនេះ ក៏ជាកិច្ចខិតខំប្រឹងប្រែងមួយក្នុងការទប់ស្កាត់ការផ្សព្វផ្សាយ និងការធ្វើទីផ្សារដោយខុសច្បាប់ចំពោះផលិតផលសម្រាប់ទារកនិងកុមារបរិភោគ តាមរយៈការផ្សព្វផ្សាយ ការតាំងបង្ហាញ ការបញ្ចុះតម្លៃ រង្វាន់ឬអំណោយ ការឱ្យសាកល្បង ការចែកចាយព័ត៌មាន រួមទាំងយុទ្ធសាស្រ្តនៃការផ្សព្វផ្សាយតាមរូបភាពដទៃទៀត៕
