ក្រុមយុវជនមួយចំនួននៅរាជធានីភ្នំពេញ បង្ហាញក្តីបារម្ភជាថ្មីពីការឆ្លងរាលដាលនៃជំងឺកូវីដ-១៩បំប្លែងថ្មីប្រភេទ “ដែលតា” (Delta) ដោយសារអ្នកទៅចាក់វ៉ាក់សាំងប្រឆាំងជំងឺនេះ មិនបានរក្សាគម្លាតតាមការណែនាំរបស់ក្រសួងសុខាភិបាល។
ការព្រួយបារម្ភជាថ្មីនេះធ្វើឡើងបន្ទាប់ពីអាណាព្យាបាលរបស់កុមារនិងយុវជននៅរាជធានីភ្នំពេញ បាននាំកូនៗរបស់ពួកគេដែលមានអាយុចាប់ពី១២ឆ្នាំដល់១៧ឆ្នាំ ទៅចាក់វ៉ាក់សាំងបង្ការជំងឺកូវីដ-១៩ តាមការកំណត់របស់រដ្ឋាភិបាល ចាប់ពីថ្ងៃទី១ ខែសីហា ឆ្នាំ២០២១ទៅ។
យុវតី ហ៊ង មួយហេង អាយុ១៣ឆ្នាំ រស់នៅសង្កាត់ស្ទឹងមានជ័យ រាជធានីភ្នំពេញ ដែលទៅចាក់វ៉ាក់សាំងនៅសាលាបឋមសិក្សាស្ទឹងមានជ័យ នាព្រឹកថ្ងៃអង្គារនេះ និយាយថា គាត់មកចាប់លេខចាក់វ៉ាក់សាំងនៅម៉ោងប្រហែល៦ព្រឹក ដោយឃើញយុវជនជាច្រើនបានប្រជ្រៀតគ្នា ហើយមិនបានរក្សាគម្លាតតាមការណែនាំរបស់ក្រុមគ្រូពេទ្យនោះទេ។ យុវតីរូបនោះ បង្ហាញការព្រួយបារម្ភថា បើមានអ្នកជំងឺកូវីដ-១៩ទៅចាក់វ៉ាក់សាំងដែរនោះ នឹងងាយចម្លងទៅយុវជនផ្សេងទៀតដែលឈរប្រជ្រៀតគ្នារង់ចាំចាក់វ៉ាក់សាំង។
យុវតីរូបនោះនិយាយថា៖ «វាអាចឆ្លងដោយសារតែវានៅជិតគ្នាពេក ឱ្យគាត់នៅឃ្លាតពីគ្នាបន្តិច! ហើយកុំនៅកៀកគ្នាពេក ឱ្យនៅឆ្ងាយពីគ្នាបន្តិច ដើម្បីការពារកូវីដ-១៩ កុំឱ្យប៉ះពាល់សុខភាព»។
វ័យ១៧ឆ្នាំ កញ្ញា កែវ ខ្លូរីតា ដែលអះអាងថារស់នៅសង្កាត់ស្ទឹងមានជ័យ និយាយថា គាត់សុខចិត្តរង់ចាំយូរ តែគាត់មិនទៅប្រជ្រៀតគ្នាដណ្តើមលេខរៀងដូចយុវជននិងយុវតីផ្សេងៗទៀតនោះទេ ព្រោះខ្លាចឆ្លងជំងឺកូវីដ-១៩ ដោយសារគាត់មិនដឹងថាអ្នកណាមានជំងឺនេះឬអត់នោះទេ។
យុវតីនោះបន្តថា៖ «អ្នកចែកលេខ គាត់មិនដឹងទេ! គាត់ចេះតែចែកៗទៅ! អ្នកខ្លះចូលមកបុក [កន្លែងចែកលេខ] តែម្តង! ប្រជ្រៀតគ្នាតែម្តង! អត់មានគម្លាតពី១ម៉ែត្រកន្លះទេ គឺអត់ទេ! គេខំគូសគំនូសហើយនៅតែចូលគ្នាទៀត។ យើងអត់ដឹងអ្នកណាឆ្លងកូវីដទេ បើឆ្លងតែម្នាក់ ដឹងតែទៅទាំងអស់ហើយ ១ ០០០នាក់! គ្រាន់តែខ្ញុំប៉ាន់ស្មានទេ ព្រោះចែកលេខអស់ហើយ! ឡើងដល់កន្ទុយ នៅសល់ប្រហែលជា៤០០នាក់ជាងដែរ ព្រឹកមិញ នៅក្រៅរបងទៀត»។
យុវតី ហង្ស គីមហួយ អាយុ១៤ឆ្នាំ រស់នៅខណ្ឌមានជ័យ រាជធានីភ្នំពេញ និយាយថា គាត់មកចាប់លេខចាក់វ៉ាក់សាំងនៅម៉ោងជិត៦ព្រឹក តែរហូតមកដល់ម៉ោងជិត១១ព្រឹកនេះ គាត់មិនទាន់បានចាក់នៅឡើយ ដោយសារយុវជនភាគច្រើនប្រជ្រៀតគ្នានិងមិនរក្សាគម្លាតសុវត្ថិភាព។
យុវតីរូបនោះអំពាវនាវទៅយុវជនទាំងអស់ត្រូវរក្សាគម្លាតតាមការណែនាំរបស់ក្រសួងសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩បំប្លែងថ្មីប្រភេទ “ដែលតា” ទៅអ្នកដទៃ។
យុវតី គីមហួយ និយាយថា៖ «ឱ្យពួកគាត់នៅឆ្ងាយពីគ្នា ហើយគោរពតាមគោលការណ៍ដែលត្រូវធ្វើបាន ដូចជា នៅឆ្ងាយពីគ្នា ដាក់អាល់កុលបាញ់នៅពីក្រៅ។ ហើយណាមួយទៀត សូមឱ្យពួកគាត់ធ្វើអ្វីតាមដែលគាត់អាចធ្វើបាន ឧទាហរណ៍ ចាំឈរយកលេខឆ្ងាយពីគ្នា។ ដោយសារអី? យើងសម្រួល កុំឱ្យវាទៅលឿនពេក ខ្លាចឆ្លងកូវីដអីដែរ»។
អគ្គនាយកបច្ចេកទេសសុខាភិបាល លោក ហុក គឹមចេង ទទួលស្គាល់ថា ពិតជាមានយុវជនមួយចំនួនបានប្រជ្រៀតគ្នាទៅចាក់វ៉ាក់សាំង ហើយមិនបានរក្សាគម្លាតពិតមែន។
ទោះជាបែបនេះក្តី លោកថា មន្ត្រីជំនាញបានសហការជាមួយអាជ្ញាធរចុះណែនាំនិងអប់រំបន្ថែមទៀតទៅប្រជាពលរដ្ឋ ជាពិសេសយុវជនដែលទៅចាក់វ៉ាក់សាំង ដើម្បីទប់ស្កាត់ការឆ្លងរាលដាលបន្តទៀត។
លោកមានប្រសាសន៍ថា៖ «គណៈកម្មការចំពោះកិច្ច មានក្រុមការងារដែលគេចុះទៅតាមដាន គឺគាត់បានជ្រាបដឹងព័ត៌មានហ្នឹងហើយ គាត់សហការជាមួយខាងអាជ្ញាធរហើយ ដើម្បីធ្វើការណែនាំពាក់ព័ន្ធជាមួយបញ្ហាហ្នឹង។ ហើយកន្លងមក ក៏ធ្លាប់ធ្វើការណែនាំរួចហើយ ប៉ុន្តែបើមានករណីនេះចាំបាច់ គឺនឹងណែនាំបន្ថែមទៀត»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ជំរុញដល់មន្ត្រីសុខាភិបាល និងអាជ្ញាធរមូលដ្ឋាន ជាពិសេសអ្នកប្រចាំការនៅតាមមណ្ឌលចាក់វ៉ាក់សាំង ត្រូវអប់រំនិងណែនាំដល់កុមារនិងយុវវ័យដែលទៅចាក់វ៉ាក់សាំងពីការរក្សាគម្លាតសុវត្ថិភាព ព្រោះពួកគេនៅក្មេង អាចមិនសូវយល់ពីវិធីការពារសុខភាព។
លោកមានប្រសាសន៍ថា៖ «បើសិនជាមិនបានចូលរួមទាំងអស់គ្នា ការទប់ស្កាត់វានៅតែរាលដាល ហើយវាចេះតែពន្យារពីមួយថ្ងៃទៅមួយថ្ងៃ ហើយធ្វើឱ្យសេដ្ឋកិច្ចយើងធ្លាក់ចុះដោយមានការបិទខ្ទប់ ហើយមិនបានធ្វើការដិតដល់ ដូចជាក្មេងអត់បានទៅសាលា គ្រូអត់បានជួបកូនសិស្ស កន្លែងហ្នឹងហើយវាជាហានិភ័យ វាអាចយូរអង្វែង វាអាចធ្វើឱ្យប៉ះពាល់ដល់កុមារស្នងឫស្សីយើង»។
កាលពីថ្ងៃទី២២ ខែកក្កដា ឆ្នាំ២០២១ រដ្ឋលេខាធិការក្រសួងសុខាភិបាល លោកស្រី យក់ សម្បត្តិ ថ្លែងថា លោកនាយករដ្ឋមន្ត្រី ហ៊ុន សែន បានបញ្ជាឱ្យគណៈកម្មាធិការគ្រប់គ្រងការចាក់វ៉ាក់សាំងការពារកូវីដ-១៩ ត្រៀមវ៉ាក់សាំង Sinovac របស់ចិនចំនួន៥លានដូស ដើម្បីចាក់ដល់កុមារនិងយុវវ័យចាប់ពីអាយុពី១២ឆ្នាំដល់១៧ឆ្នាំ ដែលមានចំនួនជាង២លាននាក់ក្នុងប្រទេសកម្ពុជា។
គួរបញ្ជាក់ថា រហូតមកដល់ពេលនេះ អង្គការសុខភាពពិភពលោក (WHO) មិនទាន់ដាក់ប្រភេទវ៉ាក់សាំងស៊ីណូវ៉ាក់ (Sinovac) ចូលទៅក្នុងបញ្ជីទទួលស្គាល់សម្រាប់ចាក់ដល់កុមារនៅឡើយទេ។ ប៉ុន្តែក្រុមហ៊ុន ស៊ីណូវ៉ាក់ ធ្លាប់បានប្រកាសថា វ៉ាក់សាំងរបស់ខ្លួនត្រូវបានទទួលស្គាល់ដោយរដ្ឋាភិបាលចិនសម្រាប់ចាក់ដល់ក្មេងអាយុចាប់ពី៣ឆ្នាំឡើងទៅបាន៕
សេចក្ដីកែតម្រូវ៖ «អគ្គនាយកបច្ចេកទេសសុខាភិបាល ជាអ្នកទទួលខុសត្រូវធ្វើនិងចេញសេចក្តីជូនព័ត៌មានកូវីដ-១៩ លោក ហុក គឹមចេង» ទៅជា «អគ្គនាយកបច្ចេកទេសសុខាភិបាល លោក ហុក គឹមចេង»
