ប្រជាសហគមន៍ដែលមានជម្លោះដីធ្លីជាង១០០គ្រួសារ នៅស្រុកស្វាយជ្រុំ ខេត្តស្វាយរៀង ទាមទារឱ្យអាជ្ញាធរដោះស្រាយផ្តល់សំណងសមរម្យលើវិវាទដីធ្លីរបស់ពួកគាត់ ក្រោយពួកគាត់អះអាងថា អាជ្ញាធរមូលដ្ឋានផ្តល់សំណងត្រឹម៩០០រៀលក្នុងមួយម៉ែត្រការ៉េ។
ប្រជាពលរដ្ឋម្នាក់ក្នុងចំណោមពលរដ្ឋជាង១០០គ្រួសារនោះ អ្នកស្រី យស សុភ័ណ្ឌ បានឱ្យដឹងនៅថ្ងៃទី០៣ ខែសីហា ថា ប្រជាពលរដ្ឋចំនួន១១៧គ្រួសារ បានកាន់កាប់និងបង្កបង្កើនផលលើដីទំហំជាង៩៩ហិកតានេះតាំងពីអំឡុងឆ្នាំ១៩៧៩មក ប៉ុន្តែនៅឆ្នាំ២០០៨ ស្រាប់តែក្រសួងធនធានទឹក និងឧតុនិយម មានគម្រោងយកដីនោះទៅបង្កើតជាអាងទឹក ដោយពុំបានផ្តល់សំណងសមរម្យដល់ប្រជាពលរដ្ឋឡើយ។
អ្នកស្រីបានបន្តថា កាលពីពេលថ្មីៗនេះ អាជ្ញាធរបានផ្សព្វផ្សាយពីគោលនយោបាយសំណងដោយឯកតោភាគីស្មើ០,២៤ដុល្លារក្នុងម៉ែត្រការ៉េ ឬស្មើ៩០០រៀលក្នុងម៉ែត្រការ៉េ ហើយកៀរគរប្រជាជនទៅជួបម្តង១០នាក់ ប៉ុន្តែពួកគាត់មិនអាចទទួលយកបានទេ ដោយសារតម្លៃនេះទាបពេក ដែលធ្វើឱ្យពួកគាត់មិនអាចយកទៅទិញដីថ្មីសម្រាប់ធ្វើស្រែចម្ការបានឡើយ។
លោកស្រី យស សុភ័ណ្ឌ មានប្រសាសន៍ថា៖ «ពួកគេឱ្យប្រជាពលរដ្ឋហ្នឹងផ្តិតមេដៃទទួលសំណង ហើយសំណងហ្នឹងមួយការ៉េ៩០០រៀល! អ៊ីចឹងប្រជាពលរដ្ឋខ្លះគាត់អត់ព្រមយកក្នុងតម្លៃប៉ុណ្ណឹងទេ គាត់ទាមទារឱ្យមានតម្លៃសមរម្យដែលអាចទទួលយកបាន។ គាត់ដាក់តម្លៃ៣ដុល្លារក្នុងមួយការ៉េ ទើបគាត់អាចទទួលយកបាន»។
បើតាមពលរដ្ឋរូបនេះ នៅព្រឹកទី០៤ ខែសីហានេះ អាជ្ញាធរស្រុកនិងអាជ្ញាធរឃុំបានហៅតំណាងប្រជាពលរដ្ឋចំនួន២នាក់ ទៅសាកសួរនៅសាលាឃុំឈើទាល ក្រោយពួកគាត់នាំគ្នាតវ៉ានិងធ្វើយុទ្ធនាការលើបណ្តាញសង្គមចាប់តាំងពីថ្ងៃទី២ ខែសីហាមក ដើម្បីទាមទារឱ្យមានដំណោះស្រាយសមរម្យលើករណីដីធ្លីនេះ។
ប្រជាពលរដ្ឋទាំង១១៧គ្រួសារ ជាពលរដ្ឋរស់នៅក្នុងសហគមន៍ចេកមាស ស្ថិតនៅក្នុងភូមិចំនួន៣ រួមមាន ភូមិចេកមាស ភូមិសំរោង ឃុំឈើទាល និងភូមិធ្នង់ ឃុំស្វាយធំ ស្រុកស្វាយជ្រុំ ខេត្តស្វាយរៀង។
ប្រធានសហគមន៍ចេកមាស អ្នកស្រី ឥន្ទ សូត្រ បាននិយាយថា ពួកគាត់មិនអាចទទួលយកសំណងតាមគោលនយោបាយរបស់អាជ្ញាធរដែលផ្តល់ឱ្យត្រឹមតម្លៃ៩០០រៀលក្នុងមួយម៉ែត្រការ៉េនេះបានទេ និងបានស្នើឱ្យអាជ្ញាធរផ្តល់សំណងសមរម្យដល់ពួកគាត់។
អ្នកស្រីបន្តថា៖ «សំណូមពរឱ្យរាជរដ្ឋាភិបាលជួយដោះស្រាយរឿងដីធ្លីឱ្យពួកខ្ញុំហ្នឹងឱ្យបានសំណងសមរម្យមក ដើម្បីខ្ញុំអាចទៅទិញកន្លែងណាផ្សេងធ្វើអាស្រ័យផលរស់បន្តទៀត បើឱ្យប៉ុណ្ណឹង ពួកខ្ញុំមិនអាចបន្តជីវិតរស់បានទេ»។
អភិបាលស្រុកស្វាយជ្រុំ លោក ហែម សារិត បានលើកឡើងថា បញ្ហាជម្លោះដីធ្លីនេះ ខាងអន្តរក្រសួងបានព្រមព្រៀងក្នុងការដោះស្រាយជាបណ្ដើរៗហើយ។ លោកបានអះអាងថា មានប្រជាពលរដ្ឋសឹង៩០ភាគរយដែលបានព្រមទទួលយកសំណង។
លោកបន្តថា អ្នកដែលមិនទទួលយកសំណងដែលក្រសួងបានសម្រេចនោះ មានតែ២ទៅ៣នាក់តែប៉ុណ្ណោះ ហើយអាជ្ញាធរនៅតែបន្តប្រកាន់ជំហរដដែល បើទោះបីប្រជាពលរដ្ឋខ្លះមិនព្រមទទួលក៏ដោយ។
លោកបានថ្លែងថា៖ «អត់ជាបញ្ហាទេ និយាយរួម ខាងក្រសួងគេបានដោះស្រាយឱ្យហើយ។ និយាយរួម គាត់ចង់បានលុយ ឥលូវយើងដោះស្រាយបានលុយហើយ។ អ៊ីចឹងមានតែម្នាក់[ឬ]២អ្នក ដែលចេះចង់បានច្រើន។ បើយើងចង់បានដូចតាមទីផ្សារ ធ្វើម៉េចនឹងកើត? គេមានក្រុមឯករាជ្យរបស់គេ ប្រជុំម៉ត់ចត់ណាស់ ទម្រាំបានចេញជាលុយបានប៉ុណ្ណឹង»។
ចំណែកលោក ថេង សារឿន ប្រធានសមាគមសម្ព័ន្ធសហគមន៍កសិករកម្ពុជា មើលឃើញថា កន្លងមក ការអភិវឌ្ឍភាគច្រើនតែងតែមានផលប៉ះពាល់ដល់ប្រជាពលរដ្ឋ ដែលករណីនេះ រដ្ឋត្រូវតែគិតគូររកដំណោះស្រាយឱ្យបានសមរម្យនិងមានភាពច្បាស់លាស់ក្នុងការដោះស្រាយ ដើម្បីចៀសវាងផលប៉ះពាល់ទៅលើការរស់នៅនិងជីវភាពរបស់ប្រជាពលរដ្ឋ។
លោកមានប្រសាសន៍ថា៖ «ដើម្បីជំរុញឱ្យដំណើរការនៃការដោះស្រាយបាន ខ្ញុំគិតថា អាជ្ញាធរគួរតែត្រូវជជែកចរចាឬក៏ស្វះស្វែងរកដំណោះស្រាយល្អ ជាជាងបដិសេធលើសំណងឬក៏ការផ្ដល់ដំណោះស្រាយជូនប្រជាពលរដ្ឋ ពីព្រោះថា អាជ្ញាធរដើរតួនាទីក្នុងការជួយលើកកម្ពស់ជីវភាពរបស់ពួកគាត់»៕
