អាជ្ញាធរខេត្តបន្ទាយមានជ័យ ឱ្យដឹងថា ក្រោយពីបើកច្រកព្រំដែននៅថ្ងៃសុក្រនេះ មានពលករប្រមាណជា៦០០នាក់ដែលធ្វើការនៅប្រទេសថៃ បានឆ្លងចូលមកកម្ពុជាវិញតាមច្រកព្រំដែនក្នុងខេត្តបន្ទាយមានជ័យ។
អភិបាលខេត្តបន្ទាយមានជ័យ លោក អ៊ុំ រាត្រី បានប្រាប់ក្រុមអ្នកសារព័ត៌មានថា ក្នុងចំណោមពលករខ្មែរ៦០០នាក់នោះ គឺមានពលករខ្មែរចំនួន៣៣៥នាក់ត្រូវបានក្រុមគ្រូពេទ្យនិងអាជ្ញាធរធ្វើតេស្តដោយឧបករណ៍តេស្តរហ័ស និងបានរកឃើញពលករចំនួន៣៧នាក់វិជ្ជមានកូវីដ-១៩។
លោកមានប្រសាសន៍ថា៖ «អ្នកខ្លះគាត់ចង់ចេញតាមច្រកអន្តរជាតិប៉ោយប៉ែត ប៉ុន្តែភាគីថៃគាត់អត់ឱ្យចេញតាមច្រកប៉ោយប៉ែត គាត់ឱ្យចេញតាមច្រកកន្លែងយើងរៀបចំនេះ។ ហើយយើងគិតថា នឹងមានជាបន្តបន្ទាប់ ហើយនឹងមានមកពីបាងកកផង និងតាមខេត្តផ្សេងៗតាមព្រំដែន។ នេះគឺជាព័ត៌មានដែលអភិបាលខេត្តស្រះកែវ និងខាងអគ្គកុងស៊ុល បានផ្ដល់ព័ត៌មានមក គឺនៅតែមានបន្តមក! ហើយមកដល់ព្រំដែន ៣០០ទៅ៤០០នាក់ហើយ»។
ភាគីកម្ពុជាបានសម្រេចបើកច្រកព្រំដែនក្នុងខេត្តបន្ទាយមានជ័យ នៅថ្ងៃទី១៣ ខែសីហានេះ បន្ទាប់ពីបានបិទខ្ទប់អស់រយៈពេល១៤ថ្ងៃ ដើម្បីទប់ស្កាត់ការឆ្លងជំងឺកូវីដ-១៩ប្រភេទ “ដែលតា” (Delta) ខណៈប្រទេសថៃបាននិងកំពុងឆ្លងជំងឺនេះខ្លាំង។
អភិបាលខេត្តបន្ទាយមានជ័យ លោក អ៊ុំ រាត្រី បានផ្ញើលិខិតទៅកាន់អភិបាលខេត្តស្រះកែវ ប្រទេសថៃ កាលពីថ្ងៃទី១២ ខែសីហា ថាកម្ពុជាបានសម្រេចបើកព្រំដែននៅច្រកខេត្តបន្ទាយមានជ័យឡើងវិញ បន្ទាប់ពីបិទខ្ទប់អស់រយៈពេល១៤ថ្ងៃ ដើម្បីប្រយុទ្ធប្រឆាំងនឹងការឆ្លងរាលដាលក្នុងសហគមន៍នៃមេរោគកូវីដ-១៩ប្រភេទ “ដែលតា” (Delta) បានបញ្ចប់។
បន្ថែមលើនេះ អ្នកនាំពាក្យរដ្ឋបាលខេត្តបន្ទាយមានជ័យ លោកស្រី រស់ សុផានី បានឱ្យដឹងថា បច្ចុប្បន្នមានពលករជាង៣ ០០០នាក់កំពុងធ្វើចត្តាឡីស័កនៅក្នុងខេត្តនេះ។
កម្មកររោងចក្រនៅខេត្តឈុនបូរី ប្រទេសថៃ លោក អឹន សារ៉ាយ ដែលកំពុងធ្វើចត្តាឡីស័ក បន្ទាប់ពីព្យាបាលជំងឺកូវីដ-១៩ជាសះស្បើយនៅក្នុងប្រទេសថៃនោះ បានឱ្យដឹងថា នឹងមានពលករខ្មែរមួយចំនួនទៀតកំពុងរៀបចំអីវ៉ាន់ដើម្បីវិលត្រឡប់មកប្រទេសកម្ពុជាវិញ បន្ទាប់ពីអាជ្ញាធរកម្ពុជាបានបើកច្រកព្រំដែនវិញនៅថ្ងៃនេះ។ ប៉ុន្តែសម្រាប់លោកនិងគ្រួសារនឹងមិនទាន់សម្រេចចិត្តវិលត្រលប់មកប្រទេសកម្ពុជាវិញទេ ដោយសារគ្មានប្រាក់សងធនាគារ ខណៈនៅកម្ពុជាពិបាករកប្រាក់ចំណូល។
លោកថា៖ «ខ្ញុំខ្វះខាត ព្រោះយើងត្រូវការទម្លាក់លុយទៅផ្ទះ ដល់ពេលយើងឈឺអ៊ីចឹង អត់បាននិងមានការងារធ្វើ។ លុយក្រុមហ៊ុន គេមិនឱ្យយើងពេញដូចមុនណា! គេឱ្យយើងពាក់កណ្ដាលហ្នឹង! តាំងពីខ្ញុំកើតកូវីដ-១៩ ដល់ឥលូវ ខ្ញុំអត់មានពីណាជួយខ្ញុំទេ។ តែពេលខ្ញុំកើតកូវីដ-១៩ ខ្ញុំភ័យចង់ទៅផ្ទះរហូតហ្នឹង! ដល់ពេលដេកពេទ្យ គេមើលយើងជាទៅ ក៏លែងគិតចង់ទៅផ្ទះ ចង់នៅធ្វើការបន្តទៀត ដោយសារទៅផ្ទះមិនដឹងរកអី»។
កាលពីថ្ងៃទី២៨ ខែកក្កដា ឆ្នាំ២០២១ លោកនាយករដ្ឋមន្រ្តី ហ៊ុន សែន បានសម្រេចបិទខ្ទប់ការធ្វើដំណើរឆ្លងព្រំដែនគោកជាមួយប្រទេសថៃ និងខេត្តចំនួន៨ រយៈពេល២សប្តាហ៍ រហូតដល់ថ្ងៃទី១២ ខែសីហា ឆ្នាំ២០២១ ដើម្បីទប់ស្កាត់ការនាំវីរុសកូវីដ-១៩ប្រភេទ “ដែលតា” ចូលសហគមន៍តាមរយៈពលករខ្មែរដែលត្រឡប់មកពីប្រទេសថៃ។
ក្រោយពីបញ្ចប់ការបិទខ្ទប់រយៈពេល១៤ថ្ងៃមក រដ្ឋាភិបាលមិនបន្តបិទទៀតឡើយ ប៉ុន្តែរដ្ឋាភិបាលបានបន្តអនុវត្តយុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលជំងឺនេះនៅទូទាំងប្រទេស រយៈពេល៧ថ្ងៃបន្ថែមទៀត រហូតដល់ថ្ងៃទី១៩ ខែសីហា។
រដ្ឋាភិបាលបានអះអាងថា តាមរយៈការអនុវត្តវិធានការបិទខ្ទប់បណ្តាខេត្តជាប់ព្រំដែន និងខេត្តសៀមរាប និងយុទ្ធនាការថ្នាក់ជាតិរយៈពេល១៤ថ្ងៃកន្លងមកនេះ បានជួយដល់ការគ្រប់គ្រងនិងការពន្យារពេលបានមួយកម្រិតនូវការឆ្លងរាលដាលទ្រង់ទ្រាយធំក្នុងសហគមន៍នៃមេរោគកូវីដ-១៩ ប្រភេទ “ដែលតា” (Delta)។ ជាក់ស្តែង អត្រានៃការឆ្លងរាលដាលនៃជំងឺកូវីដ-១៩ ប្រចាំថ្ងៃមានលក្ខណៈថេរ បើទោះជាមេរោគបំប្លែងខ្លួនថ្មីប្រភេទ “ដែលតា” បានធ្លាយចូលក្នុងសហគមន៍ ហើយបច្ចុប្បន្នបានរីករាលដាលរហូតទៅដល់១៧រាជធានី-ខេត្តក្តី។
អ្នកសម្របសម្រួលសមាគមអាដហុកប្រចាំខេត្តបន្ទាយមានជ័យ លោក ស៊ុំ ចាន់គា សាទរចំពោះការបើកច្រកព្រំដែនឱ្យពលករចូលមកប្រទេសកំណើត នៅក្នុងអំឡុងពេលដែលពួកគាត់កំពុងជួបបញ្ហានាពេលបច្ចុប្បន្ននេះ។
លោកថា៖ «ព្រោះគាត់នៅក្រោមតង់ ក្រោមអីហ្នឹង! វាប៉ះពាល់យ៉ាងខ្លាំងទៅការរស់នៅ ទៅលើសុខភាព ហើយពួកគាត់បានត្រឡប់មកវិញ ហើយបានមកដល់ មានការធ្វើចត្តាឡីស័ក និងធ្វើការពិនិត្យសុខភាពពួកគាត់ទៀត ជាការប្រសើរ។ អ៊ីចឹងជាការល្អមួយសម្រាប់ការយកចិត្តទុកដាក់របស់គាត់ដែលកំពុងជួបបញ្ហា»។
គិតត្រឹមថ្ងៃទី១០ ខែសីហា ឆ្នាំ២០២១ កម្ពុជាបានរកឃើញអ្នកមានវិជ្ជមានកូវីដ-១៩បំប្លែងថ្មីប្រភេទ Delta លើពលករដែលត្រលប់មកពីប្រទេសថៃ និងវៀតណាម អ្នកដំណើរតាមជើងហោះហើរ បុគ្គលិកសុខាភិបាល មន្ត្រីរាជការ និងអ្នកភូមិក្នុងសហគមន៍សរុបចំនួនសរុប៤២៩នាក់ ក្នុងចំណោម១៧រាជធានី-ខេត្ត៕
