ខេត្តចំនួន៨ជាប់ព្រំដែនថៃ នៅចុងសប្តាហ៍នេះ បានចាប់ផ្តើមចាក់វ៉ាក់សាំង AstraZeneca ដូសទី៣ ឬដូសជំរុញ ជូនមន្ត្រីរាជការនិងកងកម្លាំង ដើម្បីបង្ការទប់ស្កាត់ជំងឺកូវីដ-១៩ ក្រោយពីនាយករដ្ឋមន្ត្រីបានណែនាំ។
លោកនាយករដ្ឋមន្ត្រី ហ៊ុន សែន កាលពីសប្តាហ៍មុន បានណែនាំឱ្យប្រើប្រាស់វ៉ាក់សាំង AstraZeneca ដែលជាជំនួយរបស់ប្រទេសជប៉ុន ជាដូសទី៣ សម្រាប់ចាក់ឱ្យអ្នកដែលបានចាក់វ៉ាក់សាំង «ស៊ីណូវ៉ាក់» ឬ «ស៊ីណូហ្វាម» ចំនួន២ដូសរួចហើយ ដើម្បីពង្រឹងប្រសិទ្ធភាពទប់ស្កាត់ការឆ្លងជំងឺកូវីដ-១៩ ជាពិសេសនៅតាមបណ្តាខេត្តជាប់ព្រំដែនកម្ពុជា-ថៃដែលកំពុងប្រឈមនឹងវីរុសកូវីដ-១៩បំប្លែងថ្មីប្រភេទ Delta។
បើតាមការចុះផ្សាយនៅថ្ងៃអាទិត្យម្សិលមិញរបស់រដ្ឋបាលខេត្តនីមួយៗ រួមមាន ខេត្តកោះកុង ពោធិ៍សាត់ បន្ទាយមានជ័យ ឧត្ដរមានជ័យ សៀមរាប និងខេត្តព្រះវិហារ ជាដើម បានចាប់ផ្តើមចាក់វ៉ាក់សាំងដូសទី៣នេះ ជូនមន្ត្រីរាការនិងកងម្លាំង ក្រោយពីមានការណែនាំរបស់នាយករដ្ឋមន្ត្រី។
ថ្មីៗនេះ ប្រទេសជប៉ុនបានផ្តល់ជំនួយវ៉ាក់សាំងប្រភេទ AstraZeneca ចំនួន១លានដូសជាលើកដំបូងដល់ប្រទេសកម្ពុជា ចាប់ពីកម្ពុជាបានផ្ទុះជំងឺនេះពីដើមឆ្នាំ២០២០មក ក្នុងកិច្ចសហការចូលរួមទប់ស្កាត់ការឆ្លងរីករាលដាលនៃជំងឺរលាកផ្លូវដង្ហើមសកលនេះ។
កាលពីថ្ងៃអាទិត្យ ប្រធានគណៈកម្មាធិការចំពោះកិច្ចសម្រាប់ចាក់វ៉ាក់សាំងក្នុងក្របខណ្ឌទូទាំងប្រទេស និងជាអ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន មានប្រសាសន៍ថា អ្នកជាសះស្បើយពីជំងឺកូវីដ-១៩ មិនមានភាពចាំបាច់ក្នុងការទទួលវ៉ាក់សាំងដូសទី៣នេះភ្លាមៗទេ ដោយថា សារពាង្គកាយរបស់អ្នកជំងឺមានកងការពារគ្រប់គ្រាន់សម្រាប់ទប់ទល់នឹងជំងឺកូវីដ-១៩នេះហើយ។
លោកស្រីបានគូសបញ្ជាក់ថា ចំពោះការចាក់វ៉ាក់សាំងដូសទី៣ គឺផ្តល់ជូនសម្រាប់អ្នកដែលបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ ចំនួន២ដូសរួចរាល់ ហើយមិនធ្លាប់ឆ្លងជំងឺកូវីដ-១៩ពីមុនមក។
យ៉ាងណា លោកស្រីថា បន្ទាប់ពីជាសះស្បើយបានចន្លោះពី៦ទៅ៨ខែ ពួកគេអាចទទួលការចាក់វ៉ាក់សាំងដូសទី៣នេះបាន៕
