ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ បំប្លែងថ្មីប្រភេទដែលតា (Delta) ចំនួន ៨៣៦ នាក់បន្ថែមទៀត ចាប់ពីថ្ងៃទី៣១ ខែមីនា ដល់ថ្ងៃទី១៩ ខែសីហា ឆ្នាំ២០២១។
ក្នុងសេចក្ដីប្រកាសព័ត៌មានរបស់ក្រសួងសុខាភិបាលចុះថ្ងៃទី២០ ខែសីហា ឆ្នាំ២០២១ ឱ្យដឹងថា វីរុសកូវីដ-១៩បំប្លែងថ្មី «Delta» បាននឹងកំពុងវាយលុកចូលសហគមន៍ នៅចំនួន ២៣រាជធានី-ខេត្ត ហើយ។
ក្រសួងបញ្ជាក់ថា ខេត្តដែលវីរុសដែលតា បាននិងកំពុងបន្តរាតត្បាតវាយលុកចូលក្នុងសហគមន៍នាពេលបច្ចុប្បន្ន ក្នុងនោះមានរាជធានីភ្នំពេញ ខេត្តឧត្តរមានជ័យ សៀមរាប ព្រះវិហារកំពង់ចាម កំពង់ធំ កណ្តាល បន្ទាយមានជ័យ និងបណ្តាខេត្តមួយចំនួនទៀត ខណៈខេត្តចំនួនពីរប៉ុណ្ណោះ គឺខេត្តក្រចេះ និងខេត្តកែបប៉ុណ្ណោះ នៅមិនទាន់រកឃើញមានអ្នកឆ្លងជំងឺនេះ។
គិតចាប់តាំងពីថ្ងៃទី៣១ ខែមីនា រហូតដល់ថ្ងៃទី១៩ ខែសីហា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ-១៩ បំប្លែងថ្មី ប្រភេទដែលតា ចំនួន ៨៣៦ នាក់ហើយ។ ជុំវិញករណីនេះ រដ្ឋមន្ត្រីក្រសួងសុខាភិបាលបានអំពាវនាវដល់ប្រជាពលរដ្ឋទាំងអស់ឱ្យបន្តប្រុងប្រយ័ត្នខ្ពស់ ការពារខ្លួន ស្របពេលដែលវីរុសកូវីដ-១៩ បំប្លែងថ្មី កំពុងរាតត្បាតនៅក្នុងប្រទេសកម្ពុជា៕
