ក្រសួងសុខាភិបាលបានរកឃើញវីរុសកូវីដ-១៩បំប្លែងថ្មីប្រភេទ «Delta» លើពលរដ្ឋចំនួន៦៧ករណីបន្ថែមទៀត ដែលធ្វើឱ្យចំនួនអ្នកឆ្លងវីរុសកូវីដ-១៩បំប្លែងថ្មី កើនដល់ជាង៣០០នាក់។
ក្នុងសេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី០៦ ខែសីហា ឆ្នាំ២០២១ ឱ្យដឹងថា រយៈពេល២ថ្ងៃចុងក្រោយនេះ ចាប់ពីថ្ងៃទី៤ ដល់ថ្ងៃទី៥ ខែសីហា ក្រសួងបានរកឃើញអ្នកឆ្លងជំងឺកូវីដ-១៩បំប្លែងថ្មី Delta ចំនួន៦៧នាក់បន្ថែមទៀត។
ក្រសួងបញ្ជាក់ថា មនុស្សទាំង៦៧នាក់ដែលវិជ្ជមានកូវីដ-១៩បំប្លែងថ្មីនោះ រួមមាន អ្នកដំណើរពីបរទេសតាមជើងហោះហើរចំនួន៣១នាក់ ដែលបានធ្វើដំណើរមកដល់កម្ពុជាកាលពីថ្ងៃទី០៤ ខែសីហា និងអាជីវករលក់នំបញ្ចុកស្រុះម្នាក់នៅផ្សារតូចទួលសង្កែ រាជធានីភ្នំពេញ។
ចំណែកនៅថ្ងៃទី០៥ ខែសីហា ក្រសួងបានរកឃើញករណីឆ្លងវីរុសប្រភេទថ្មីនេះទៅលើអ្នកដំណើរមកពីបរទេសតាមជើងហោះហើរ ចំនួន២នាក់ ហើយប្រជាពលរដ្ឋនៅក្នុងសហគមន៍ចំនួន២៤នាក់ រួមទាំងពលករដែលត្រឡប់មកពីថៃចំនួន៩នាក់ផងដែរ។
បើតាមរបាយការណ៍ក្រសួងសុខាភិបាល គិតចាប់ពីថ្ងៃទី៣១ ខែមីនា រហូតដល់ថ្ងៃទី០៥ ខែសីហា ឆ្នាំ២០២១ កម្ពុជារកឃើញអ្នកវិជ្ជមានកូវីដ-១៩ ប្រភេទ ដែលតា (Delta) ដែលមានប្រភពចេញពីប្រទេសឥណ្ឌា នៅលើពលករត្រឡប់ពីថៃ អ្នកដំណើរមកតាមជើងហោះហើរ និងបុគ្គលិកសុខាភិបាល រួមទាំងអ្នកភូមិនៅក្នុងសហគមន៍ សរុបចំនួន៣២៧នាក់៕