ក្រសួងសុខាភិបាលប្រកាសរកឃើញអ្នកជំងឺកូវីដ-១៩ បំប្លែងថ្មីប្រភេទដែលតា «Delta» លើពលរដ្ឋ និងអ្នកដំណើរ ចំនួន ៦៥ នាក់បន្ថែមទៀត ដែលធ្វើឱ្យចំនួនអ្នកឆ្លងវីរុសប្រភេទថ្មីនេះ កើនឡើងជិត ៥០០ នាក់ហើយ។
ក្នុងសេចក្តីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃទី១៣ ខែសីហា ឆ្នាំ២០២១ ឱ្យដឹងថា អ្នកជំងឺកូវីដ-១៩ បំប្លែងថ្មី ប្រភេទដែលតាទាំង ៦៥ នាក់ ត្រូវបានរកឃើញលើអ្នកដំណើរមកពីបរទេស តាមជើងហោះហើរចំនួន៤នាក់, ពលករខ្មែរត្រឡប់មកពីប្រទេសថៃចំនួន ១៧ នាក់, បុគ្គលិកសុខាភិបាលចំនួន ៤ នាក់ និងមន្ត្រីរាជការចំនួន ៤ នាក់ រួមទាំងប្រជាជនអ្នកភូមិនៅក្នុងសហគមន៍ចំនួន ៣៦ នាក់។
បើតាមក្រសួងសុខាភិបាលឱ្យដឹងថា គិតត្រឹមថ្ងៃទី១៣ ខែសីហា នេះ ជំងឺកូវីដ-១៩ បំប្លែងថ្មីប្រភេទដែលតា «Delta» បាននឹងកំពុងឆ្លងរាលដាលនៅតាមបណ្ដាលរាជធានី-ខេត្តចំនួន ២២ ខេត្ត លើកលែងតែ៣ខេត្តប៉ុណ្ណោះ គឺខេត្តកែប ខេត្តតាកែវ និងខេត្តក្រចេះ នៅមិនទាន់រកឃើញអ្នកជំងឺកូវីដ-១៩ បំប្លែងថ្មីប្រភេទដែលតានៅឡើយទេ។
គិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី១៣ ខែសីហា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ-១៩ ប្រភេទដែលតា«Delta» លើអ្នកដំណើរ ពលករត្រឡប់មកពីប្រទេសថៃ និងប្រទេសវៀតណាម និងប្រជាពលរដ្ឋក្នុងសហគមន៍ចំនួន ៤៩៤ នាក់ ក្នុងនោះ ស្រី្ត ២៤៣ នាក់៕
