ក្រសួងសុខាភិបាលក្រើនរំឭកជាថ្មីទៀតដល់គ្រប់អង្គភាពនិងអាជ្ញាធរពាក់ព័ន្ធ រួមទាំងប្រជាពលរដ្ឋ ត្រូវអនុវត្តវិធានការចាំបាច់ៗនានាដែលបានដាក់ចេញដោយរដ្ឋាភិបាល ដើម្បីទប់ស្កាត់កុំឱ្យមានការឆ្លងជំងឺកូវីដ-១៩បំប្លែងថ្មី និងការបាត់បង់អាយុជីវិតពលរដ្ឋដោយសារជំងឺនេះបន្តទៀត។
ការក្រើនរំឭកនេះបានធ្វើឡើងនៅក្នុងសេចក្តីជូនព័ត៌មានរបស់ក្រសួងសុខាភិបាលស្តីពីយុទ្ធនាការជាតិ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩» បានឱ្យដឹងនៅថ្ងៃទី១៦ ខែសីហានេះ។
សេចក្តីជូនព័ត៌មានរបស់ក្រសួងបានលើកឡើងថា អនុគណៈកម្មការអប់រំ បណ្តុះបណ្តាល និងទំនាក់ទំនងសាធារណៈ (អ.ប.ទ) នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ បានចាប់ផ្តើមធ្វើយុទ្ធនាការជាតិក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩» ក្នុងគោលបំណងដើម្បីក្រើនរំឭក ពញ្ញាក់ស្មារតី និងបង្កើនការជំរុញនូវការចូលរួមរបស់បុគ្គល គ្រួសារ និងសហគមន៍ ព្រមទាំងប្រជាពលរដ្ឋ ស្ថាប័ន-ក្រសួងពាក់ព័ន្ធ អង្គភាពសាធារណៈដទៃទៀត អាជ្ញាធរមូលដ្ឋានគ្រប់លំដាប់ថ្នាក់ មន្ទីរ អង្គភាពជំនាញនានា អង្គការជាតិ-អន្តរជាតិ និងសេវាឯកជនទាំងអស់ ពួតដៃរួមគ្នាអនុវត្តវិធានការចាំបាច់ៗនានាដែលបានដាក់ចេញដោយលោកនាយករដ្ឋមន្ត្រី ហ៊ុន សែន ។
ក្រសួងបញ្ជាក់ថា កន្លងមក ប្រជាពលរដ្ឋទាំងអស់បានចូលរួមទប់ស្កាត់ការរីករាលដាលនៃវីរុសកូវីដ-១៩ ជាពិសេសពពួកបំប្លែងថ្មី ដូចជា “អាល់ហ្វា” និង “ដែលតា” ជាដើម។
ប៉ុន្តែក្រសួងសុខាភិបាលអំពាវនាវទៅពលរដ្ឋនិងស្ថាប័នពាក់ព័ន្ធទាំងអស់ត្រូវបន្តចូលរួមបន្ថែមទៀត ដោយអនុវត្តវិធានការ «៣ការពារ ៣កុំ» ដែលរដ្ឋាភិបាលដាក់ចេញកាលពីពាក់កណ្តាលខែធ្នូ ឆ្នាំ២០២០ ឱ្យក្លាយទៅជាការអនុវត្តជាក់ស្តែងពិតប្រាកដបន្ថែមទៀត ប្រកបដោយស្មារតីទទួលខុសត្រូវខ្ពស់ ទើបទប់ស្កាត់ការឆ្លងនិងការបាត់បង់អាយុជីវិតពលរដ្ឋបន្តទៀត ។
បន្ថែមពីនេះ ក្រសួងក៏បានណែនាំដល់ប្រជាពលរដ្ឋទាំងអស់ត្រូវចូលរួមតាមដាននិងរាយការណ៍ជាបន្ទាន់ដល់អាជ្ញាធរមូលដ្ឋាន ចំពោះអ្នកដែលត្រឡប់មកពីកន្លែងមានហានិភ័យខ្ពស់ឬមកពីក្រៅប្រទេស ដែលទាមទារឱ្យធ្វើចត្តាឡីស័កពេញលេញត្រឹមត្រូវគ្រប់ពេលវេលាដែលបានកំណត់ផងដែរ។
ដោយឡែក អភិបាលរាជធានី-ខេត្តទាំងអស់ត្រូវបន្តធ្វើយុទ្ធនាការផ្សព្វផ្សាយតាមទូរទស្សន៍ វិទ្យុ បណ្តាញសង្គម បោះពុម្ព ចែកចាយសម្ភារអប់រំសុខភាពឱ្យបានទូលំទូលាយ ជាពិសេសនៅសហគមន៍ដែលងាយរងគ្រោះនិងសហគមន៍ក្រីក្រជាដើម។
ចំពោះវិស័យឯកជន អង្គការជាតិនិងអន្តរជាតិ ត្រូវចូលរួមគាំទ្រនូវសកម្មភាពយុទ្ធនាការជាតិនេះ ដោយបន្តធ្វើការផ្សព្វផ្សាយសារឱ្យបានជាប្រចាំតាមគ្រប់មធ្យោបាយដល់បុគ្គលិកនិងស្ថាប័នរបស់ខ្លួនឱ្យអនុវត្តវិធានការសុខាភិបាល ឬផលិត ឬបិទផ្ទាំងរូបភាព ឬចាក់មេក្រូផ្សាយ ទាក់ទងនឹងការបង្ការទប់ស្កាត់ការឆ្លងវីរុសកូវីដ-១៩ ដើម្បីកាត់ផ្តាច់ការចម្លងពីបុគ្គលម្នាក់ទៅបុគ្គលម្នាក់ ជាពិសេសបញ្ចៀសនូវការរាតត្បាតជាលក្ខណៈទ្រង់ទ្រាយធំក្នុងប្រទេសកម្ពុជា។
បើតាមក្រសួងសុខាភិបាល គិតត្រឹមព្រឹកថ្ងៃចន្ទនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៨៦ ០៤១នាក់ ក្នុងនោះ អ្នកជំងឺព្យាបាលជាសះស្បើយចំនួន៨១ ២០២នាក់ អ្នកស្លាប់កើនដល់ចំនួន១ ៧០៤នាក់ និងករណីនាំចូលពីក្រៅប្រទេសចំនួន១៣ ១១៨នាក់៕
