ក្រសួងកសិកម្ម រុក្ខាប្រមាញ់ និងនេសាទ ជំរុញការនាំចេញផ្លែមៀនស្រស់ទៅកាន់ទីផ្សារបរទេស ខណៈការត្រៀមរៀបចំហេដ្ឋារចនាសម្ព័ន្ធរូបវ័ន្តតាមលក្ខខណ្ឌដែលបានឯកភាពគ្នា ដើម្បីកំណត់នូវភាពជោគជ័យក្នុងដំណាក់កាលចរចានេះ។
នៅក្នុងសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ ផ្ញើជូនដល់វិស័យឯកជន សហគមន៍កសិកម្ម និងអន្តរស្ថាប័នពាក់ព័ន្ធ ចុះថ្ងៃទី២០ ខែសីហា ឆ្នាំ២០២១នេះ លើកឡើងអំពីការនាំចេញផ្លែមៀនស្រស់ ដោយត្រៀមរៀបចំហេដ្ឋារចនាសម្ព័ន្ធរូបវ័ន្ត រួមមានការលាងសម្អាត ការរម្ងាប់សមាសភាពចង្រៃ និងការវេចខ្ចប់ ដើម្បីធានាសម្របតាមលក្ខខណ្ឌតម្រូវភូតគាមអនាម័យដែលបានឯកភាពគ្នាជាមួយប្រទេសចិន និងប្រទេសថៃ។
ក្រសួងកសិកម្ម រុក្ខាប្រមាញ់ និងនេសាទ ក៏បានអំពាវនាវដល់វិស័យឯកជន សហគមន៍កសិកម្ម និងអន្តរស្ថាប័នពាក់ព័ន្ធទាំងអស់ ចូលរួមក្នុងការជំរុញការនាំចេញផលិតផលផ្លែមៀនស្រស់ទៅកាន់ទីផ្សារបរទេស ដោយពិនិត្យលទ្ធភាពធ្វើការវិនិយោគក្នុងការសាងសង់នូវហេដ្ឋារចនាសម្ព័ន្ធពាក់ព័ន្ធ ឬពង្រីកហេដ្ឋារចនាសម្ព័ន្ធដែលមានស្រាប់ឱ្យបានទាន់ពេលវេលា។
ក្រសួងដដែលបន្ថែមថា ដើម្បីចូលរួមក្នុងការជំរុញការនាំចេញផលិតផល ដោយមានសមត្ថភាពគ្រប់គ្រាន់ក្នុងការស្រូបយកផលិតផលមកធ្វើការកែច្នៃនាំចេញឱ្យបានជាអតិបរមាភ្លាមៗ ក្រោយពេលមានការឯកភាពជាមួយប្រទេសនាំចូលលើពិធីសារអំពីលក្ខខណ្ឌតម្រូវភូតគាមអនាម័យ។ ក្នុងនោះ ប្រទេសនាំចូលក៏នឹងចុះមកពិនិត្យ និងវាយតម្លៃដោយផ្ទាល់នៅក្នុងប្រទេសកម្ពុជាផងដែរ មុនឈានដល់ដំណាក់កាលនៃការនាំចេញជាក់ស្ដែង។
ឆ្លើយតបនឹងគោលដៅ និងទិសដៅដែលបានជម្រាបជូន ក្រសួងក៏បានជម្រាបបន្ថែមថា ពលរដ្ឋដែលមានបំណងវិនិយោគលើការនាំចេញផលិតផលផ្លែមៀនស្រស់ដើម្បីលើកកម្ពស់ផលិតភាពនិងពាណិជ្ជូបនីយកម្មផលិតផលកសិកម្មកម្ពុជា សូមធ្វើការទំនាក់ទំនងជាមួយអគ្គនាយកដ្ឋានកសិកម្មដែលជាសេនាធិការបច្ចេកទេសរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការទទួលបានការណែនាំផ្នែកបច្ចេកទេសពាក់ព័ន្ធឱ្យបានគ្រប់ជ្រុងជ្រោយ៕
