មន្រ្តីជាន់ខ្ពស់ក្រសួងមហាផ្ទៃ ឱ្យដឹងនៅថ្ងៃចន្ទនេះថា ក្រសួងកំពុងពិនិត្យឯកសារផ្លូវច្បាប់នានាឡើងវិញ បន្ទាប់ពី«គណបក្សកែទម្រង់កម្ពុជា»ដែលទើបបង្កើតឡើងថ្មីនេះ បានស្នើឯកសារផ្លូវច្បាប់នានាបន្ថែមទៀតមកក្រសួង ដើម្បីពិនិត្យនិងសម្រេចជាលើកចុងក្រោយ។
លោក ផាត សុផានិត អ្នកនាំពាក្យក្រសួងមហាផ្ទៃ បានប្រាប់ វីអូឌី តាមបណ្តាញសង្គមតេឡេក្រាមថា ក្រសួងបានទទួលរួចហើយនូវសំណើសុំបើកដំណើរការនិងធ្វើសកម្មភាពរបស់គណបក្សកែទម្រង់កម្ពុជា។
ទោះជាបែបណា អ្នកនាំពាក្យរូបនេះមិនបានផ្តល់ព័ត៌មានលម្អិតទេ ថាតើការពិនិត្យឯកសារនេះត្រូវបញ្ចប់នៅពេលណា ហើយជូនដំណឹងអំពីការផ្តល់សុពលភាពទៅគណបក្សកែទម្រង់កម្ពុជាវិញនៅថ្ងៃណា។
បើតាមលោក ផាត សុផានិត ការផ្តល់ភ្លើងខៀវឱ្យគណបក្សកែទម្រង់កម្ពុជាអាចធ្វើសកម្មភាពនយោបាយនៅពេលណាបាននោះ គឺអាស្រ័យលើឯកសារដែលបានដាក់ជូនក្រសួងមហាផ្ទៃត្រឹមត្រូវកម្រិតណា និងថាតើគណបក្សដែលទើបបង្កើតថ្មីនេះបានអនុវត្តគ្រប់នីតិវិធីដែលមានកំណត់នៅក្នុងច្បាប់ហើយនៅ។
លោកបន្តថា៖ «ចំពោះការសម្រេចលើសំណើ គឺអាស្រ័យលើការបំពេញបែបបទត្រឹមត្រូវនិងគ្រប់គ្រាន់តាមនីតិវិធីកំណត់។ វាអាស្រ័យទៅលើ ថាតើគាត់បំពេញតាមលក្ខខណ្ឌគ្រប់គ្រាន់តាមច្បាប់តម្រូវដែរឬទេ! ដូច្នេះហើយយើងកំពុងពិនិត្យកិច្ចការនេះ»។
យ៉ាងនេះក្តី លោក អ៊ូ ចាន់រ័ត្ន អតីតតំណាងរាស្រ្តគណបក្សសង្រ្គោះជាតិ និងជាមន្រ្តីជាន់ខ្ពស់គណបក្សកែទម្រង់កម្ពុជា បានបញ្ជាក់កាលពីថ្ងៃសុក្រថា រាល់ឯកសារនិងបទដ្ឋានគតិយុត្តិនានាដូចដែលក្រសួងមហាផ្ទៃទាមទារក្នុងពេលកន្លងទៅ រួមមាន ស្នាមមេដៃ លក្ខន្តិកៈ និងបទបញ្ជាផ្ទៃក្នុងរបស់គណបក្ស ជាដើម លោកបានបំពេញនិងដាក់ជូនក្រសួងរួចរាល់អស់ហើយ។ គណបក្សកែទម្រង់កម្ពុជា ត្រូវបានក្រសួងមហាផ្ទៃអនុញ្ញាតជាផ្លូវការឱ្យបង្កើតទៅជាគណបក្សនយោបាយ កាលពីថ្ងៃទី១៦ ខែមីនា ឆ្នាំ២០២១៕
