រាជរដ្ឋាភិបាលសម្រចផ្អាកការជ្រើសរើសមន្រ្តីថ្មីចូលក្របខណ្ឌការងារនៅគ្រប់ក្រសួង-ស្ថាប័នសម្រាប់ឆ្នាំ២០២២ លើកលែងតែក្រសួងសុខាភិបាលមួយប៉ុណ្ណោះ ក្រោយមានការអូសបន្លាយនៃវិបត្តិជំងឺកូវីដ-១៩។
នៅក្នុងលិខិតរបស់លោក អូន ព័ន្ធមុនីរ័ត្ន ឧបនាយករដ្ឋមន្រ្ដី រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ ផ្ញើជូនរដ្ឋមន្ត្រីក្រសួងមុខងារសាធារណៈ ចុះថ្ងៃទី១៨ ខែសីហា ឆ្នាំ២០២១នេះ បានលើកឡើងថា ក្នុងបរិការណ៍នៃការអូសបន្លាយវិបត្តិជំងឺកូវីដ-១៩ ពិសេសព្រឹត្តិការណ៍សហគមន៍២០កុម្ភៈ និងចំណាររបស់នាយករដ្ឋមន្ត្រី រដ្ឋាភិបាលបានសម្រេចផ្អាកជ្រើសរើសក្របខណ្ឌមន្រ្ដីថ្មីគ្រប់ក្រសួង-ស្ថាប័ន រួមមាន គ្រូបង្រៀន កងកម្លាំងប្រដាប់អាវុធគ្រប់ប្រភេទ និងរដ្ឋបាលថ្នាក់ក្រោមជាតិ លើកលែងតែក្រសួងសុខាភិបាល។
ការសម្រេចផ្អាកជ្រើសរើសមន្ត្រីក្របខណ្ឌក្រសួង-ស្ថាប័នឆ្នាំ២០២២នេះ ធ្វើឡើងស្របគ្នានឹងការព្យាករអំពីការធ្លាក់ចុះនៃសេដ្ឋកិច្ចកម្ពុជាបន្ថែមទៀតនៅក្នុងឆ្នាំ២០២១នេះ ដោយសារវិបត្តិកូវីដ-១៩អូសបន្លាយយូរ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន កាលពីថ្ងៃទី១៧ ខែសីហា បានថ្លែងក្នុងសិក្ខាសាលាមួយថា តាមការព្យាករកំណើនសេដ្ឋកិច្ចកម្ពុជាឆ្នាំ២០២១ អាចសម្រេចបានត្រឹមតែ២,៤ភាគរយតែប៉ុណ្ណោះ ពោលគឺទាបជាងការព្យាករកាលពីដើមឆ្នាំ ដែលមានដល់៤ភាគរយ។
លោក អូន ព័ន្ធមុនីរ័ត្ន បន្តថា ដោយសារការឆ្លងរីករាលដាលនៃជំងឺកូវីដ-១៩នៅក្នុងសហគមន៍បានបន្ទច់បង្អាក់យ៉ាងខ្លាំងដល់សកម្មភាពពាណិជ្ជកម្ម ដែលធ្វើឱ្យវិស័យទេសចរណ៍ វិស័យលក់ដូរ លក់ដុំ លក់រាយ ដែលជាសកម្មភាពប្រើប្រាស់ក្នុងស្រុក វិស័យសំណង់ និងអចលនទ្រព្យ បន្តធ្លាក់ចុះយ៉ាងគំហុក៕