រដ្ឋាភិបាលកម្ពុជាប្រកាសបរិច្ចាគប្រាក់ចំនួន២០ម៉ឺនដុល្លារ និងឧបករណ៍វេជ្ជសាស្ត្រមួយចំនួនបន្ថែមទៀត ដល់ប្រទេសមីយ៉ាន់ម៉ា ដើម្បីប្រយុទ្ធប្រឆាំងនឹងជំងឺកូវីដ-១៩ក្នុងប្រទេសនោះ។
យោងតាមលិខិតរបស់នាយករដ្ឋមន្រ្ដីកម្ពុជា លោក ហ៊ុន សែន ផ្ញើជូនប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា លោក មីង អោងឡាំង នៅថ្ងៃទី១៧ ខែសីហា ឆ្នាំ២០២១នេះ បានលើកឡើងថា ក្នុងស្មារតីមិត្តភាពនិងសាមគ្គីភាពរវាងកម្ពុជានិងមីយ៉ាន់ម៉ា កម្ពុជាសម្រេចឧបត្ថម្ភជាសាច់ប្រាក់ចំនួន២០ម៉ឺនដុល្លារអាមេរិក បន្ថែមពីលើការសន្យារបស់កម្ពុជាដែលឧបត្ថម្ភទឹកប្រាក់ចំនួន១០ម៉ឺនដុល្លារ សម្រាប់ជំនួយមនុស្សធម៌អាស៊ាន ជួយដល់ប្រទេសមីយ៉ាន់ម៉ា តាមរយៈមជ្ឈមណ្ឌលអាស៊ានសម្រាប់សម្របសម្រួលជំនួយមនុស្សធម៌។
លិខិតដដែលបន្តថា កម្ពុជាក៏បរិច្ចាគនូវឧបករណ៍វេជ្ជសាស្រ្តមួយចំនួនផងដែរ រួមមាន ម៉ាស់ចំនួន៣លាន តេស្តរហ័សចំនួន៥០០ ០០០គ្រឿង សម្លៀកបំពាក់សុវត្ថិភាព (PPE) ចំនួន២ ០០០ឈុត ម៉ាស៊ីនផលិតអុកស៊ីសែនស្វ័យប្រវត្តិចំនួន១០០គ្រឿង ម៉ាស៊ីនជំនួយដកដង្ហើមចំនួន២០គ្រឿង និងម៉ាស៊ីនតាមដានសញ្ញាជីវិតចំនួន២០គ្រឿង។
លោក ម៉ម ប៉ុនហេង រដ្ឋមន្រ្ដីក្រសួងសុខាភិបាលកម្ពុជា និងជាប្រធានគណៈកម្មាធិការអន្តរក្រសួងដើម្បីប្រយុទ្ធប្រឆាំងនឹងជំងឺកូវីដ-១៩ នឹងដឹកនាំគណៈប្រតិភូមួយក្រុមដើម្បីប្រគល់ជូនអំណោយទាំងនេះ តាមជើងហោះហើរពិសេសដែលនឹងត្រូវរៀបចំឡើងទៅទីក្រុងណៃពិដោ ប្រទេសមីយ៉ាន់ម៉ា ក្នុងពេលឆាប់ៗនេះ។
ជាមួយគ្នានេះ លោកនាយករដ្ឋមន្ត្រី ហ៊ុន សែន ក៏បានបង្ហាញការជឿជាក់ថា ជាមួយនឹងកិច្ចខិតខំប្រឹងប្រែងរួមគ្នានេះ ប្រទេសទាំងពីរនឹងយកឈ្នះលើជំងឺរាតត្បាតសកលនេះទាំងស្រុង៕