ក្រុមឈ្មួញមួយចំនួនដែលនាំទំនិញនិងផ្លែឈើទៅលក់នៅប្រទេសជិតខាង បន្តត្អូញត្អែរពីការខាតបង់ប្រាក់និងខូចខាតទំនិញ ខណៈប្រទេសថៃនិងវៀតណាមនៅបន្តបិទមិនឱ្យពួកគេនាំទំនិញទាំងនោះចូលប្រទេសរបស់ពួកគេ។
កាលពីថ្ងៃទី១០ ខែសីហា ឆ្នាំ២០២១ ក្រុមឈ្មួញជាច្រើននាក់ដែលនាំចេញផ្លែមៀនប៉ៃលិនពីកម្ពុជាទៅថៃ បាននាំគ្នាតវ៉ាមុខច្រកទ្វារព្រំដែនអន្តរជាតិដូង ខេត្តបាត់ដំបង ដើម្បីសុំទៅអាជ្ញាធរកម្ពុជាឱ្យជួយសម្រួលជាមួយអាជ្ញាធរថៃ ដោយធ្វើយ៉ាងណាឱ្យពួកគេអាចនាំទំនិញចូលប្រទេសនេះបាន ខណៈវៀតណាមក៏បានបិទច្រកមួយចំនួនមិនឱ្យឈ្មួញខ្មែរនាំទំនិញចូលផងដែរ ក្រោមហេតុផលការពារជំងឺកូវីដ-១៩។
លោក ឌីន ដែន ជាឈ្មួញកណ្តាលម្នាក់ដែលនាំយកទំនិញកសិផលផ្លែមៀនប៉ៃលិនទៅលក់ឱ្យក្រុមចិននៅប្រទេសថៃ ប្រាប់ វីអូឌី នៅថ្ងៃចន្ទនេះថា រយៈពេលជិត១សប្តាហ៍ហើយដែលថៃបានបិទមិនឱ្យពួកគាត់នាំមៀនចូលប្រទេសថៃ ហើយបានធ្វើឱ្យពួកគាត់ខូចខាតផ្លែមៀនអស់រាប់រយតោននិងខាតលុយរាប់ម៉ឺនដុល្លារ។ លោកថា បច្ចុប្បន្ន ក្នុងមួយថ្ងៃ មៀនកម្ពុជាត្រូវចេញទៅថៃជាង១០០តោន ដោយក្នុងមួយតោនតម្លៃ១ ០០០ដុល្លារ។
ឈ្មួយកណ្តាលរូបនេះបានអំពាវនាវដល់អាជ្ញាធរកម្ពុជាជួយសម្រួលជាមួយអាជ្ញាធរថៃ ដោយធ្វើយ៉ាងណាឱ្យពួកគេអាចនាំចេញផ្លែមៀនទៅឱ្យក្រុមហ៊ុនចិននៅប្រទេសថៃឱ្យបានឆាប់រហ័ស ដើម្បីកាត់បន្ថយការខាតបង់របស់ពួកគេកាន់តែច្រើនជាងនេះ។
លោកបន្ថែមថា៖ «ខែក្រោយចូលខែ៩ហ្នឹង ងាប់មែនហើយ! ពីព្រោះខែ៩ហ្នឹង មៀនប្រហែល៣០០ទៅ៥០០តោនក្នុងមួយថ្ងៃ។ អ៊ីចឹងខ្ញុំចង់ឱ្យអាជ្ញាធរយើងពន្លឿនក្នុងការចរចាជាមួយអាជ្ញាធរថៃ ដើម្បីជួយដោះស្រាយរឿងនេះ»។
អភិបាលខេត្តបាត់ដំបង លោក ងួន រតនៈ មានប្រសាសន៍ថា បញ្ហាថៃបិទមិនឱ្យឈ្មួញខ្មែរនាំមៀនចូលប្រទេសរបស់គេនោះ គឺពិបាកក្នុងការដោះស្រាយបន្តិច ដោយសារតែការរកស៊ីនោះមិនបានចុះកិច្ចព្រមព្រៀងគ្នារវាងប្រទេសទាំងពីរទេ។ លោកថា ករណីថែបិទនេះ ដើម្បីទប់ស្កាត់ការឆ្លងរាលដាលជំងឺកូវីដ-១៩ ប៉ុន្តែអាជ្ញាធរខេត្តនិងអាជ្ញាធរពាក់ព័ន្ធនឹងព្យាយាមទាក់ទងភាគីថៃ ដើម្បីសម្របសម្រួលដោះស្រាយបញ្ហានេះ។
លោកបន្ថែមថា៖ «ពាក្យថា “សម្របសម្រួលអត់គោលការណ៍” មិនដឹងថា ខាងនោះគេទទួលយកអត់! អានេះគេអ្នកបិទ មិនមែនយើងអ្នកបិទទេ មានន័យថា ថៃគេមិនឱ្យចូលស្រុកគេ។ អ៊ីចឹងយើងមិនដឹងដោះយ៉ាងម៉េច ចាំមើលសិន»។
លោក តឹង យិន នៅឃុំព្រែកត្នោត ស្រុកទឹកឈូ ខេត្តកំពត ដែលជាឈ្មួយនាំទំនិញពីកម្ពុជាទៅប្រទេសវៀតណាម ឱ្យដឹងដែរថា ទំនិញកម្ពុជាបាននិងកំពុងបន្តកកស្ទះយ៉ាងច្រើននៅច្រកព្រំដែនតន់ហន់ និងច្រកព្រែកចាក ដោយសារវៀតណាមបិទមិនឱ្យចូល ប៉ុន្តែសម្រាប់ទំនិញរបស់វៀតណាមនៅតែបន្តនាំចូលកម្ពុជាដោយសេរី។
លោក តឹង យិន ដែលជាអ្នកនាំបង្គារនិងបង្កងទៅវៀតណាម អះអាងថា វៀតណាមបានបិទមិនឱ្យឈ្មួញកម្ពុជានាំទំនិញចូលវៀតណាមតាំងពីថ្ងៃទី១៨ ខែកក្កដា ឆ្នាំ២០២១ រហូតមកពេលនេះមិនទាន់បើកវិញទេ ដែលបណ្តាលឱ្យពួកគាត់កកស្ទះទំនិញនិងខាតបង់ប្រាក់ជាច្រើនផងដែរ។
លោកបន្ថែមថា៖ «អីវ៉ាន់ខ្មែររកបាន លក់អត់ចេញ! ហើយអីវ៉ាន់វៀតណាម ឱ្យគេនាំចូល។ វៀតណាមវាបិទមិនឱ្យយើងចូលសោះ។ បើសិនជាស្ថានភាពកូវីដហ្នឹងកើតឡើងអ៊ីចឹង យើងត្រូវបិទទាំងសងខាង ឱ្យប្រជាពលរដ្ឋវាផ្ទុះការតវ៉ាដូចគ្នា ថាតើវាយ៉ាងម៉េច»។
វីអូឌី មិនអាចសុំការឆ្លើយតបពីអភិបាលខេត្តកំពត លោក ជាវ តាយ និងអ្នកនាំពាក្យរដ្ឋបាលខេត្តកំពត លោក ភូ លិ បានទេ នៅថ្ងៃចន្ទនេះ។
ប៉ុន្តែលោក ភូ លិ ប្រាប់ វីអូឌី កាលពីចុងសប្តាហ៍មុនថា លោកបានឱ្យអាជ្ញាធរស្រុកសុំគោលការណ៍ពីថ្នាក់ខេត្ត ដើម្បីដោះស្រាយបញ្ហានេះហើយ។
ពាក់ព័ន្ធករណីនេះ ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បានជំរុញទៅរដ្ឋាភិបាលនិងអាជ្ញាធរពាក់ព័ន្ធ ត្រូវសម្របសម្រួលចរចាជាមួយប្រទេសជិតខាង ដោយធ្វើយ៉ាងណាឱ្យកសិករឬឈ្មួញកម្ពុជាអាចនាំកសិកផលរបស់ខ្លួនទៅលក់នៅលើទីផ្សាររបស់ប្រទេសទាំងនោះដោយស្មើភាពគ្នា ខណៈទំនិញរបស់ប្រទេសជិតខាងទាំងនោះបាននាំចូលមកកម្ពុជាដោយសេរី ប៉ុន្តែទំនិញរបស់កម្ពុជាបែរជាមិនអាចនាំទៅត្រឡប់ទៅវិញបាន។
លោកបន្តថា ការអនុញ្ញាតឱ្យទំនិញឬផលិតផលរបស់ប្រទេសជិតខាងនាំចូលបាន ប៉ុន្តែទំនិញឬផលិតផលរបស់កសិករខ្មែរមិនអាចនាំចេញទៅប្រទេសជិតខាងបាននោះ ជារឿងអយុត្តិធម៌មួយសម្រាប់ប្រជាពលរដ្ឋខ្មែរ។
លោកបន្ថែមថា៖ «ដើម្បីធានាបានភាពយុត្តិធម៌ទាំងអស់គ្នាក្នុងការចេញចូលនៃទំនិញ ប្រសិនជាយើងបើកឱកាសឱ្យនាំចូលផលិតផលទំនិញ ប៉ុន្តែយើងមិនមានលទ្ធភាពក្នុងការចរចា វាហាក់បីដូចជាយើងចាញ់ប្រៀបគេ។ អ៊ីចឹងធ្វើឱ្យប្រជាពលរដ្ឋបាត់បង់នូវអត្ថប្រយោជន៍ ហើយប្រឈមនឹងបញ្ហា ហើយប្រជាពលរដ្ឋច្បាស់ណាស់ថា នឹងស្តីបន្ទោសទៅលើសមត្ថភាព ក៏ដូចជាការធ្វើការងាររបស់អាជ្ញាធររដ្ឋ ទាក់ទងនឹងការផ្តល់សេវាសាធារណៈ និងការសម្រួលសម្រួលរកទីផ្សារលក់ទំនិញ និងស្វែងរកដំណោះស្រាយជូនពួកគាត់ហ្នឹង»។
កាលពីថ្ងៃទី១២ ខែសីហា ឆ្នាំ២០២១ ក្រសួងកសិកម្ម រុក្ខាប្រមាញ់ និងនេសាទ បានណែនាំដល់ឈ្មួញឱ្យបង្វែរទីផ្សារពីការនាំចេញផ្លែមៀនប៉ៃលិន ឬតាងែន ពីប្រទេសថៃទៅកាន់ប្រទេសវៀតណាមវិញ ក្រោយថៃបិទច្រកព្រំដែនមិនឱ្យនាំចូលផ្លែឈើនេះទៅប្រទេសរបស់ខ្លួន ខណៈដែលច្រកព្រំដែនមួយចំនួនក៏វៀតណាមបិទមិនឱ្យឈ្មួញកម្ពុជានាំទំនិញចូលដែរ៕
