ពលរដ្ឋមួយចំនួននៅសង្កាត់បឹងកក់ទី១ ខណ្ឌទួលគោក រាជធានីភ្នំពេញ អះអាងថា អាជ្ញាធរបានផ្អាកការរុះរើរបងផ្ទះនិងផលដំណាំរបស់ពួកគេ ក្រោយពីបានជួបប្រជុំជាមួយពលរដ្ឋកាលពីថ្ងៃម្សិលមិញ ប៉ុន្តែពួកគេនៅតែព្រួយបារម្ភខ្លាចអាជ្ញាធរមិនគោរពតាមការសន្យារបស់ខ្លួន។
ការអះអាងរបស់ប្រជាពលរដ្ឋ ចំថ្ងៃដែលអាជ្ញាធរខណ្ឌទួលគោកដាក់ឱសានវាទឱ្យពួកគេរុះរើរបងនិងដំណាំនៅថ្ងៃទី១៩ ខែសីហានេះ និងបានព្រមានចុះអនុវត្តតាមច្បាប់ ដោយមិនទទួលខុសត្រូវចំពោះការខូចខាតឬបាត់បង់ទ្រព្យសម្បត្តិរបស់ពលរដ្ឋទាំងនោះផងដែរ។
ពលរដ្ឋម្នាក់រស់នៅភូមិ១៤ លោក សំ ចំរ៉ុង ប្រាប់ វីអូឌី នៅថ្ងៃព្រហស្បតិ៍នេះថា ប្រជាពលរដ្ឋយល់ព្រមបើកផ្លូវឱ្យអាជ្ញាធរធ្វើផ្លូវនិងស្ដារប្រឡាយ ប៉ុន្តែមិនអនុញ្ញាតឱ្យរុះរើរបងផ្ទះនិងផលដំណាំឡើយ ដោយទាមទារឱ្យអាជ្ញាធរធ្វើបណ្ណកម្មសិទ្ធិជូនពលរដ្ឋជាមុន។ លោកបន្តថា ការយល់ព្រមរបស់ប្រជាពលរដ្ឋនេះ បន្ទាប់ពីអាជ្ញាធរបានហៅពួកគាត់ទៅជួបនៅខណ្ឌទួលគោក កាលពីថ្ងៃម្សិលមិញ ដើម្បីស្វែងរកដំណោះស្រាយ។
លោកថា៖ «ពេលប្រជុំ យើងបាននិយាយអស់ហើយ គេ [អាជ្ញាធរ] ក៏បានធ្វើតាមសំណូមពរយើងដែរ។ យើងត្រូវដោះស្រាយតាមវិធីឈ្នះៗទាំងអស់គ្នា។ វាមិនទាន់ចប់ទេ! ប៉ុន្តែយើងសុំឱ្យគេយកតាមសំណូមពរយើង ទៅដល់ថ្នាក់លើសាលាក្រុងអ៊ីចឹង។ ពួកខ្ញុំជួយឱ្យប្រឡាយផ្លូវមុខ គឺឱ្យធ្វើ ឱ្យរដ្ឋកសាង! សុំតែកណ្ដាលទេ! អ៊ីចឹងយកពាក្យទៅពិភាក្សាសាលាក្រុង»។
បុរសវ័យ៥៧ឆ្នាំរូបនេះបន្តថា ទោះបីជាអាជ្ញាធរអះអាងថាមិនរុះរើផ្ទះប្រជាពលរដ្ឋក៏ដោយ ប៉ុន្តែពួកគាត់នៅតែព្រួយបារម្ភ ដោយខ្លាចអាជ្ញាធរមិនគោរពតាមការសន្យាឬការព្រមព្រៀងជាមួយប្រជាពលរដ្ឋ។
លោកថា៖ «អ៊ីចឹងព្រួយបារម្ភ ចេះតែព្រួយហើយ! ប៉ុន្តែប្រជាជននៅការពារហ្នឹងរហូត! បើហ៊ានប៉ះអ្វីហួសកំណត់ដែលអ្វីប្រជាជនឱ្យនោះ ប្រជាជននឹងដុតកង់ឡាននិងដុតគ្រឿងចក្រហ្នឹងមិនឱ្យឈូសឆាយ ប្រើអំពើហិង្សា មានតែប៉ុណ្ណឹង»។
អភិបាលខណ្ឌទួលគោក លោក ឯក ឃុនដឿន មានប្រសាសន៍ថា ប្រជាពលរដ្ឋទាំងនោះបានចូលកាន់កាប់ដីអាងស្តុកទឹក ប៉ុន្តែអាជ្ញាធរបានដោះស្រាយហើយ តែចំពោះព័ត៌មានលម្អិត លោកបង្វែរឱ្យទៅសួរខាងចៅសង្កាត់បឹងកក់១វិញ។
លោកថា៖ «គេបានដោះចប់ហើយ ប្រជាជនឈប់តវ៉ាហើយ! នៅតែបងតើអ្នកសួរ! តើបងចុះទៅជួបអ្នកស្រុកនៅ? បងសួរទៅសង្កាត់ [មើលតាម]លិខិតហ្នឹង លិខិតជូនដំណឹងរបស់សាលាសង្កាត់ បងអានឱ្យច្បាស់»។
ចៅសង្កាត់បឹងកក់ទី១ លោក វ៉ិត ដារិទ្ធ មានប្រសាសន៍ថា អាជ្ញាធរបានសម្របសម្រួល ហើយកំពុងធ្វើការដោះស្រាយជូនប្រជាពលរដ្ឋ។
លោកថា៖ «ពាក់ព័ន្ធនឹងកិច្ចការងារហ្នឹង ដើម្បីឱ្យបងប្អូនចង់រៀបចំអាហ្នឹង ដើម្បីឱ្យរាជរដ្ឋាភិបាល ក៏ដូចជាក្រុមការងារសាលារាជធានីភ្នំពេញ សុំប្រទានកម្ម ដើម្បីធ្វើការរៀបចំតំបន់នេះជាតំបន់អភិវឌ្ឍន៍ ឱ្យបងប្អូនរស់នៅនោះទាំងអស់គ្នា ទាំងតូចទាំងធំត្រូវចេះចែករំលែក ធ្វើម៉េចឱ្យមានប្លង់កម្មសិទ្ធិទាំងអស់គ្នា។ ទី២ ឥលូវនេះ យើងបានគូសចេញជាប្លង់ដោយមានការឯកភាពគ្នាពីសាលារាជធានីភ្នំពេញ មន្ទីរជំនាញ ហើយបងប្អូនមួយចំនួនបានផ្ដិតមេដៃសុំប្លង់កម្មសិទ្ធិហើយ តែប៉ុណ្ណឹង»។
កាលពីថ្ងៃទី១៦ ខែសីហា ឆ្នាំ២០២១ រដ្ឋបាលខណ្ឌទួលគោក បានចេញសេចក្តីជូនដំណឹងមួយដោយតម្រូវឱ្យប្រជាពលរដ្ឋប្រមាណ៦០គ្រួសារ រស់នៅតំបន់អាងស្ដុកទឹកទួលគោកទី២ និងតាមបណ្ដោយផ្លូវរថភ្លើង ស្ថិតក្នុងភូមិ១៤ សង្កាត់បឹងកក់ទី១ ត្រូវប្រញាប់ដករបងនិងដើមចេកចេញ ក្នុងរយៈពេល៣ថ្ងៃ ចាប់ពីថ្ងៃទី១៦ ដល់ថ្ងៃទី១៩ ខែសីហានេះ។
សេចក្តីជូនដំណឹងនោះបញ្ជាក់ថា អាជ្ញាធរខណ្ឌយកទីតាំងដីនោះធ្វើការអភិវឌ្ឍនៅនឹងកន្លែង ទៅតាមគោលនយោបាយរបស់រដ្ឋាភិបាល ដោយរៀបចំធ្វើបណ្ណកម្មសិទ្ធិជូនពលរដ្ឋដែលមានទទឹង៤ម៉ែត្រនិងបណ្ដោយ១០ម៉ែត្រសម្រាប់គ្រួសារនីមួយៗ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស របស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ជំរុញឱ្យអាជ្ញាធរពន្លឿនការដោះស្រាយជូនប្រជាពលរដ្ឋ ដើម្បីបញ្ចប់ជម្លោះនិងកុំឱ្យកើតមានអំពើហិង្សានៅថ្ងៃក្រោយ។
លោកថា៖ «រហូតមកដល់បច្ចុប្បន្ននេះ គោលការណ៍របស់រាជរដ្ឋាភិបាលគឺពន្លឿនការចុះបញ្ជីដីធ្លីនិងផ្ដល់បណ្ណកម្មសិទ្ធិជូនប្រជាពលរដ្ឋ ដើម្បីកាត់បន្ថយជម្លោះ ដើម្បីចៀសវាងកុំឱ្យមានជម្លោះបន្តទៀត។ អាហ្នឹងជារឿងមួយដែលអាជ្ញាធរគួរពន្លឿនយន្តការក្នុងការផ្ដល់បណ្ណកម្មសិទ្ធិដល់ពួកគាត់។ ទី២ បើសិនជាពន្យារបន្តទៀត វាជាការធ្វើឱ្យអាជ្ញាធរមានការលំបាកទៅវិញទេ និងរវល់ ហើយវាអត់បានផលប្រយោជន៍សម្រាប់ទាំងអស់គ្នា សម្រាប់ភាគីទាំងសងខាង»។
បើតាមពលរដ្ឋរស់នៅភូមិ១៤ លោក សំ ចំរ៉ុង អះអាងថា ប្រជាពលរដ្ឋ៦០គ្រួសារនឹងមិនចាកចេញពីដីដែលកំពុងរស់នៅបច្ចុប្បន្ន ដោយសារពួកគេទាំងអស់គ្នាបានរស់នៅយូរឆ្នាំមកហើយ៕
