រដ្ឋបាលរាជធានីភ្នំពេញ អនុញ្ញាតឱ្យភោជនីយដ្ឋាន-អាហារដ្ឋានដែលធានានូវវិធានសុវត្ថិភាពផ្នែកសុខាភិបាល អាចដំណើរការអាជីវកម្មជាប្រក្រតីនិងទទួលអតិថិជនចូលទទួលទានក្នុងបរិវេណទីតាំងរបស់ខ្លួនឡើងវិញ ដើម្បីជំរុញចរន្តសេដ្ឋកិច្ចជាតិ។
សេចក្ដីណែនាំនេះធ្វើឡើងក្រោយពេលអាជីវកម្មទាំងនោះត្រូវបានផ្អាកជាបណ្តោះអាសន្ន បន្ទាប់ពីមានការរីករាលដាលជំងឺកូវីដ-១៩ចូលទៅក្នុងសហគមន៍កាន់តែខ្លាំង។
សេចក្តីណែនាំរបស់អភិបាលរាជធានីភ្នំពេញ លោក ឃួង ស្រេង កាលពីថ្ងៃទី០៣ ខែសីហា ឆ្នាំ២០២១ បានសម្រេចអនុញ្ញាតឱ្យអតិថិជនចូលទទួលទានក្នុងបរិវេណទីតាំងភោជនីយដ្ឋាន-អាហារដ្ឋានក្នុងសណ្ឋាគារ និងភោជនីយដ្ឋាន-អាហារដ្ឋានដែលមានធានានូវវិធានសុវត្ថិភាពផ្នែកសុខាភិបាល ជាពិសេសការរក្សានូវគម្លាតសុវត្ថិភាពបុគ្គលនិងសង្គម ព្រមទាំងធានាឱ្យមានខ្យល់ចេញ-ចូលគ្រប់គ្រាន់។
លោក ឃួង ស្រេង បានថ្លែងក្នុងសេចក្ដីណែនាំថា ភោជនីយដ្ឋាន-អាហារដ្ឋានអាចដំណើរការអាជីវកម្មជាប្រក្រតី និងអាចទទួលអតិថិជនឱ្យចូលមកទទួលទានក្នុងបរិវេណអាជីវកម្មដ្ឋានរបស់ខ្លួនបាន ប៉ុន្តែចាំបាច់ត្រូវកំណត់ចំនួនអតិថិជនក្នុងបរិមាណសមរម្យសមាមាត្រទៅនឹងទំហំទីតាំង ដោយត្រូវចៀងវាងការប្រជ្រៀតគ្នាឬប្រមូលផ្ដុំមនុស្សច្រើនដែលជាហានិភ័យនៃការចម្លងវីរុសកូវីដ-១៩ ក៏ដូចជាត្រូវគូសគំនូសសម្រាប់អតិថិជនរក្សាគម្លាត១,៥ម៉ែត្រក្នុងបរិវេណអាជីវកម្មនីមួយៗ។
លោក ឃួង ស្រេង ក៏បានក្រើនរម្លឹកថា៖ «ភោជនីយដ្ឋាន-អាហារដ្ឋានដែលត្រូវបានអនុញ្ញាតដូចក្នុងចំណុចទី១ខាងលើនេះ ដាច់ខាតមិនត្រូវលក់គ្រឿងស្រវឹងឬអនុញ្ញាតឱ្យអតិថិជនសេពគ្រឿងស្រវឹងគ្រប់ប្រភេទក្នុងបរិវេណអាជីវកម្មដ្ឋានរបស់ខ្លួនឡើយ ជាពិសេសត្រូវអនុវត្តបម្រាមគោចរ ដោយផ្អាកជាបណ្ដោះអាសន្ននូវរាល់សកម្មភាពអាជីវកម្មនៅចម្លោះម៉ោង២១ [៩យប់] ដល់ម៉ោង៣ [៣ទៀបភ្លឺ]»។
ប្រភពដដែលក៏បានបញ្ជាក់ថា ហេតុដូច្នេះ គណៈគ្រប់គ្រងសណ្ឋាគារនិងម្ចាស់ភោជនីយដ្ឋាន-អាហារដ្ឋាននីមួយៗត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ត់ចត់ ដោយធ្វើអនាម័យសម្លាប់មេរោគ ការវាស់កម្ដៅ ការស្ដេន QR Code និងត្រូវអនុវត្តតាមការណែនាំរបស់ក្រសួងសុខាភិបាល ជាពិសេសត្រូវប្រកាន់ខ្ជាប់ជានិច្ចនូវវិធានការ «៣ការពារ ៣កុំ» របស់រាជរដ្ឋាភិបាល។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៧៩ ៦៣៤នាក់ ក្នុងនោះ អ្នកជំងឺព្យាបាលជាសះស្បើយចំនួន៧២ ៨០៣នាក់ អ្នកស្លាប់ចំនួន១ ៤៨៨នាក់ និងករណីនាំចូលពីក្រៅប្រទេសចំនួន១១ ៣៥២នាក់៕