តំណាងអង្គការសុខភាពពិភពលោកប្រចាំកម្ពុជា បានលើកឡើងថា ការចាក់វ៉ាក់សាំងការពារជំងឺកូវីដ-១៩តែមួយមុខ មិនមែនជាដំណោះស្រាយវេទមន្តក្នុងការបញ្ចប់ការរាតត្បាតជាសកលនៃជំងឺកូវីដ-១៩ទេ ប៉ុន្តែវាក់សាំងនេះអាចជួយមិនឱ្យឈឺជំងឺធ្ងន់ធ្ងរ កាត់បន្ថយការចូលសម្រាកនៅមន្ទីរពេទ្យ និងកាត់បន្ថយការស្លាប់។
យោងតាមសេចក្ដីប្រកាសព័ត៌មានរបស់អង្គការសុខភាពពិភពលោកប្រចាំកម្ពុជា (WHO) កាលពីថ្ងៃទី១២ ខែសីហា ឆ្នាំ២០២១ បានលើកឡើងថា ការមានសុទិដ្ឋិនិយមឬគិតវិជ្ជមានចំពោះវ៉ាក់សាំងអាចបង្កគ្រោះថ្នាក់ដល់សុខភាព ពីព្រោះការដែលបានចាក់វ៉ាក់សាំងរួចហើយមិនមែនមានន័យថា បុគ្គលរូបនោះគួរឈប់អនុវត្តវិធានការបង្ការផ្សេងទៀត រួមមាន ការពាក់ម៉ាស់នៅទីសាធារណៈ ការរក្សាគម្លាតសុវត្ថិភាព និងចៀសវាងការជួបជុំឬប្រមូលផ្ដុំមនុស្សច្រើននោះទេ។
អង្គការអន្តរជាតិមួយនេះបន្តថា ការចាក់វ៉ាក់សាំងតែមួយមុខមិនមែនជាដំណោះស្រាយទិព្វនោះទេ ពីព្រោះវាគ្រាន់តែជាឧបករណ៍មួយក្នុងចំណោមឧបករណ៍ដ៏សំខាន់ផ្សេងទៀតនៅក្នុងការប្រយុទ្ធប្រឆាំងនឹងជំងឺកូវីដ-១៩ប៉ុណ្ណោះ។
ជាមួយគ្នានេះ អង្គការសុខភាពពិភពលោកក៏បានកោតសរសើរចំពោះរាជរដ្ឋាភិបាលកម្ពុជា រួមទាំងក្រសួងសុខាភិបាល ដែលបានចាក់វ៉ាក់សាំងដល់ពលរដ្ឋរបស់ខ្លួនបានចំនួន៨លាននាក់ ឬស្មើនឹង៨០ភាគរយនៃគោលដៅ១០លាននាក់។
បន្ថែមពីនេះ ប្រធានអង្គការសុខភាពពិភពលោកប្រចាំកម្ពុជា លោកស្រីវេជ្ជបណ្ឌិត លី អាយឡែន (Li Ailan) ក៏បានកោតសរសើរចំពោះប្រជាជនកម្ពុជាដែលបានបង្ហាញពីភាពក្លាហាននិងភាពរឹងមាំក្នុងការបន្តប្រយុទ្ធនឹងជំងឺជាសកលមួយនេះ។
លោកស្រីបានបន្តថា៖ «ភាពក្លាហាន ការយល់ចិត្តនិងដឹងសុខទុក្ខគ្នា និងសេចក្តីស្រលាញ់ដែលប្រជាជនកម្ពុជាមានចំពោះប្រទេសជាតិនិងមនុស្សជាទីស្រឡាញ់របស់ខ្លួន តែងតែជំរុញចិត្តរបស់ខ្ញុំ! ជាមួយនឹងសកម្មភាពបុគ្គលម្នាក់ៗនិងសមូហភាព យើងនឹងយកឈ្នះនៅក្នុងការប្រយុទ្ធនឹងជំងឺកូវីដ-១៩បាន»។
សេចក្តីប្រកាសព័ត៌មានដដែលបញ្ជាក់ថា អង្គការសុខភាពពិភពលោកនៅតែបន្តផ្ដល់យោបល់ក្នុងការផ្ដល់អាទិភាពក្នុងការទទួលវ៉ាក់សាំងមុនគេដល់បុគ្គលិកសុខាភិបាល ក្រុមមនុស្សចាស់ អ្នកដែលមានជំងឺប្រចាំកាយ និងក្រុមងាយរងគ្រោះដទៃទៀត រួមមាន ស្រ្ដីមានផ្ទៃពោះ ស្រ្ដីកំពុងបំបៅដោះកូន ក៏ដូចជាកុមារនិងយុវជនដែលមានជំងឺប្រចាំកាយ៕