អតីតមន្ត្រីគណបក្សសង្រ្គោះជាតិ (CNRP) ប្រចាំសហរដ្ឋអាមេរិក និងធ្លាប់ជានិពន្ធនាយកវិទ្យុអាស៊ីសេរី ខេមរភាសា លោក ពីន សំខុន បានប្រកាសចូលធ្វើនយោបាយជាមួយ «គណបក្សកែទម្រង់កម្ពុជា» ដោយថា ដើម្បីកែប្រែប្រទេសជាតិឱ្យរីកចម្រើន។
ក្នុងលិខិតមួយកាលពីថ្ងៃទី៣ ខែសីហានេះ លោក ពីន សំខុន បានសរសេរថា លោកសម្រេចចិត្តជ្រើសរើសយកការគាំទ្រគណបក្សថ្មីមួយដែលមានឈ្មោះថា «គណបក្សកែទម្រង់កម្ពុជា» ដែលមានរូបសញ្ញាក្បាលដំរី កាន់ផ្កាឈូក ក្រោមការដឹកនាំរបស់អតីតមន្ត្រីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទរ័ត្ន ជាស្ថាបនិក និងលោក ប៉ុល ហំម ជាប្រធាន។
លោក ពីន សំខុន បញ្ជាក់ថា ដើមចមដែលនាំឱ្យរូបលោកសម្រេចចិត្តចូលរួមជីវភាពនយោបាយជាមួយ «គណបក្សកែទម្រង់កម្ពុជា» ដោយសារថ្នាក់ដឹកនាំគណបក្សនេះមានបទពិសោធន៍ចាស់វស្សា ធ្វើការងារស្វិតស្វាញ ចេះស្តាប់យោបល់គ្នាទៅវិញទៅមក និងស្តាប់យោបល់អ្នកដទៃ មិននិយាយបំផ្លើសពីការពិត ជាមនុស្សឯករាជ្យ និងជាអ្នកប្រជាធិបតេយ្យជាដើម។
លោក ពីន សំខុន ប្តេជ្ញាថា នឹងចូលរួមក្នុងជីវភាពនយោបាយជាមួយ «គណបក្សកែទម្រង់កម្ពុជា» ដើម្បីកែប្រែប្រទេសជាតិឱ្យរីកចម្រើន។
ខ្លឹមសារក្នុងលិខិតនោះបញ្ជាក់ថា៖ «ការសម្រេចចិត្តរបស់ខ្ញុំនាពេលនេះ ដោយចង់បង្ហាញពីទឹកចិត្តចង់ចូលរួមវិភាគទានដោយស្មោះស្ម័គ្រតាមតែអាចធ្វើទៅបាន ដើម្បីកែប្រែអនាគតដ៏លំបាករបស់ពលរដ្ឋខ្មែរចេះតែរងគ្រោះ នឹងប្តូរប្រទេសយើងឱ្យជួបតែភាពរីករាយនិងចម្រុងចម្រើនសម្រាប់ទាំងអស់គ្នា»។
ស្ថាបនិក «គណបក្សកែទម្រង់កម្ពុជា» លោក អ៊ូ ច័ន្ទរ័ត្ន មានប្រសាសន៍ថា គណបក្សរបស់លោកបានទទួលយកលោក ពីន សំខុន ចូលរួមធ្វើនយោបាយជាមួយ តែមិនទាន់កំណត់ឱ្យកាន់តួនាទីអ្វីនៅឡើយទេ។ លោកបន្ថែមថា លោក ពីន សំខុន ជាមនុស្សសំខាន់របស់អតីតគណបក្សសង្រ្គោះជាតិ (CNRP) ប្រចាំអាមេរិក និងធ្លាប់ជានិពន្ធនាយកវិទ្យុអាស៊ីសេរីខេមរភាសា ហើយមានបទពិសោធន៍ផ្នែកនយោបាយការទូតច្រើន ដែលអាចធ្វើឱ្យគណបក្សនេះរីកចម្រើនតាមរយៈអ្នកគាំទ្ររូបលោកកន្លងមក។ ក្រៅពីធ្លាប់កាន់តួនាទីជានិពន្ធនាយកវិទ្យុអាស៊ីសេរី ខេមរភាសា លោក ពីន សំខុន ក៏ធ្លាប់ធ្វើជាប្រធានសមាគមអ្នកកាសែតខ្មែរ កាលពីជាង៣០ឆ្នាំមុន ហើយបច្ចុប្បន្ន លោកក៏បានបោះពុម្ពកាសែតជាភាសាខ្មែរនៅអាមេរិកផងដែរ។
លោក អ៊ូ ច័ន្ទរ័ត្ន មានប្រសាសន៍ថា៖ «គាត់មានគំនិតនយោបាយច្រើន ទាំងចំណេះដឹងទូទៅផ្នែកនយោបាយទាំងក្នុងប្រទេស ទាំងក្រៅប្រទេស មានន័យថា យល់កិច្ចការអន្តរជាតិ នយោបាយអន្តរជាតិច្រើន។ ដូច្នេះ អាចនឹងជួយឱ្យ “គណបក្សកែទម្រង់កម្ពុជា” មានកម្លាំងមានសមត្ថភាពកាន់តែខ្លាំង»។
គួរបញ្ជាក់ថា រហូតមកដល់ពេលនេះ មានគណបក្សនយោបាយជាង៤០ បានចុះបញ្ជីនៅក្រសួងមហាផ្ទៃ ក្នុងនោះមានគណបក្សចំនួន៦ដែលបានបង្កើតឡើងដោយអតីតមន្ត្រីគណបក្សប្រឆាំង រួមមាន គណបក្សឆន្ទៈខ្មែរ របស់លោក គង់ មូនីកា កូនប្រុសរបស់លោក គង់ គាំ, គណបក្សខ្មែរអភិរក្សនិយម របស់លោក រៀល ខេមរិន្ទ, គណបក្សខ្មែរស្រឡាញ់ជាតិ របស់លោក ជីវ កត្តា, គណបក្សកែទម្រង់កម្ពុជា របស់លោក ប៉ុល ហំម និងលោក អ៊ូ ច័ន្ទរ័ត្ន, គណបក្សកម្ពុជានិយម របស់លោក យ៉ែម បុញ្ញឬទ្ធិ និងគណបក្សបេះដូងជាតិ ដែលត្រូវបានគេអះអាងថាជារបស់លោក ថាច់ សេដ្ឋា៕