មន្ត្រីតុលាការមួយចំនួនបានអះអាងថា វិធានដោះលែងទណ្ឌិតតាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារ បានដំណើរមួយជំហានហើយ តែមិនទាន់ឈានដល់ដំណាក់កាលដោះលែងនៅឡើយ។
ក្រសួងយុត្តិធម៌ កាលពីថ្ងៃទី១៤ ខែកក្កដា ឆ្នាំ២០២១ បានចេញប្រកាសមួយ «ស្តីពីបែបបទនៃការឃ្លាំមើលតាមដានការត្រួតពិនិត្យ និងការបញ្ជូនទៅក្នុងសង្គមវិញនៃទណ្ឌិតដែលត្រូវបានដោះលែងដោយមានលក្ខខណ្ឌ»។
ប្រការ២នៃសេចក្តីប្រកាសនេះ ក្រសួងលើកឡើងថា ការដោះលែងដោយមានលក្ខខណ្ឌ គឺជាសមត្ថកិច្ចរបស់សាលាដំបូងរាជធានី-ខេត្តនីមួយៗ។
សេចក្តីសម្រេចដដែលបញ្ជាក់ថា «ប្រធានសាលាដំបូង សម្រេចអំពីការដោះលែង ដោយមានលក្ខខណ្ឌ តាមដីកាសម្រេចដោយសម្អាងហេតុ បន្ទាប់ពីទទួលបានយោបល់ពីគណៈកម្មកាជាតិដោះលែងដោយមានលក្ខខណ្ឌ ស្របតាមមាត្រា៥១៤ មាត្រា៥១៥ និងមាត្រា៥១៦ នៃក្រមព្រហ្មទណ្ឌ។ ប្រធានសាលាដំបូង មិនជាប់ជំពាក់នឹងយោបល់របស់គណៈកម្មការជាតិនោះទេ»។
ប្រធានសាលាដំបូងខេត្តព្រះវិហារលោក យុត ពន្លឺ ប្រាប់ វីអូឌី នៅថ្ងៃសុក្រនេះថា យន្តការនៃការដោះលែងទណ្ឌិតឱ្យនៅក្រៅឃុំតាមលក្ខខណ្ឌច្បាប់ ក្រុមការងាររបស់លោក បានដំណើរការទៅមួយជំហានហើយ តែមិនទាន់ឈានដំណាក់កាលនៃការដោះលែងទេ។
លោកថា៖ «មិនទាន់ធ្វើបានទេ ព្រោះទើបនឹងចាត់តាំងគណៈកម្មការត្រួតពិនិត្យមនុស្ស ដែលត្រូវដោះលែង […] ព្រោះអាយន្តការដោះលែងនេះវាថ្មី អីចឹងចាំមើលគេ [គណៈកម្មការជាតិដោះស្រាយតាមលក្ខខណ្ឌច្បាប់] ណែនាំ។ ប៉ុន្តែយើងបានរៀបចំបានមួយជំហានហើយ»។
អ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ សុំមិនអត្ថាធិប្បាយលម្អិតរឿងនេះទេ ដោយគ្រាន់តែបញ្ជាក់ថា នឹងមានកិច្ចប្រជុំឆាប់ៗ ដើម្បីពិភាក្សាលើយន្តការនេះ។
អ្នកនាំពាក្យសាលាដំបូងខេត្តកំពង់ឆ្នាំង និងជាព្រះរាជអាជ្ញារងលោក ឡុង ស៊ីថា មានប្រសាសន៍ថា មានការណែនាំពីគណៈកម្មការជាតិដោះលែងទណ្ឌិតតាមលក្ខខណ្ឌច្បាប់ហើយ ប៉ុន្តែលោកមិនទាន់ដឹងថា មានទណ្ឌិតប៉ុន្មាននាក់ នឹងត្រូវដោះលែងនោះទេ ដោយថា មន្ត្រីពាក់ព័ន្ធទើបនឹងចាប់ផ្តើមសិក្សាទៅលើយន្តការថ្មីនេះ។
លោកថា៖ «មានការណែនាំហើយ [មានទណ្ឌិតប៉ុន្មានអាចនឹងត្រូវបានដោះលែងតាមលក្ខខណ្ឌនេះលោក?] យើងអត់ទាន់ដឹង ព្រោះគណៈកម្មការកំពុងតែរៀបចំអត់ទាន់ដឹងព័ត៌មានទេ ចាំខ្ញុំផ្តល់ព័ត៌មានបន្ថែមនៅពេលក្រោយ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា យន្តការនេះមិនគួរត្រូវពន្យារពេលទៀតទេ ខណៈកម្ពុជាកំពុងប្រឈមនឹងជំងឺកូវីដ-១៩ បំប្លែងថ្មីប្រភេទDelta នោះ ព្រោះក្រសួងយុត្តិធម៌ បានសម្រេចបើកផ្លូវឱ្យអនុវត្តវិធាននេះហើយ។
លោកបារម្ភថា ការអូសបន្លាយយន្តការដោះស្រាយភាពចង្អៀតណែនក្នុងពន្ធនាគារនេះ អាចនឹងធ្វើឱ្យអ្នកជាប់ឃុំជួបហានិភ័យ បើមន្ត្រីពន្ធនាគារមិនអាចទប់ស្កាត់មេរោគបំប្លែងថ្មីនេះបានទៀតនោះ។
លោកអំ សំអាត ថ្លែងថា៖ «ភាពចង្អៀតណែនក្នុងពន្ធនាគារ បើសិនជាមានការរាលដាលអាបំប្លែងថ្មីនេះទៀត វាកាន់តែយាប់ ហើយហានិភ័យវាកាន់តែខ្ពស់បន្ថែមទៅទៀត បន្ថែមពីលើអាការរីករាលដាលក្នុងពន្ធនាគារកន្លងមក»។
យ៉ាងណាក៏ដោយ លោក អំ សំអាត បានផ្តល់ជាយោបល់ថា យន្តការនេះមិនត្រូវពន្យារពេលទៀតទេ។ លោកថា ក្រៅពីទណ្ឌិតដែលអនុវត្តទោសជិតចប់ វិធានដោះលែងទណ្ឌិតដែលមានលក្ខខណ្ឌនេះ គួរតែផ្តោតលើជនជាប់ចោទដែលមានអាទិភាពមួយចំនួនទៀត ដូចជា អ្នកជាប់ឃុំទោសស្រាលៗ ស្ត្រីមានផ្ទៃពោះ និងស្ត្រីដែលមានកូនតូចនៅជាមួយផងដែរ។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សវនា ធ្លាប់ប្រាប់ VOD ថា អ្នកជាប់ឃុំសរុបនៅទូទាំងប្រទេសមានជិត ៤០ ០០០ នាក់។
ដោយឡែកអង្គការលើកលែងទោសអន្តរជាតិ (Amnesty International) កាលពីដើមឆ្នាំមុន បានបង្ហាញរបាយការណ៍មួយថា គិតត្រឹមខែមីនា ឆ្នាំ២០២០ អ្នកជាប់ឃុំនៅទូទាំងប្រទេសជិត ៤០ ០០០ នាក់ ខណៈពន្ធនាគាររបស់កម្ពុជាអាចដាក់អ្នកជាប់ឃុំបានប្រមាណ ២៦ ០០០ នាក់តែប៉ុណ្ណោះ។
អង្គការអន្តរជាតិនេះបញ្ជាក់ថា៖ «វិបត្តិនៃការចង្អៀតណែនក្នុងពន្ធនាគារនេះ កំពុងបង្កឱ្យមានការរំលោភបំពានយ៉ាងធ្ងន់ធ្ងរ និងលក្ខណៈជាប្រព័ន្ធ»៕