ភ្ញៀវទេសចរអន្តរជាតិធ្វើដំណើរមកប្រទេសកម្ពុជាមានការថយចុះជាង៩១ភាគរយ (៩១,៣%) ខណៈប្រជាពលរដ្ឋកម្ពុជាចេញទៅក្រៅប្រទេសថយចុះជិត១០០ភាគរយ (៩៦,៦%) គិតត្រឹមឆមាសទី១ ឆ្នាំ២០២១ ហើយចំនួននេះមានការថយចុះដូចគ្នា បើប្រៀបធៀបទៅឆមាសទី១ ឆ្នាំ២០២០។
ក្រសួងទេសចរណ៍ បានបង្ហាញរបាយការណ៍រយៈពេល៦ខែឆ្នាំ២០២១ នៅលើទំព័រហេ្វសប៊ុកកាលពីថ្ងៃទី១១ ខែសីហា ថាចំនួនភ្ញៀវទេសចរបរទេសមកកម្ពុជា និងប្រជាពលរដ្ឋដែលបានធ្វើដំណើរទៅក្រៅប្រទេស មានការថយចុះយ៉ាងខ្លាំង បើប្រៀបធៀបនឹងរយៈពេលដូចគ្នាកាលពីឆ្នាំមុន។
របាយការណ៍បង្ហាញថា ទូទាំងប្រទេសកម្ពុជាទទួលបានភ្ញៀវទេសចរអន្តរជាតិចំនួន១០២ ៥៦០នាក់ ថយចុះ៩១,៣% ក្នុងនោះ ភ្ញៀវអន្តរជាតិដែលមកតាមផ្លូវអាកាសមានចំនួន៤៦ ២៤៩នាក់ ថយចុះ៩៣,២%, តាមផ្លូវគោកមានចំនួន៥៦ ៣០៩នាក់ ថយចុះ៨៧,៤% និងមកតាមផ្លូវទឹកមានចំនួនតែ២នាក់ប៉ុណ្ណោះ។ រីឯប្រជាពលរដ្ឋកម្ពុជាដែលបានចេញទៅក្រៅប្រទេសមានចំនួន១០ ៥៣៨នាក់ មានការថយចុះ៩៦,៦%។
ប្រភពដដែលបន្តថា ទីផ្សារទេសចរណ៍សំខាន់ៗមានចំនួន១០ប្រទេស រួមមាន ទេសចរថៃមានចំនួន៥២ ២៩០នាក់ ថយចុះ៦៧,៥% , ទេសចរចិនចំនួន២៩ ៧៥១នាក់ ថយចុះ៦៧,៥% , ទេសចរវៀតណាមមានចំនួន៦ ៩៥៦នាក់ ថយចុះ៩៦,១% , ទេសចរឥណ្ឌូណេស៊ីមានចំនួន៣ ៤១៥នាក់ ថយចុះ៧៤,៣% និងទេសចរកូរ៉េខាងត្បូងមានចំនួន១ ៨៣៣នាក់ ថយចុះ៩៦,៥%។
បន្ថែមពីនេះ ទេសចរសហរដ្ឋអាមេរិកមានចំនួន១ ៥៩០នាក់ ថយចុះ ៩៧% , ទេសចរចិនមកពីកោះតៃវ៉ាន់ ១,៥០៤នាក់ ថយចុះ៩២,៨% , ទេសចរម៉ាឡេស៊ី ៨៨៣នាក់ ថយចុះ៩៦,៥% , ទេសចរជប៉ុន ៧៩០នាក់ ថយចុះ៩៨% និងទេសចរបារាំង ៦៤៨នាក់ ថយចុះ៩៨,៥%។
សូមបញ្ជាក់ផងដែរថា ភ្ញៀវទេសចរផ្ទៃក្នុងឬទេសចរក្នុងស្រុក នៅឆមាសទី១ ឆ្នាំ២០២១ មានចំនួនសរុប១ ៩៨២ ៦៤១នាក់ ថយចុះ៣៧,៣% ប្រៀបធៀបនឹងរយៈពេលដូចគ្នានឹងឆ្នាំ២០២០។ រីឯទេសចរបរទេសផ្ទៃក្នុងមានចំនួនសរុប១៤១ ៩៨៨នាក់៕
