អគ្គស្នងការដ្ឋាននគរបាលជាតិ បានសម្រេចតែងតាំងលោក ឌី វិជ្ជា កូនប្រសាររបស់លោកនាយករដ្ឋមន្ត្រី ហ៊ុន សែន ឱ្យធ្វើជាប្រធានក្រុមដឹកនាំក្រុមការងារស្រាវជ្រាវនិងស៊ើបអង្កេត ករណីជម្លោះដីធ្លីនិងការទន្ទា្រនកាន់កាប់ដីរបស់រដ្ឋដោយខុសច្បាប់នៅតាមបណ្ដារាជធានី-ខេត្ត។
សេចក្ដីសម្រេចចុះថ្ងៃទី១២ ខែសីហា ឆ្នាំ២០២១ ឱ្យដឹងថា ការសម្រេចនេះធ្វើឡើងដើម្បីកែសម្រួលសមាសភាពប្រមូលព័ត៌មាន ក្រុមការងារស្រាវជ្រាវ និងស៊ើបអង្កេត លើករណីជម្លោះដីធ្លីនិងការទន្ទា្រនកាន់កាប់ដីរបស់រដ្ឋដោយខុសច្បាប់ ដែលចេញដោយអគ្គស្នងការដ្ឋាននគរបាលជាតិ។ ក្រុមការងារស្រាវជ្រាវនេះមានសិទ្ធិប្រើប្រាស់កម្លាំងនៃនាយកដ្ឋានជំនាញក្រោមផែនសន្តិសុខ លើការងារនីតិវិធីនិងអន្តរាគមន៍ក្នុងករណីចាំបាច់ និងប្រើប្រាស់កម្លាំងផែនសន្តិសុខនៃអគ្គស្នងការដ្ឋាននគរបាលជាតិ លើការងារប្រមូលព័ត៌មាន ស្រាវជ្រាវ ស៊ើបអង្កេត និងនីតិវិធីកសាងសំណុំរឿងបញ្ជូនទៅតុលាការក្នុងដែនសមត្ថកិច្ចខេត្តពីរឬច្រើន។
មួយវិញទៀត សេចក្តីសម្រេចនោះថា កម្លាំងស្នាក់ការចារកម្មគ្រប់រាជធានី-ខេត្ត លើការងារប្រមូលព័ត៌មាន ស្រាវជា្រវ និងកសាងមុខសញ្ញាក្នុងមូលដ្ឋាន និងស្នើសុំកិច្ចសហប្រតិបត្តិការជាមួយមូលដ្ឋាន-អង្គភាពចំណុះអគ្គស្នងការដ្ឋាននគរបាលជាតិ និងបណ្ដាស្ថាប័នរដ្ឋ ពាក់ព័ន្ធនឹងតម្រូវការចាំបាច់ឬករណីរកឃើញបទល្មើសផ្សេងទៀតដែលមានជាប់ពាក់ព័ន្ធនឹងករណីដែលបានចុះស្រាវជ្រាវ។
ក្រៅពីមានសិទ្ធិប្រើប្រាស់កម្លាំងនិងកសាងសំណុំរឿងបញ្ជូនទៅតុលាការហើយ ក្រុមការងារនេះក៏មានភារកិច្ចក្នុងការប្រមូលព័ត៌មានអំពីសកម្មភាពញុះញង់ គាំទ្រ ឧបត្ថម្ភដល់ការបង្កើតឱ្យមានការតវ៉ា ការទាមទារ ឬការរៀបចំឱ្យមានជម្លោះដីធ្លី និងសកម្មភាពទន្ទ្រានកាន់កាប់ដីធ្លីរបស់រដ្ឋដោយខុសច្បាប់ ដែលបង្កឱ្យមានចលាចលនៅតាមបណ្ដារាជធានី-ខេត្ត។
ទាក់ទងករណីនេះ អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ក្រុមការងារនេះ បានបង្កើតឡើងអស់រយៈពេល២ទៅ៣ឆ្នាំមកហើយ ដើម្បីធ្វើការស៊ើបអង្កេត ខណៈការដោះស្រាយវិវាទដីធ្លីនោះមិនមែនជាភារកិច្ចនិងតួនាទីរបស់ខ្លួនក៏ដោយ។
លោកបញ្ជាក់ថា៖ «យើងបង្កើតឡើងនេះ បង្ការរឿងសន្តិសុខទេ! ឱ្យដឹងរឿងមុនផ្ទុះឡើង អ្នកអុចអាល យកលេសរឿងបុគ្គល យកលេសបង្កើតក្រុមញុះញង់ គេបង្ការរឿងហ្នឹង»។
ប្រជាពលរដ្ឋដែលកំពុងមានជម្លោះដីធ្លីជាមួយក្រុមហ៊ុន KDC របស់លោកស្រី ជា ខេង នៅខេត្តកំពង់ឆ្នាំង គឺលោក រាជ សីមា មិនរំពឹងថា ក្រុមការងារដែលអគ្គស្នងការដ្ឋាននគរបាលជាតិបង្កើតឡើងនេះអាចជួយប្រជាពលរដ្ឋដែលមានជម្លោះដីធ្លីឡើយ។ ផ្ទុយទៅវិញ លោកថា ក្រុមការងារនេះបង្កើតមកដើម្បីបង្ក្រាបចំពោះអ្នកដែលចង់ទាមទារសិទ្ធិសេរីភាព ដោយមិនឱ្យធ្វើការតវ៉ានិងបញ្ចេញមតិជុំវិញការរកដំណោះស្រាយរឿងដីធ្លីតែប៉ុណ្ណោះ។
លោកបន្តថា ការតវ៉ាទាមទាររបស់ប្រជាពលរដ្ឋ ដោយសារពួកគាត់បានបាត់បង់ដីធ្លី ហើយបើស្ថាប័នពាក់ព័ន្ធអើពើឬពន្លឿនការដោះស្រាយជូនពួកគាត់ នោះនឹងមិនមានការតវ៉ានោះទេ។ លោកបញ្ជាក់ថា បើសិនអាជ្ញាធរឬរដ្ឋាភិបាលមានឆន្ទៈក្នុងការជួយរកដំណោះស្រាយជូនប្រជាពលរដ្ឋមែននោះ គួរតែជួបនិងហៅប្រជាពលរដ្ឋដែលរងគ្រោះមកដោះស្រាយបញ្ចប់ មិនមែនបង្កើតក្រុមការងារទប់ស្កាត់ទេ។
លោកថា៖ «ពេលគេបង្កើតអ៊ីចឹង ស្មើនឹងគេបំបិទសិទ្ធិពលរដ្ឋ ស្មើនឹងកម្ទេចតំណាងពលរដ្ឋ ដោយសារប៉ូលិសទាំងអស់ហ្នឹងសុទ្ធតែជាតំណាងឱ្យស្ថាប័នរបស់រដ្ឋហ្នឹង។ គេស្រាវជ្រាវកម្ទេចអ្នកចេះដឹង ដូចសម័យប៉ុលពតអ៊ីចឹង។ អ្នកណាដែលចេះដឹង គេកម្ទេចចោលអ៊ីចឹងទៅ អត់ឱ្យមានអ្នកតវ៉ា អត់ឱ្យមានអ្នកតស៊ូដើម្បីប្រជាពលរដ្ឋ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ទទូចឱ្យក្រុមការងារដែលចុះប្រមូលព័ត៌មានស្រាវជ្រាវនិងស៊ើបអង្កេតឱ្យមានតម្លាភាព ជាពិសេសរវាងពលរដ្ឋរងគ្រោះដីធ្លីដែលកំពុងស្វែងរកដំណោះស្រាយនិងអ្នកញុះញង់ឱ្យប្រជាពលរដ្ឋកាប់ទន្ទ្រានយកដីរដ្ឋ។
លោកថា៖ «តែអ្វីដែលយើងព្រួយបារម្ភ តើបែងចែកដាច់អត់រវាងអ្នកញុះញង់ អ្នកបង្កឱ្យមានចលាចល អ្នកញុះញង់ឱ្យមានការទន្ទ្រានដីរដ្ឋ អ្នកញុះញង់ឱ្យមានបាតុភាពហិង្សាផ្សេងៗកើតឡើង? ជាមួយនឹងការគ្មានដំណោះស្រាយ ហើយប្រជាពលរដ្ឋធ្វើការតវ៉ាស្វែងរកដំណោះស្រាយ សម្រាប់ប្រជាពលរដ្ឋមានបញ្ហាដីធ្លីពិតប្រាកដ វាជារឿងល្អ។ ប៉ុន្តែអ្នកដែលទន្ទ្រានខុសច្បាប់ ញុះញង់ដោយសារអំណាចតួនាទី អាហ្នឹងត្រូវតែចាត់វិធានការ»។
លោកឧត្តមសេនីយ៍ឯក ឌី វិជ្ជា គឺជាកូនប្រុសរបស់លោក ហុក ឡង់ឌី អតីតអគ្គស្នងការនគរបាលជាតិ និងជាកូនប្រសាររបស់លោកនាយករដ្ឋមន្ត្រី ហ៊ុន សែន ត្រូវបានតែងតាំងជាអគ្គស្នងការរងនៃអគ្គស្នងការដ្ឋាននគរបាលជាតិ កាលពីខែមករា ឆ្នាំ២០១៨។ បច្ចុប្បន្ន លោកក៏មានតួនាទីជាប្រធាននាយកដ្ឋានកណ្ដាលសន្តិសុខ នៃអគ្គស្នងការដ្ឋាននគរបាលជាតិផងដែរ៕
