តំណាងពលរដ្ឋមានជម្លោះដីធ្លីនៅឃុំឈើទាល ស្រុកស្វាយជ្រុំ ខេត្តស្វាយរៀង បានលើកឡើងថា សមាជិករបស់ខ្លួនមួយចំនួនត្រូវបានអាជ្ញាធរគំរាមកំហែងបង្ខំឱ្យពួកគេផ្ដិតស្នាមមេដៃទទួលយកសំណងក្នុងតម្លៃដីមួយម៉ែត្រការ៉េត្រឹម៩០០រៀល ឬស្មើ៩លានរៀល (៩ ០០០ ០០០រៀល) ក្នុងមួយហិកតា។
តំណាងពលរដ្ឋមានជម្លោះដីធ្លី អ្នកស្រី យស សុភ័ណ្ឌ អះអាងថា រយៈពេល៥ថ្ងៃហើយតាំងពីពេលគាត់ជាប់ធ្វើចត្តាឡីស័កមក មានពលរដ្ឋមួយចំនួនត្រូវបានអាជ្ញាធរទៅគំរាមឱ្យផ្តល់ស្នាមមេដៃទទួលយកសំណងទាំងបង្ខំ ដោយថាប្រសិនបើពលរដ្ឋមិនយល់ព្រមទទួលយកសំណងនោះ អាជ្ញាធរនឹងមិនផ្តល់សេវាផ្សេងៗជូនពលរដ្ឋទៀតទេ។
អ្នកស្រីបន្តថា៖ «ចំណែកភូមិធ្នង់ មេភូមិធ្នង់ហ្នឹង ហើយនិងជំនួយការភូមិ! គាត់ថា បើសិនជាប្រជាពលរដ្ឋមិនទៅផ្ដិតមេដៃទេ ចាប់ពីពេលហ្នឹងទៅ លែងរាប់អានគ្នា លែងមើលមុខគ្នា ហើយចង់ទាក់ទងធ្វើច្បាប់ការ [អាពាហ៍ពិពាហ៍] ឬច្បាប់បុណ្យអី! គាត់ [មេភូមិ] លែងធ្វើឱ្យហើយ ដោយសារតែពួកគាត់ [ពលរដ្ឋ] មិនស្ដាប់តាម [មេភូមិ]»។
អ្នកស្រីអះអាងបន្តថា ការគំរាមកំហែងនេះជារឿងមួយអយុត្តិធម៌ ដែលធ្វើឱ្យពលរដ្ឋខ្លះមិនសប្បាយចិត្តទទួលយកសំណងនោះឡើយ។
តំណាងសហគមន៍ចេកមាស អ្នកស្រី ឥន្ទ សូត្រ បានលើកឡើងថា តាំងពីមានការចេញតវ៉ាពីសំណាក់ប្រជាពលរដ្ឋចំនួនបីភូមិ រួមមាន ភូមិចេក ភូមិឈើទាល និងភូមិធ្នង់ ដើម្បីទាមទារដំណោះស្រាយដីធ្លីមក អាជ្ញាធរមិនឱ្យពលរដ្ឋជួបជុំគ្នាទៀតឡើយ ហើយពួកគេបានប្រាប់ពលរដ្ឋឱ្យយកសំណងតម្លៃ៩០០រៀលក្នុងមួយម៉ែត្រការ៉េនោះ។
អ្នកស្រីបានស្នើថា៖ «ពួកខ្ញុំជាអ្នករងគ្រោះដីធ្លី មិនរកយុត្តិធម៌ជូន បែរមកធ្វើបាបកាន់តែខ្លាំង»។
មេឃុំឈើទាល អ្នកស្រី ណង សុនី សុំមិនបកស្រាយករណីនេះឡើយ ដោយថាជាប់រវល់។
ចំណែកមេភូមិចេក លោក អិន សុខន បានលើកឡើងថា អាជ្ញាធរពុំបានគំរាមកំហែងដូចការលើកឡើងរបស់ពលរដ្ឋឡើយ។ លោកថា ពលរដ្ឋដែលទៅផ្តិតមេដៃទទួលយកសំណងនោះ គឺពួកគេធ្វើដោយស្ម័គ្រចិត្តនិងមិនមានការបង្ខិតបង្ខំណាមួយឡើយ។
លោកបញ្ជាក់ថា៖ «ការគំរាមកំហែងហ្នឹង វាមិនពិតទេ! គេផ្ដល់ឱ្យពលរដ្ឋផ្តិតមេដៃ បើយើងមិនផ្ដិត មានតែអត់! គេអត់បង្ខំយើងទេ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សារឿន បានលើកឡើងថា អាជ្ញាធរមិនត្រូវធ្វើទុក្ខបុកម្នេញពលរដ្ឋនោះទេ គួរតែមានការចូលរួមសហការដោះស្រាយឱ្យបានសមរម្យជូនពលរដ្ឋ។ លោកបន្តថា ប្រជាពលរដ្ឋកាន់តែជួបការលំបាកខ្លាំងនៅពេលដែលពួកគាត់ទទួលបានសំណងតិចតួចមិនសមនឹងតម្លៃទីផ្សារនោះ។
លោកមានប្រសាសន៍ថា៖ «អាជ្ញាធរគួរតែផ្ដល់ពេលវេលាគ្រប់គ្រាន់សម្រាប់ឱ្យប្រជាពលរដ្ឋធ្វើការជ្រើសរើស ហើយជជែកគ្នាប្រកបដោយការស្ថាបនានិងទំនួលខុសត្រូវសម្រាប់កិច្ចការដែលកំពុងតែប្រឈម ដើម្បីឈានរកភាពល្អប្រសើរ ព្រោះថា ការអភិវឌ្ឍ គោលបំណងមួយៗគឺដើម្បីលើកកម្ពស់ជីវភាព។ ប៉ុន្តែបើសិនជាការអភិវឌ្ឍទៅ ប្រឈមនឹងបញ្ហា ប្រឈមនឹងការគំរាមកំហែង ប្រជាពលរដ្ឋចូលរួមទាំងមិនសប្បាយចិត្ត ខ្ញុំគិតថា វាខុសនឹងឆន្ទៈនិងគោលការណ៍អភិវឌ្ឍន៍ទាំងហ្នឹង»។
វិវាទដីធ្លីនៅឃុំឈើទាល ស្រុកស្វាយជ្រុំនេះ កើតឡើងតាំងពីឆ្នាំ២០០៨ ដែលមានពលរដ្ឋជាង១០០គ្រួសារលើទំហំដីប៉ះពាល់ជិត១០០ហិកតា។ ជម្លោះនេះកើតមានក្រោយពីក្រសួងធនធានទឹកនិងឧតុនិយម បានសហការជាមួយអាជ្ញាធរមូលដ្ឋាន សម្រេចយកតំបន់នេះជាគម្រោងបង្កើតអាងទឹកទន្លេវៃគោ។
ដោយសារមានការតវ៉ារកដំណោះស្រាយដីធ្លីនេះ កាលពីថ្ងៃទី៤ ខែសីហា តំណាងពលរដ្ឋ អ្នកស្រី យស សុភ័ណ្ឌ និងអ្នកស្រី ឥន្ទ សូត្រ ត្រូវបានអាជ្ញាធរស្រុកស្វាយជ្រុំ ផាកពិន័យម្នាក់ៗចំនួន២ ០០០ ០០០ រៀល [ពីរលានរៀល] ក្រោយពីពួកគេបានប្រមូលម្ដុំគ្នាថតបង្ហោះលើបណ្ដាញសង្គមហ្វេសប៊ុក ដើម្បីស្នើអាជ្ញាធរដោះស្រាយសំណងផលប៉ះពាល់ជូនពួកគាត់ឱ្យបានសមរម្យ។ លើសពីនេះ អាជ្ញាធរតម្រូវឱ្យពលរដ្ឋជាង៣០គ្រួសារផ្សេងទៀតដែលចូលរួមតវ៉ាដែរនោះ ត្រូវធ្វើចត្តាឡីស័កមិនឱ្យចេញទៅណាបានឡើយ៕