លោកនាយករដ្ឋមន្ត្រី ហ៊ុន សែន ណែនាំទៅអាជ្ញាធរឱ្យបន្តពង្រឹងវិធានការទប់ស្កាត់កូវីដ-១៩បំប្លែងថ្មីប្រភេទ “ដែលតា” បើទោះបីជារដ្ឋាភិបាលសម្រេចបញ្ចប់យុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលជំងឺនេះនៅទូទាំងប្រទេសក្រោយអនុវត្តបាន២១ថ្ងៃ។
ក្នុងសេចក្ដីណែនាំរបស់លោកនាយករដ្ឋមន្ត្រី ហ៊ុន សែន ចុះថ្ងៃទី១៩ ខែសីហា ឆ្នាំ២០២១ ឱ្យដឹងថា ការវិវត្តសភាពការណ៍ក្នុងរយៈពេល២សប្តាហ៍ចុងក្រោយនេះ បង្ហាញថា អត្រានៃការឆ្លងរាលដាលជំងឺកូវីដ-១៩ក្នុងសហគមន៍ និងអត្រាអ្នកជំងឺក្នុងកម្រិតមធ្យម ក៏ដូចជាអ្នកស្លាប់ដោយសារជំងឺនេះ មាននិន្នាការថេរ ហើយអត្រាអ្នកជាសះស្បើយក៏មានការកើនឡើង បើទោះជាវីរុសកូវីដ-១៩ប្រភេទ “ដែលតា” មានការឆ្លងរាលដាលកើនឡើងដល់២៣រាជធានី-ខេត្តក៏ដោយ។
ករណីនេះ លោកថា រដ្ឋាភិបាលសម្រេចបិទបញ្ចប់ការអនុវត្តយុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ នៅថ្ងៃទី១៩ ខែសីហា ឆ្នាំ២០២១នេះ ក្រោយអនុវត្តបាន២១ថ្ងៃកន្លងមក។
ទោះយ៉ាងណា លោកនាយករដ្ឋមន្ត្រី ហ៊ុន សែន បានបន្តណែនាំដល់បណ្តាគណៈអភិបាលរាជធានី-ខេត្ត ត្រូវបន្តការអនុវត្តនូវការរឹតបន្តឹងវិធានការសុខាភិបាល វិធានការរដ្ឋបាល និងវិធានការច្បាប់ ដោយផ្អែកតាមសភាពការណ៍ជាក់ស្តែងនៃជំងឺនេះ នៅក្នុងភូមិសាស្ត្ររាជធានី-ខេត្តរបស់ខ្លួន ក្រោមការសម្របសម្រួលរបស់គណៈប្រតិបត្តិគណៈកម្មការអន្តរក្រសួង និងអនុគណៈកម្មការដែលមានការពាក់ព័ន្ធ។
លោកនាយករដ្ឋមន្ត្រី ហ៊ុន សែន លើកឡើងនៅក្នុងសេចក្ដីណែនាំបន្តថា ការបន្តពង្រឹងវិធានការនេះ ខណៈដែលកម្ពុជារកឃើញមេរោគកូវីដ-១៩ ប្រភេទ ដែលតា (Delta) ជាបន្តបន្ទាប់ និងនៅស្ទើរគ្រប់ទីកន្លែងនៅទូទាំងប្រទេស ហើយលទ្ធភាពនៃការឆ្លងរាលដាលទ្រង់ទ្រាយធំនៅពេលខាងមុខនៅបន្តជាបញ្ហាប្រឈមចំពោះមុខដែលគួរឱ្យព្រួយបារម្ភសម្រាប់កម្ពុជា។
កាលពីថ្ងៃទី១៩ ខែសីហា ម្សិលមិញនេះ រដ្ឋបាលរាជធានីភ្នំពេញ ក៏បានចេញសេចក្ដីណែនាំមួយដោយបញ្ជាក់ថា អាជ្ញាធរសម្រេចបិទបញ្ចប់បម្រាមគោចរចន្លោះម៉ោង២១យប់ដល់ម៉ោង៣ទៀបភ្លឺ ចាប់ពីថ្ងៃទី២០ ខែសីហានេះដែរ ប៉ុន្តែវិធានការរដ្ឋបាលផ្សេងៗទៀតនៅរក្សាដដែល។
រដ្ឋបាលរាជធានីភ្នំពេញ បញ្ជក់ថា ទោះបីជារដ្ឋាភិបាលបិទបញ្ចប់បម្រាមគោចរក៏ដោយ ប៉ុន្តែអាជ្ញាធរនៅតែបន្តពង្រឹងវិធានការទប់ស្កាត់កូវីដ-១៩ ក្នុងនោះ អាជីវកម្មដែលមានហានិភ័យខ្ពស់ ការហាមជួបជុំដែលមានមនុស្សច្រើនចាប់ពី១៥នាក់ឡើងទៅ អាជ្ញាធរនៅតែផ្អាកដដែល។
ចំពោះសកម្មភាពការងារ មុខរបរ ឬអាជីវកម្មដែលផ្អាកនោះមានដូចជា សាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋនិងឯកជន ប៉ុន្តែអាចធ្វើការបណ្តុះបណ្តាលតាមប្រព័ន្ធអនឡាញ, អាជីវកម្មក្លឹបកម្សាន្តគ្រប់ប្រភេទ ជាអាទិ៍រួមមាន ខារ៉ាអូខេ រង្គសាល ឌីស្កូតែក បៀហ្គាឌិន និងកាស៊ីណូ, រមណីយដ្ឋាន សារមន្ទីរ សួនកុមារ និងសួនកម្សាន្តនានា ខណៈអាជីវកម្មម៉ាស្សា សូណា និងស្ទីមគ្រប់ប្រភេទ និងហាងលក់និងសេពគ្រឿងស្រវឹងគ្រប់ប្រភេទ រួមទាំងរោងភាពយន្ត រោងសម្តែងសិល្បៈ ក្លឹបហាត់ប្រាណ និងមជ្ឈមណ្ឌលកីឡាគ្រប់ប្រភេទ ក៏ត្រូវបានផ្អាកបណ្ដោះអាសន្នដែរ។
សេចក្ដីណែនាំដដែលថា ការបន្តពង្រឹងវិធានការទប់ស្កាត់នេះ ដោយសារជំងឺកូវីដ-១៩បប្លែងថ្មីប្រភេទ ដែលតា បាននិងកំពុងឆ្លងរីករាលដាលនៅក្នុងប្រទេសកម្ពុជា ខណៈដែលកម្ពុជាមិនទាន់ទប់ស្កាត់ការឆ្លងជំងឺកូវីដ-១៩ ក្នុងព្រឹត្តិការណ៍២០កុម្ភៈ បានទាំងស្រុងនៅឡើយ។
បើតាមរបាយការណ៍ក្រសួងសុខាភិបាល ឱ្យដឹងថា គិតត្រឹមថ្ងៃទី១៨ ខែសីហា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ សរុប៨៧ ១៩០នាក់ ក្នុងនោះ ករណីនាំចូលពីក្រៅប្រទេសសរុប១៣ ៤៧៤នាក់ ខណៈអ្នកជំងឺព្យាបាលជាសះស្បើយចំនួន៨២ ៦៦៦នាក់ និងអ្នកស្លាប់១ ៧៣០នាក់៕
