រដ្ឋាភិបាលអូស្ត្រាលី ប្រកាសគាំទ្រកម្ពុជាក្នុងការធ្វើជាប្រធាននៃកិច្ចប្រជុំកំពូលអាស៊ាននាពេលខាងមុខ និងបន្តគាំទ្រផ្នែកបច្ចេកទេសនិងហិរញ្ញវត្ថុសម្រាប់កិច្ចអភិវឌ្ឍន៍នៅកម្ពុជាស្ទើរគ្រប់វិស័យ។
ការប្រកាសនេះធ្វើឡើងនៅក្នុងជំនួបពិភាក្សាការងាររវាងលោក អូន ព័ន្ធមុនីរ័ត្ន ឧបនាយករដ្ឋមន្រ្ដី រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ និងជាប្រធានឧត្ដមក្រុមប្រឹក្សាសេដ្ឋកិច្ចជាតិ ជាមួយលោក Pablo Kang ឯកអគ្គរាជទូតនៃប្រទេសអូស្រ្ដាលីប្រចាំប្រទេសកម្ពុជា តាមរយៈប្រព័ន្ធ Video Conference កាលពីថ្ងៃទី១៨ ខែសីហា ឆ្នាំ២០២១។
យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុកម្ពុជា បានលើកឡើងថា ក្នុងជំនួបនោះ លោកឯកអគ្គរាជទូតអូស្រ្ដាលីបានលើកឡើងនូវសំណើគាំទ្រដល់កម្ពុជាលើកិច្ចការមួយចំនួនបន្ថែមទៀត រួមមាន ការសិក្សាបុរេសមិទ្ធិក្នុងការបង្កើតសួនកសិ-ឧស្សាហកម្ម កម្មវិធីពន្លកចំណេះ និងការគាំទ្រដល់កម្ពុជាក្នុងការធ្វើជាប្រធាននៃកិច្ចប្រជុំកំពូលអាស៊ាននាពេលខាងមុខនេះ។
សេចក្ដីប្រកាសព័ត៌មានដដែលបន្តថា អូស្រ្ដាលីក៏នឹងបន្តជួយកម្មវិធីអភិវឌ្ឍន៍៥ឆ្នាំបន្ទាប់ ដែលមានថវិកាប្រមាណ៩០លានដុល្លារអូស្រ្ដាលី សម្រាប់វិស័យអាទិភាពសំខាន់ៗមួយចំនួនផងដែរ។
ជាការឆ្លើយតប លោក អូន ព័ន្ធមុនីរ័ត្ន បានសម្ដែងនូវក្ដីរីករាយនិងការគាំទ្រចំពោះសំណើបន្តផ្តល់ជំនួយហិរញ្ញវត្ថុនិងបច្ចេកទេសបន្ថែមដល់កម្ពុជា និងកម្មវិធីអភិវឌ្ឍន៍ក្នុងជំហានបន្ទាប់ ពីសំណាក់រដ្ឋាភិបាលអូស្ត្រាលី។ យ៉ាងណា លោកក៏បានបញ្ជាក់ថា អាទិភាពដែលរដ្ឋាភិបាលកម្ពុជាកំពុងផ្ដោតសំខាន់នោះ រួមមាន ការប្រយុទ្ធប្រឆាំងនឹងការរីករាលដាលជំងឺកូវីដ-១៩ និងការកសាងសមត្ថភាពកម្ពុជា ដើម្បីអាចរស់នៅជាមួយជំងឺកូវីដ-១៩ ក្នុងរយៈពេលមធ្យមនិងវែង។
បន្ថែមពីនេះ លោកថា អំឡុងពេលនេះ រាជរដ្ឋាភិបាលកម្ពុជាក៏កំពុងរៀបចំផែនការស្ដារសេដ្ឋកិច្ចឡើងវិញក្រោយវិបត្តិកូវីដ-១៩ ដោយផ្ដោតលើគោលការណ៍គន្លឹះចំនួន៣ រួមមាន ការងើបឡើងវិញ កំណែទម្រង់ និងភាពធន់ (៣Rs) ក្នុងការគាំទ្រវិស័យអទិភាពជាច្រើន ជាពិសេសវិស័យដែលរងផលប៉ះពាល់ខ្លាំងដោយវិបត្តិជំងឺកូវីដ-១៩។ ជាមួយគ្នានេះ លោកថា ជំនួយហិរញ្ញវត្ថុនិងបច្ចេកទេសរបស់រដ្ឋាភិបាលអូស្រ្ដាលី មានលក្ខណៈស្របគ្នាទៅនឹងអាទិភាពគោលនយោបាយរបស់រដ្ឋាភិបាល៕