ក្រសួងសុខាភិបាល ឱ្យដឹងថា វីរុសកូវីដ-១៩បំប្លែងថ្មីប្រភេទ Delta កំពុងពង្រីកខ្លួនយ៉ាងលឿនដល់ជិត២០រាជធានី-ខេត្ត ដែលតម្រូវឱ្យពលរដ្ឋបន្តចូលរួមគោរពវិធានសុខាភិបាលឱ្យបានខ្ជាប់ខ្ជួន ដើម្បីកាត់ផ្តាច់រលកចម្លង។
យោងតាមសេចក្តីជូនដំណឹងរបស់ក្រសួងសុខាភិបាល ចុះថ្ងៃទី៨ ខែសីហា ឆ្នាំ២០២១ ឱ្យដឹងថា លទ្ធផលនៃការធ្វើវិភាគដោយវិទ្យាស្ថានប៉ាស្ទ័រ ចុះថ្ងៃទី៧ ខែសីហា បានបង្ហាញពីការរកឃើញករណីឆ្លងវីរុសកូវីដ-១៩បំប្លែងថ្មី ប្រភេទ Delta ចំនួន៥៨ករណីបន្ថែមទៀត ក្នុងនោះ វីរុសនេះបានវាយលុកចូលក្នុងសហគមន៍ ជាពិសេសនៅខេត្តឧត្ដរមានជ័យ រាជធានីភ្នំពេញ ខេត្តសៀមរាប ព្រះវិហារ កំពង់ចាម កំពង់ធំ និងបណ្តាខេត្តមួយចំនួនទៀត។
បើគិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី៧ ខែសីហា ឆ្នាំ២០២១ ពោលគឺរយៈពេលជាង៤ខែប៉ុណ្ណោះ កម្ពុជាបានរកឃើញវីរុសបំប្លែងថ្មី Delta នេះ ចំនួន៣៨៥នាក់ ក្នុងនោះមានស្រី្ត១៨៧នាក់ ដែលឆ្លងលើពលរដ្ឋខ្មែរត្រឡប់ពីប្រទេសថៃ បុគ្គលិកសុខាភិបាល ពលរដ្ឋក្នុងសហគមន៍ និងអ្នកដំណើរតាមជើងហោះហើរចូលកម្ពុជា។
ដើម្បីបង្ការ គ្រប់គ្រង និងកាត់ផ្តាច់នូវខ្សែចម្លងមេរោគបំប្លែងថ្មី ឬក៏ប្រភេទថ្មីផ្សេងទៀត ខណៈវីរុសបំប្លែងថ្មី Delta បាននិងកំពុងរាតត្បាតវាយលុកចូលសហគមន៍ក្នុងប្រទេសកម្ពុជានោះ ក្រសួងសុខាភិបាលបានអំពាវនាវដល់សាធារណជននៅទូទាំងប្រទេស ត្រូវបន្តប្រុងប្រយ័ត្នខ្ពស់ក្នុងការការពារខ្លួន អនុវត្តវិធានសុខាភិបាល និងត្រូវចេះសម្របខ្លួនរស់នៅតាមបែបគន្លងថ្មី ក្នុងបរិបទកូវីដ-១៩។
កាលពីថ្ងៃសុក្រ រដ្ឋាភិបាលបានលើកឡើងថា «វីរុសបំប្លែងថ្មី Delta កំពុងពង្រីកខ្លួនយ៉ាងលឿនទៅកាន់រាជធានី-ខេត្តចំនួន១៧»។ ករណីនេះ រដ្ឋាភិបាលបានដាក់ចេញវិធានការមួយចំនួន ដើម្បីត្រៀមលក្ខណៈទុកមុន ក្នុងការគ្រប់គ្រងមេរោគបំប្លែងថ្មីនេះ។
បើតាមវិធានការនោះ ខេត្តនៅជាប់ព្រំដែនកម្ពុជា-ថៃ ត្រូវបង្កើនទីតាំងធ្វើចត្តាឡីស័កនៅតាមភូមិ ឃុំ សង្កាត់ ចំណែកមណ្ឌលសុខភាពនៅស្រុក សម្រាប់ព្យាបាលអ្នកជំងឺ។
ចំណែកខេត្តនៅខាងក្នុងវិញ ត្រូវផ្អាកទទួលធ្វើចត្តាឡីស័កនៅតាមមណ្ឌល និងត្រូវបញ្ចេញអ្នកដែលកំពុងធ្វើចត្តាឡីស័ក ពាក់ព័ន្ធព្រឹត្តិការណ៍សហគមន៍២០កុម្ភៈ ឱ្យមកធ្វើចត្តាឡីស័កនៅតាមផ្ទះវិញ ដោយទុកមណ្ឌលទាំងនោះត្រៀមដាក់ពលករខ្មែរត្រឡប់ពីប្រទេសថៃ ដើម្បីបញ្ចៀសហានិភ័យនៃការឆ្លងវីរុសបំប្លែងថ្មី Delta នេះ រួមទាំងការផ្គត់ផ្គង់សម្ភារបរិក្ខារពេទ្យ និងប្រាក់ឧបត្ថម្ភ ជាដើម៕