ក្រសួងធនធានទឹក និងឧតុនិយម បានឱ្យដឹងថា កម្ពុជានឹងទទួលឥទ្ធិពលខ្យល់មូសុងនិរតីខ្សោយពីជ្រលងសម្ពាធទាបពីប្រទេសចិន និងពីជ្រលងនៃប្រព័ន្ធសម្ពាធទាប ITCZ ចាប់ពីថ្ងៃទី១១ ដល់ថ្ងៃទី១៧ ខែសីហា។
សេចក្ដីជូនដំណឹងរបស់ក្រសួងធនធានទឹក និងឧតុនិយម នាថ្ងៃទី១០ ខែសីហា ឆ្នាំ២០២១នេះ បន្តថា ឥទ្ធិពលខ្យល់មូសុងនិរតីខ្សោយនេះនឹងរងពីប្រទេសចិន នាថ្ងៃទី១១-១២ ខែសីហា និងអូសបន្លាយពីភាគខាងជើងប្រទេសមីយ៉ាន់ម៉ា ប្រទេសថៃ ប្រទេសឡាវ និងប្រទេសវៀតណាម នាថ្ងៃទី១៣-១៦ ខែសីហា ឆ្នាំ២០២១។
ក្រសួងដដែលបញ្ជាក់ថា យោងតាមស្ថានភាពអាកាសធាតុនេះ នឹងធ្វើឱ្យតំបន់វាលទំនាបកណ្ដាលអាចនឹងមានភ្លៀងធ្លាក់ពីកម្រិតតិចទៅបង្គួរ លាយឡំនឹងផ្គរ រន្ទះ និងខ្យល់កន្រ្ដាក់ ខណៈបណ្ដាខេត្តនៅភាគកណ្ដាល និងភាគខាងត្បូង នឹងអាចមានភ្លៀងធ្លាក់ច្រើន។ ជាមួយគ្នានេះ បណ្ដាខេត្តជាប់ជួរភ្នំដងរែក និងខ្ពង់រាបឦសាន អាចនឹងមានភ្លៀងធ្លាក់ក្នុងកម្រិតពីតិចទៅបង្គួរ ខណៈតំបន់មាត់សមុទ្រវិញអាចនឹងមានភ្លៀងធ្លាក់ក្នុងកម្រិតពីមធ្យមទៅបង្គួរ។
ករណីនេះ ក្រសួងបានប្រាប់ឱ្យសាធារណជនប្រុងប្រយ័ត្នចំពោះបាតុភូតភ្លៀង ផ្គរ រន្ទះ លាយឡំនឹងខ្យល់កន្រ្ដាក់ដែលនឹងអាចកើតមានជាយថាហេតុ៕