ជនជាតិដើមភាគតិច បានលើកឡើងថា ការរាលដាលជំងឺកូវីដ-១៩បានធ្វើឱ្យប៉ះពាល់ធ្ងន់ធ្ងរដល់ជីវភាពរស់នៅនិងប្រពៃណីទំនៀមទម្លាប់របស់ពួកគេ។
ក្នុងសេចក្តីថ្លែងការណ៍រួមរបស់ជនជាតិដើមភាគតិចដែលចេញផ្សាយនៅថ្ងៃទី៩ ខែសីហា ឆ្នាំ២០២១ បានឱ្យដឹងថា ការរាលដាលជំងឺកូវីដ-១៩បានធ្វើឱ្យតម្លៃទិន្នផលរបស់សហគមន៍ជនជាតិដើមភាគតិច ដូចជា គ្រាប់ស្វាយចន្ទី សណ្តែកសៀង ដំឡូងមី និងទិន្នផលផ្សេងទៀត បានចុះថោកឬគ្មានទីផ្សារសម្រាប់លក់នោះទេ ខណៈសហគមន៍ជនជាតិដើមភាគតិច ភាគច្រើនជាប់បំណុលនៅធនាគារ ដែលធ្វើឱ្យពួកគេជួបការលំបាកកាន់តែខ្លាំង។
ប្រធានបណ្តាញជនជាតិដើមភាគតិចពូនងនៅខេត្តមណ្ឌលគិរី អ្នកស្រី ភ្លឹក ភីរម្យ មានប្រសាសន៍ថា ខណៈដែលទិន្នផលជនជាតិដើមភាគតិចចុះថោក តម្លៃទំនិញនៅទីផ្សារបានហក់ឡើងខ្ពស់ ដែលធ្វើជនជាតិដើមភាគតិចកាន់តែជួបការលំបាកក្នុងចំណាយផ្សេងៗ។
អ្នកស្រីបន្តថា ការរាលដាលជំងឺកូវីដ-១៩បានធ្វើឱ្យជនដើមភាគតិចមិនអាចជួបជុំគ្នាប្រារព្ធពិធីបែបសាសនាផ្សេងៗ និងមិនអាចចេញទៅការពារព្រៃអារក្សនិងព្រៃរក្សាទុករបស់ជនជាតិដើមភាគតិច ដែលធ្វើឱ្យជនល្មើសចូលកាប់និងទន្ទ្រានយកជាដើម។
អ្នកស្រីបន្ថែមថា៖ «ពេលដែលទៅលួចកាប់ព្រៃកន្លែងកប់ខ្មោច កន្លែងអារក្សហ្នឹង គឺពួកខ្ញុំមិនអាចទៅហាមឃាត់គេបានទេ។ យើងទៅបានតែគ្នាតិចនាក់ ដល់ពេលយើងទៅគ្នាតិចនាក់ពេក ទប់ស្កាត់អត់ឈ្នះអ្នកមកពីខាងក្រៅទេ ព្រោះគេគ្នាច្រើន គេគំរាមកំហែងពួកខ្ញុំតែ២ឬ៣នាក់ហ្នឹង។ មួយទៀត ពេលដែលពួកខ្ញុំមានរបស់របរទៅលក់ ដូចជា អនុផលព្រៃឈើ អនុផលពីចម្ការក៏ដោយ គឺវាចុះថោកឬអត់មានអ្នកទិញទៀត។ អ៊ីចឹងសេដ្ឋកិច្ចពួកខ្ញុំត្រូវបានបាត់ ត្រូវបានលំបាក»។
សមាជិកបណ្តាញជនជាតិដើមភាគតិចព័រ រស់នៅខេត្តពោធិ៍សាត់ អ្នកស្រី ឌឹម សុខសាន្ត បានសុំឱ្យភាគីពាក់ព័ន្ធ ជាពិសេសរដ្ឋាភិបាល ជួយដោះស្រាយផលប៉ះពាល់លើជនជាតិដើមភាគតិចដោយសារការរាលដាលជំងឺកូវីដ-១៩នេះ ដោយធ្វើយ៉ាងណាឱ្យពួកគេមានទីផ្សារសម្រាប់លក់ទិន្នផល និងជួយការពារសម្បត្តិសមូហភាព ប្រពៃណី វប្បធម៌ អត្តសញ្ញាណ និងដីធ្លីរបស់ពួកគេ ជាដើម។
អ្នកស្រីបន្ថែមថា៖ «ទាក់ទងការប្រមូលផលរបស់គាត់ ពេលខ្លះការនាំចេញមានការលំបាក ជួនកាលគាត់ទុកវាចោលនៅផ្ទះរបស់គាត់ទៅ។ ហើយទាក់ទងជនជាតិដើមភាគតិចព័រយើង គឺយើងបានមានការសែនព្រេនអារក្សអ្នកតានៅតាមតំបន់របស់យើង គឺយើងមានដដែល ប៉ុន្តែឥលូវយើងមិនអាចធ្វើបានទេ ដោយសារតែវិបត្តិជំងឺកូវីដ-១៩ គេមិនឱ្យយើងជួបជុំគ្នា»។
មន្ត្រីសិទ្ធិមនុស្សនៅអង្គការសហប្រជាជាតិប្រចាំនៅកម្ពុជា លោក តែម រ័ត្ន មានប្រសាសន៍ក្នុងទិវាអន្តរជាតិជនជាតិដើមភាគតិចពិភពលោក នាថ្ងៃទី៩ ខែសីហានេះថា ស្ត្រីជនជាតិដើមភាគតិចដែលជាអ្នកផ្គត់ផ្គង់ជីវភាពនិងផ្តល់អាហារ បានជួបបញ្ហាធ្ងន់ធ្ងរដោយសារបញ្ហាជំងឺកូវីដ-១៩។
លោកបានស្នើឱ្យភាគីពាក់ព័ន្ធត្រូវរៀបចំផែនការធ្វើឱ្យប្រសើរឡើងវិញ និងត្រូវគិតគូរនូវកិច្ចសន្យាសង្គម ដើម្បីឆ្លើយតបទៅនឹងការរីករាលដាលជំងឺកូវីដ-១៩ ហើយឆ្លើយតបទៅនឹងតម្រូវការនិងកង្វល់របស់ជនជាតិដើមភាគតិច។
លោកបន្ថែមថា៖ «ដូច្នេះហើយការរៀបចំផែនការ ការកសាងឡើងវិញឱ្យបានប្រសើរ គិតគូរអំពីកិច្ចសន្យាសង្គមដើម្បីឆ្លើយតបទៅនឹងការរីករាលដាលជំងឺកូវីដ-១៩ ត្រូវតែរួមបញ្ចូលនៅការស្តាប់និងការលើកឡើងពីតម្រូវការនិងកង្វល់របស់បងប្អូនជនជាតិដើមភាគគិច»។
អគ្គនាយករង នៃអគ្គនាយកដ្ឋានបច្ចេកទេសវប្បធម៌ នៃក្រសួងវប្បធម៌ និងវិចិត្រសិល្បៈ លោក ឯក ប៊ុនថា មានប្រសាសន៍ថា កន្លងមក ក្រសួងបានយកចិត្តទុកដាក់ចំពោះបញ្ហាជនជាតិដើមភាគតិច ហើយតែងតែយកកង្វល់និងបញ្ហាប្រឈមរបស់ពួកគេប្រាប់ដល់ប្រមុខរដ្ឋាភិបាលដើម្បីរកដំណោះស្រាយ។
លោកបន្ថែមថា៖ «ក្រសួងវប្បធម៌ និងវិចិត្រសិល្បៈ ដឹកនាំដោយលោកជំទាវរដ្ឋមន្ត្រី តែងតែរំឭកដល់អាជ្ញាធរបណ្តាខេត្តដែលមានជនជាតិដើមភាគតិចរស់នៅ ឱ្យយកចិត្តទុកដាក់ ជាពិសេសឱ្យចូលរួមជាមួយគ្នា ហើយបានស្នើឱ្យជនជាតិដើមភាគតិចត្រូវតែមករកពួកយើង ដើម្បីពិភាក្សានូវកង្វល់និងបញ្ហាប្រឈមរបស់ពួកគេ ដើម្បីដោះស្រាយ ដើម្បីការពារឬអភិរក្សប្រពៃណី វប្បធម៌ អត្តសញ្ញាណ របស់ពួកគេ»។
យោងតាមលទ្ធផលជំរឿនឆ្នាំ២០១៣ ដែលត្រូវបានផ្សព្វផ្សាយនៅក្នុងសេចក្តីថ្លែងការណ៍រួមរបស់ជនជាតិដើមភាគតិច នៅថ្ងៃនេះ បង្ហាញថា នៅកម្ពុជាមានជនជាតិដើមភាគតិចចំនួន១៨៣ ៨៣១នាក់ ស្មើនឹង២,៥ភាគរយនៃចំនួនប្រជាជនសរុប ដែលមានចំនួន២៤ក្រុមឬអំបូរ បាននិងកំពុងរស់នៅក្នុង១៥ខេត្តក្រុង ដូចជា ខេត្តមណ្ឌលគិរី រតនគិរី ស្ទឹងត្រែង ក្រចេះ កំពង់ធំ ព្រះវិហារ ពោធិ៍សាត់ បាត់ដំបង ឧត្តរមានជ័យ និងបណ្តាខេត្តផ្សេងៗទៀត៕