រដ្ឋបាលរាជធានីភ្នំពេញ បន្តបិទខ្ទប់ភូមិ៥ សង្កាត់បឹងសាឡាង ខណ្ឌទួលគោក ចំនួន៧ថ្ងៃបន្ថែមទៀត ដោយគិតចាប់ពីម៉ោងសូន្យ នាថ្ងៃទី១៧ ដល់ថ្ងៃទី២៣ ខែសីហា ឆ្នាំ២០២១នេះ ដើម្បីទប់ស្កាត់និងកាត់ផ្ដាច់ការឆ្លងរាលដាលនូវមេរោគបំប្លែងខ្លួនថ្មីប្រភេទ “ដែលតា” (Delta) ក្នុងសហគមន៍។
យោងតាមសេចក្តីសម្រេចរបស់រដ្ឋបាលរាជធានីភ្នំពេញ នៅថ្ងៃទី១៦ ខែសីហា ឆ្នាំ២០២១នេះ បានសម្រេចបន្តបិទច្រកផ្លូវលេខ៣៧២ ៣៧២Z និងផ្លូវលេខ៣៦២ ស្ថិតក្នុងភូមិ៥ សង្កាត់បឹងសាឡាង។
សេចក្តីសម្រេចដដែលបន្តថា ក្នុងអំឡុងពេលនៃការអនុវត្តវិធានការបិទខ្ទប់នេះ ហាមប្រជាពលរដ្ឋរស់ក្នុងទីតាំងទាំងនេះចេញ-ចូល និងជួបជុំឬប្រមូលផ្ដុំមនុស្សច្រើន ប៉ុន្តែលើកលែងកត្តាមួយចំនួនដូចជា ការចេញ-ចូលដោយមូលហេតុសុខភាពបន្ទាន់ ផ្ដល់វត្ថុសំណាកធ្វើតេស្តរកជំងឺកូវីដ-១៩តាមការណែនាំរបស់អាជ្ញាធរមូលដ្ឋាន ការវិលត្រឡប់ទៅលំនៅឋានបន្ទាប់ពីបញ្ចប់ការធ្វើចត្តាឡីស័ក និងអ្នកជំងឺចេញពីមន្ទីរពេទ្យ ជាដើម។
បន្ថែមពីនេះ ការចេញ-ចូលនិងការជួបជុំរបស់បុគ្គលិកសុខាភិបាល និងអាជ្ញាធរមានសមត្ថកិច្ច ដើម្បីអនុវត្តវិធានការសុខាភិបាលនិងផ្គត់ផ្គង់គ្រឿងឧបភោគបរិភោគចាំបាច់ និងការចេញ-ចូលនិងការជួបជុំរបស់អាជ្ញាធរមានសមត្ថកិច្ចនិងកម្លាំងគណៈបញ្ជាការឯកភាពរដ្ឋបាលគ្រប់លំដាប់ថ្នាក់ ក៏ត្រូវបានអនុញ្ញាតដែរ។
រដ្ឋបាលរាជធានីភ្នំពេញ បន្តថា៖ «បុគ្គលឬនីតិបុគ្គលទាំងឡាយណាដែលមិនអនុវត្តតាមប្រការ២នៃសេចក្ដីសម្រេចនេះ នឹងត្រូវកសាងសំណុំរឿងបញ្ជូនទៅស្ថាប័នតុលាការ ដើម្បីផ្ដន្ទាទោសដាក់ពន្ធនាគារនិងពិន័យជាប្រាក់ស្របតាមមាត្រា១០ និងមាត្រា១១ នៃច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងៗទៀត និងលិខិតបទដ្ឋានគតិយុត្តពាក់ព័ន្ធជាធរមាន»៕
