ប្រជាពលរដ្ឋនៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ បានអះអាងថា កងកម្លាំងអាជ្ញាធរខណ្ឌជាង៣០នាក់បានចុះទៅរុះរើផ្ទះរបស់ពួកគាត់អស់១ខ្នង ក្នុងចំណោមផ្ទះដែលអាជ្ញាធរគ្រោងរុះរើចំនួន២២គ្រួសារ ដោយមិនបានជូនដំណឹងនិងផ្ដល់ជាសំណងណាមួយដល់ពួកគាត់ឡើយ។
លោក ហឿង ភាក់ ពលរដ្ឋម្នាក់ក្នុងចំណោមពលរដ្ឋ២២គ្រួសារ ដែលអះអាងប្រាប់ វីអូឌី ថា ផ្ទះរបស់គាត់ត្រូវបានអាជ្ញាធរចុះទៅរុះរើនៅថ្ងៃទី១៩ ខែសីហា បាននិយាយថា អាជ្ញាធរបានចុះទៅរុះរើផ្ទះរបស់ពួកគាត់ដោយមិនមានការជូនដំណឹងជាមុននោះទេ ដោយសម្អាងថា ផ្ទះដែលពួកគាត់កំពុងរស់នៅនេះជាដីរបស់រដ្ឋ និងប៉ះពាល់ដល់ការអភិវឌ្ឍផ្លូវថ្នល់ក្នុងរាជធានីភ្នំពេញ។ តែយ៉ាងណា លោកថា ពលរដ្ឋបានទៅរស់នៅលើដីនេះតាំងពីឆ្នាំ១៩៩៣មក។
លោកថា៖ «អាជ្ញាធរមកដល់ រុះផ្ទះអស់ ខ្ញុំអត់មាននរណានៅផ្ទះទេ ហើយដំណឹងអត់មានជូនមុនដែរ។ ខ្ញុំរវល់តែធ្វើការ មកដល់វាយខ្ទេច ជញ្ជូនអីវ៉ានសឹងតែមិនចង់ទាន់។ វា [អាជ្ញាធរ] ចង់យកអាអិច [គ្រឿងចក្រ] កាយភ្លាមតែម្តង […] អត់មានជូនដំណឹងអីសោះ។ គាត់ [អាជ្ញាធរ] ដឹងតែពីធ្វើតាមតែអំពើចិត្តរបស់គាត់ អត់មានគិតប្រជាពលរដ្ឋ [សម័យ]កូវីដ គ្នា[ប្រឈមនឹង]កូវីដ ក្ររហេមរហាម»។
ចំណែកប្រជាពលរដ្ឋម្នាក់ទៀតដែលផ្ទះរបស់គាត់ប្រឈមនឹងការរុះរើដែរនោះ អ្នកស្រី ចេង សារុន ចាត់ទុកសកម្មភាពរបស់អាជ្ញាធរដែលរុះរើផ្ទះពលរដ្ឋនេះ ថាជារឿងអយុត្តិធម៌ ហើយធ្វើឱ្យពលរដ្ឋកាន់តែជួបការលំបាកខ្លាំង បន្ថែមលើការលំបាកក្នុងវិបត្តិកូវីដ-១៩។ អ្នកស្រីបានស្នើឱ្យអាជ្ញាធរខណ្ឌរកដំណោះស្រាយជូនពលរដ្ឋ ជាជាងការចុះទៅរុះរើបណ្តេញចេញដោយបង្ខំបែបនេះ។
អ្នកស្រីបានបន្តអំពាវនាវថា៖ «សំណូមពរទៅសម្ដេចនាយក [លោកនាយករដ្ឋមន្ត្រី ហ៊ុន សែន] ជួយកូនចៅផង! កូនចៅគ្មានទីជម្រកទេ! អាជ្ញាធរចុះមករុះរើផ្ទះប្រជាពលរដ្ឋអស់ហើយ។ ឥលូវមករុះរើភ្លាមៗតែម្ដង អត់មានទុក១ម៉ោង ឬកន្លះម៉ោងនោះទេ […] សូមសម្ដេច ហ៊ុន សែន ជួយកូនចៅផង!»។
អភិបាលរងខណ្ឌឫស្សីកែវ លោក ប្រាជ្ញ សីហា បានបដិសេធអត្ថាធិប្បាយជុំវិញករណីនេះតាមប្រព័ន្ធទូរសព្ទ។
ប៉ុន្តែក្រុមប្រឹក្សាសង្កាត់គីឡូម៉ែត្រលេខ៦ លោក សាន់ ប៉ុណ្ណយ៉ុង បានប្រាប់ វីអូឌី ថាប្រជាពលរដ្ឋទាំង២២គ្រួសារនៅភូមិស្ពានខ្ពស់នេះ បានទៅរស់នៅដោយខុសច្បាប់លើបណ្ដោយផ្លូវ១៧១៧ ហើយបច្ចុប្បន្ន អាជ្ញាធរត្រូវយកតំបន់នោះទៅអភិវឌ្ឍផ្លូវ១០ម៉ែត្រ។
លោកបន្តថា៖ «ព្រោះតំបន់ហ្នឹងជាតំបន់អភិវឌ្ឍន៍ តំបន់ឫស្សីកែវនេះជាកន្លែងអភិវឌ្ឍន៍ […] ប៉ុន្តែខ្ញុំមិនសូវដឹងនោះទេថា ថ្នាក់លើត្រូវឱ្យប្រជាពលរដ្ឋរុះរើឬក៏អត់ ចាំមើលថ្នាក់លើបញ្ជា»។
នាយករងផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានលើកឡើងថា ចំណាត់ការរបស់អាជ្ញាធរក្នុងការរុះរើផ្ទះពលរដ្ឋជាបន្តបន្ទាប់ រួមទាំងការរុះរើផ្ទះនៅភូមិស្ពានខ្ពស់ ក្នុងអំឡុងពេលវិបត្តិកូវីដ-១៩នេះ មិនមែនជាដំណោះស្រាយល្អនោះទេ។ តែផ្ទុយទៅវិញ លោកថា ការធ្វើបែបនេះ ដូចជាការដាក់បន្ទុកឱ្យប្រជាពលរដ្ឋជួបការលំបាកកាន់តែខ្លាំង។
លោកបន្តថា៖ «គិតថាអ្វីដែលសំខាន់ គឺការចរចាស្វែងរកដំណោះស្រាយដែលអាចទទួលយកបានទាំងអស់គ្នា ហើយតាមនីតិវិធី។ ទី១ ពលរដ្ឋក្រោយពីការចរចាហើយ ពួកគាត់អាចត្រៀមខ្លួនរួចជាស្រេចក្នុងការទទួលយកលទ្ធផល ឬក៏ការចាកចេញ ឬក៏អាចលទ្ធផលណាមួយដែលគាត់ទទួលយកបាន ហើយមិនមានជាបញ្ហាអ្វីកើតឡើងទេ […] ទី២ ឥលូវនេះ យើងឃើញហើយ ការរីករាលដាលកូវីដ-១៩ កាលណាមានការរុះរើឬបណ្ដាញ ពួកគាត់មានការប្រមូលផ្ដុំ អាចមានហានិភ័យទាក់ទងជំងឺកូវីដទៀត»៕