ក្រសួងកសិកម្ម រុក្ខាប្រមាញ់ និងនេសាទ បានណែនាំដល់ឈ្មួញឱ្យបង្វែរទីផ្សារពីការនាំចេញផ្លែមៀនប៉ៃលិន ឬតាងែន ពីប្រទេសថៃ ទៅកាន់ប្រទេសវៀតណាមវិញ ក្រោយថៃបិទច្រកព្រំដែនមិនឱ្យនាំចូលផ្លែឈើនេះទៅប្រទេសរបស់ខ្លួន។
កាលពីថ្ងៃទី១០ ខែសីហា ឆ្នាំ២០២១ ក្រុមឈ្មួញជាច្រើននាក់ដែលនាំចេញតាងែនពីកម្ពុជាទៅថៃ បាននាំគ្នាយករថយន្តដឹកផ្លែមៀនប៉ៃលិនទាំងនោះទៅមុខច្រកទ្វារព្រំដែនអន្តរជាតិដូង ដើម្បីសុំទៅអាជ្ញាធរកម្ពុជាឱ្យជួយសម្រួលជាមួយអាជ្ញាធរថៃធ្វើយ៉ាងណាឱ្យពួកគេអាចនាំចូលប្រទេសនេះបាន។
ក្រោយហេតុការណ៍នេះ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីប្រកាសព័ត៌មានមួយចុះថ្ងៃទី១២ ខែសីហានេះ ដោយបានណែនាំដល់អ្នកនាំចេញទាំងអស់ឱ្យបង្វែរទិសដៅទីផ្សារពីប្រទេសថៃទៅប្រទេសវៀតណាមវិញ ដោយថា កម្ពុជាបានបើកទីផ្សារសម្រាប់មៀននេះរួចហើយ តាមរយៈការសម្រេចនិងឯកភាពគ្នាលើលក្ខខណ្ឌតម្រូវការនាំចេញផ្លែមៀនកម្ពុជាទៅកាន់ប្រទេសវៀតណាម។
ក្រសួងកសិកម្ម បន្តថា ពាក់ព័ន្ធការនាំចេញផ្លែមៀនស្រស់ទៅក្រៅប្រទេសនេះ ក្រសួងបានដាក់សំណើសុំចរចាបើកទីផ្សារនៅប្រទេសចិន និងប្រទេសថៃរួចហើយ កាលពីឆ្នាំ២០១៩ ប៉ុន្តែពុំទាន់មានការឆ្លើយតបជាផ្លូវការណាមួយពីប្រទេសទាំងពីរនេះនៅឡើយ បើទោះជាភាគីកម្ពុជាបានទាក់ទងជំរុញការងារនេះជាច្រើនដងរួចហើយក៏ដោយ។
ក្រសួងកសិកម្ម ក៏បានអំពាវនាវដល់ប្រជាពលរដ្ឋឱ្យចូលរួមគ្នាគាំទ្រផលិតផលខ្មែរ ដោយជួយទិញផ្លែមៀនរបស់ប្រជាកសិករ ពិសេសសហគមន៍កសិកម្មមៀនប៉ៃលិននៅក្នុងកាលៈទេសៈដ៏លំបាកនេះ។
ជាមួយគ្នានេះដែរ ក្រសួងក៏បានសុំដល់ម្ចាស់ទីតាំងផ្សារទំនើប ក្រុមហ៊ុន ឬសិប្បកម្មកែច្នៃកសិផលក្នុងស្រុក ឱ្យនាំគ្នាជួយប្រមូលទិញផ្លែមៀនប៉ៃលិនមកលក់ចែកចាយឬធ្វើការកែច្នៃសម្រាប់បម្រើដល់ការហូបចុកក្នុងស្រុក ជំនួសឱ្យការនាំចូលនូវផ្លែមៀនកំប៉ុងពីក្រៅប្រទេសវិញផងដែរ។
លោក ឌីន ដែន ជាឈ្មួញកណ្តាលម្នាក់ដែលនាំយកទំនិញកសិផលផ្លែមៀនប៉ៃលិនទៅលក់នៅប្រទេសថៃ មានប្រសាសន៍នៅថ្ងៃសុក្រនេះថា ប្រសិនបើវៀតណាមទទួលទិញមៀនពីកម្ពុជាមែន នោះជារឿងល្អ ហើយលោកនឹងនាំមៀនពីកម្ពុជាទៅលក់នៅប្រទេសវៀតណាម។ តែយ៉ាងណា លោកមិនធ្លាប់ដឹងទេថា ថៅកែវៀតណាមទទួលទិញផ្លែមៀនពីកម្ពុជា ព្រោះកន្លងមក មានតែថៅកែចិនដែលមានក្រុមហ៊ុននៅប្រទេសថៃដែលទទួលទិញពីកម្ពុជា។
ឈ្មួញកណ្តាលរូបនេះអះអាងថា ចាប់តាំងពីថៃបិទមិនឱ្យកម្ពុជានាំមៀនចូលប្រទេសរបស់ខ្លួនមក ផ្លែមៀនរបស់ពួកគាត់បានខូចអស់ប្រហែល៥០០តោន ដែលគិតជាលុយប្រហែល១៥ម៉ឺនដុល្លារ។ លោកថា បញ្ហានេះនឹងធ្វើឱ្យពួកគាត់ប្រឈមជំពាក់បំណុលធនាគារក្នុងចំនួនដ៏ច្រើន។
លោកបន្ថែមថា៖ «អ្នកណាក៏ជំពាក់ធនាគារដែរ មិនថាខ្ញុំ មិនថាគេទេ! អ្នកមានមុខរបរតិច ជំពាក់តាមតិច អ្នកមុខរបច្រើន ជំពាក់តាមច្រើន។ អ៊ីចឹងវាប្រឈម និងប៉ះពាល់ខ្លាំងណាស់»។
បើតាមលោក ឌីន ដែន ទោះបីថ្ងៃនេះ ព្រំដែនកម្ពុជា-ថៃត្រូវបានបើកឱ្យដំណើរការឡើងវិញក៏ដោយ ប៉ុន្តែទំនិញរបស់ពួកគាត់មិនទាន់អាចនាំចូលប្រទេសថៃបាននៅឡើយទេ ខណៈអាជ្ញាធរខេត្តកំពុងជួបចរចាជាមួយភាគីថៃ ដើម្បីស្វែងរកដំណោះស្រាយ។
ខណៈដែលក្រសួងកសិកម្មឱ្យឈ្មួញបង្វែរទីផ្សារទៅប្រទេសវៀតណាមនេះ ក៏មានឈ្មួញនាំទំនិញពីកម្ពុជាទៅប្រទេសវៀតណាមបានត្អូញត្អែរដែរថា ទំនិញខ្មែរបាននិងកំពុងកកស្ទះនៅតាមច្រកព្រំដែនកម្ពុជា-វៀតណាមមួយចំនួន ដោយសារភាគីវៀតណាមបានបិទមិនឱ្យនាំចូល។
លោក តឹង យិន នៅឃុំព្រែកត្នោត ស្រុកទឹកឈូ ខេត្តកំពត ដែលជាឈ្មួញនាំទំនិញពីកម្ពុជាទៅប្រទេសវៀតណាម បានប្រាប់ វីអូឌី នៅថ្ងៃសុក្រនេះថា ទំនិញកម្ពុជាបាននិងកំពុងកកស្ទះយ៉ាងច្រើននៅច្រកព្រំដែនតន់ហន់ និងច្រកព្រែកចាក ក្រោយពីវៀតណាមបិទមិនឱ្យចូលកាលពីថ្ងៃទី១៨ ខែកក្កដា ឆ្នាំ២០២១ ខណៈទំនិញវៀតណាមអាចនាំចូលមកកម្ពុជាដោយសេរី។
លោកបន្ថែមថា៖ «បញ្ហាហ្នឹង គឺអីវ៉ាន់ខាងខ្មែរយើង វាអត់ឱ្យចូល! វាឱ្យយើងធ្វើលិខិតស្នាមអីខ្លាំង ប៉ុន្តែអីវ៉ាន់វៀតណាមចូលមកខ្មែរយើងភ្លូកទឹកភ្លូកដី ហើយប្រជាជនគេរកស៊ីចូលមកទឹកដីខ្មែរយើងបានដោយសេរី។ ដល់ពេលអីវ៉ាន់ខ្មែរយើងយកទៅ គេអត់ឱ្យចូល។ ខ្ញុំទាមទារថា បើបិទឱ្យបិទទាំងអស់គ្នា ឱ្យប្រជាជនវាស្រែកម្តងមើល»។
អភិបាលរង និងអ្នកជានាំពាក្យរដ្ឋបាលខេត្តកំពត លោក ភូ លិ មានប្រសាសន៍ថា លោកទើបតែទទួលបានព័ត៌មាននេះពីខាងសារព័ត៌មាន វីអូឌី។ តែយ៉ាងណា លោកថា អាជ្ញាធរខេត្តនឹងទំនាក់ទំនងទៅភាគីវៀតណាម ដើម្បីសម្របសម្រួលដោះស្រាយករណីនេះ។
លោកបន្ថែមថា៖ «ខ្ញុំកំពុងឱ្យលោកអភិបាលស្រុកដាក់លិខិតសុំគោលការណ៍ពីអភិបាលខេត្តដោះស្រាយលើរឿងហ្នឹងហើយ»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន ជំរុញទៅរដ្ឋាភិបាលនិងអាជ្ញាធរពាក់ព័ន្ធត្រូវខិតខំសម្របសម្រួលចរចាបន្តទៀតជាមួយប្រទេសជិតខាង ដោយធ្វើយ៉ាងណាឱ្យកសិករឬឈ្មួញកម្ពុជាអាចនាំកសិផលរបស់ខ្លួនទៅលក់នៅលើទីផ្សាររបស់ប្រទេសទាំងនោះដោយស្មើភាពគ្នា ខណៈទំនិញរបស់ប្រទេសជិតខាងទាំងនោះបាននាំចូលមកកម្ពុជាដោយរលូន ប៉ុន្តែទំនិញរបស់កម្ពុជាមិនអាចនាំទៅត្រឡប់ទៅវិញបាន។
លោកបន្តថា ការអនុញ្ញាតឱ្យទំនិញឬផលិតផលរបស់ប្រទេសជិតខាងនាំចូលបាន ប៉ុន្តែទំនិញឬផលិតផលរបស់កសិករខ្មែរមិនអាចនាំចេញទៅប្រទេសជិតខាងបាននោះ ជារឿងអយុត្តិធម៌មួយសម្រាប់ប្រជាពលរដ្ឋកម្ពុជា។
លោកបន្ថែមថា៖ «ដើម្បីធានាបានភាពយុត្តិធម៌ទាំងអស់គ្នាក្នុងការចេញចូលនៃទំនិញ ប្រសិនជាយើងបើកឱកាសឱ្យនាំចូលផលិតផលទំនិញ ប៉ុន្តែយើងមិនមានលទ្ធភាពក្នុងការចរចា វាហាក់បីដូចជាយើងចាញ់ប្រៀបគេ អ៊ីចឹងធ្វើឱ្យប្រជាពលរដ្ឋបាត់បង់នូវអត្ថប្រយោជន៍ ហើយប្រឈមនឹងបញ្ហា។ ហើយប្រជាពលរដ្ឋច្បាស់ណាស់ថានឹងស្តីបន្ទោសទៅលើសមត្ថភាព ក៏ដូចជាការធ្វើការងាររបស់អាជ្ញាធររដ្ឋ ទាក់ទងនឹងការផ្តល់សេវាសាធារណៈ និងការសម្រួលសម្រួលរកទីផ្សារលក់ទំនិញ និងស្វែងរកដំណោះស្រាយជូនពួកគាត់ហ្នឹង»។
យ៉ាងណា នៅថ្ងៃសុក្រនេះ ព្រំដែនកម្ពុជា-ថៃត្រូវបើកដំណើរការឡើងវិញហើយ បន្ទាប់ពីបានបិទខ្ទប់អស់រយៈពេល១៤ថ្ងៃ ដើម្បីទប់ស្កាត់ការឆ្លងជំងឺកូវីដ-១៩ ប្រភេទ “ដែលតា” (Delta)៕