ក្រសួងលើកឡើងថា ដើម្បីធានាសន្តិសុខជាតិ ខ្លួននឹងចាត់វិធានការច្បាប់ទៅលើក្រុមហ៊ុនទូរសព្ទចល័តចំនួនពីរ បើពួកគេនៅតែបន្តចែកចាយស៊ីមកាតឬលេខទូរសព្ទឱ្យទៅអតិថិជនទាំងមិនមានឯកសារសម្គាល់អត្តសញ្ញាណត្រឹមត្រូវ។
ការព្រមានរបស់ក្រសួងប្រៃសណីយ៍ និងទូរគមនាគមន៍ ធ្វើឡើងតាមរយៈសេចក្តីប្រកាសព័ត៌មានមួយចុះថ្ងៃទី១០ ខែសីហា ឆ្នាំ២០២១។
បើតាមលិខិតនោះ ក្រសួងលើកឡើងថា ថ្មីៗនេះ ខ្លួនបានរកឃើញក្រុមហ៊ុនពីរ គឺ «ក្រុមហ៊ុនវៀតធេល (ខេមបូឌា)» ឬ «ក្រុមហ៊ុន មិត្តហ្វូន» និង «ក្រុមហ៊ុនស្មាត អាស្យាតា ខូអិលធីឌី» បានធ្វើសកម្មភាពលក់និងចែកចាយស៊ីមកាតនៅទីតាំងមួយចំនួន ដោយពុំបានតម្រូវឱ្យមានឯកសារសម្គាល់អត្តសញ្ញាណរបស់អ្នកប្រើប្រាស់ទេ។
ក្រសួងចាត់ទុកថា សកម្មភាពនេះបានបន្តអនុវត្តផ្ទុយទៅនឹងសារាចរណែនាំអន្តរក្រសួងចុះថ្ងៃទី២៨ ខែកុម្ភៈ ឆ្នាំ២០១២ និងរំលោភលើសេចក្តីណែនាំរបស់ក្រសួងប្រៃសណីយ៍ និងនិយ័តករទូរគមនាគមន៍។
ក្រសួងមួយនេះបានគូសបញ្ជាក់ថា ដើម្បីពង្រឹងសណ្តាប់ធ្នាប់លើវិស័យទូរគមនាគមន៍និងសន្តិសុខជាតិ ក្រសួងអំពាវនាវ ឱ្យក្រុមហ៊ុនទាំងពីរនោះបញ្ឈប់ជាបន្ទាន់នូវសកម្មភាពនេះតាមគ្រប់មធ្យោបាយ ចាប់ពីថ្ងៃជូនដំណឹងនេះទៅ។
ក្រសួងព្រមានថា ក្នុងករណីប្រតិបត្តិករនៅតែមិនអនុវត្តតាម ក្រសួងនឹងព្យួរឬលុបអាជ្ញាបណ្ណប្រតិបត្តិការផ្តល់សេវាទូរសព្ទចល័ត បង្កករាល់ការស្នើសុំនានារបស់ប្រតិបត្តិករ ចាត់វិធានការផ្សេងទៀតស្របតាមមាត្រា៧៨ នៃច្បាប់ស្តីពីទូរគមនាគមន៍ [ហើយ] រាល់បុគ្គលពាក់ព័ន្ធនឹងករណីនេះ នឹងត្រូវប្រឈមចំពោះមុខច្បាប់ព្រហ្មទណ្ឌ។
យ៉ាងណា ក្រសួងប្រៃសណីយ៍ និងទូរគមនាគមន៍ មិនបានបញ្ជាក់ថាមានស៊ីមកាតប៉ុន្មានដែលក្រុមហ៊ុនទូរសព្ទចល័តទាំងពីរនោះបានលក់ចែកចាយរួចហើយឱ្យអតិថិជនទាំងមិនមានឯកសារសម្គាល់អត្តសញ្ញាណត្រឹមត្រូវដែលខ្លួនបានរកឃើញនោះទេ៕
