មន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) ប្រចាំខេត្តបន្ទាយមានជ័យ បានបង្ក្រាបករណីអាល់កុលក្លែងក្លាយ ឬមេតាណុល ជិត១តោន ដែលដឹកជញ្ជូនតាមរថយន្តក្រុងកាពីតូល ពីរាជធានីភ្នំពេញ ទៅកាន់ក្រុងប៉ោយប៉ែត។
ប្រធានសាខា ក.ប.ប ប្រចាំខេត្តបន្ទាយមានជ័យ លោក សាន វិជ្ជាសារ៉ាវុទ្ធ បានលើកឡើងនៅថ្ងៃសុក្រនេះថា អាល់កុលក្លែងក្លាយ ឬមេតាណុល ដែលមន្ត្រីជំនាញដកហូតបានកាលពីថ្ងៃម្សិលមិញនោះ មានបរិមាណ៩៦០លីត្រ មានប្រភពដឹកចេញពីខណ្ឌមានជ័យ រាជធានីភ្នំពេញ ទៅកាន់ក្រុងប៉ោយប៉ែត តាមរថយន្តក្រុងកាពីតូល។
តែយ៉ាងណា លោកថា មន្ត្រីជំនាញកំពុងតាមរកអត្តសញ្ញាណម្ចាស់មេតាណុលនេះ ដើម្បីចាត់វិធានការតាមច្បាប់។
លោកមានប្រសាសន៍ថា៖ «ខ្ញុំទើបតែវិភាគបឋមលើកទី១ចប់ វិភាគមន្ទីរពិសោធន៍ខ្នាតតូចរបស់ខ្ញុំ [បើតាមលទ្ធផល] ៩៦០លីត្រហ្នឹង សុទ្ធតែជាអាល់កុលក្លែងក្លាយទាំងអស់ ប៉ុន្តែខ្ញុំអត់ទាន់ចាត់វិធានការទេ ទាល់តែបានលទ្ធផលពីមន្ទីរពិសោធន៍ខ្នាតធំនៅភ្នំពេញមួយទៀត បានខ្ញុំចាត់វិធានការដើម្បីធ្វើកិច្ចការងារបន្ត»។
បើតាមរបាយការណ៍របស់ក្រសួងពាណិជ្ជកម្ម ក្នុងរយៈពេល៥ខែ ឆ្នាំ២០២១នេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានរឹបអូសនិងបំផ្លាញចោលនូវមេតាណុលដែលបន្លំថាជាអាល់កុលចំនួន១០៦តោន បង្គារចាក់ចាហួយចូលចំនួន២០តោន និងរឹបអូសនូវសម្ភារក្លែងក្លាយឬគ្មានគុណភាពតាមស្តង់ដារបានជាង៣០០តោនផងដែរ៕
