ក្រសួងសុខាភិបាលប្រាប់ជាថ្មីទៅអភិបាលរាជធានី-ខេត្តទាំងអស់ ត្រូវណែនាំដល់ប្រជាពលរដ្ឋបន្ថែមទៀតឱ្យពួកគេទៅចាក់វ៉ាក់សាំងប្រឆាំងកូវីដ-១៩ ខណៈផែនការចាក់វ៉ាក់សាំងជូនពលរដ្ឋអាយុចាប់ពី១៨ឆ្នាំ មិនទាន់គ្រប់តាមផែនការនៅឡើយ។
ក្នុងលិខិតរបស់ក្រសួងសុខាភិបាល បានឱ្យដឹងនៅថ្ងៃចន្ទនេះថា ដើមចមដែលធ្វើឱ្យប្រជាពលរដ្ឋដែលមានអាយុចាប់ពី១៨ឆ្នាំឡើងទៅមួយចំនួនមិនទាន់បានមកចាក់វ៉ាក់សាំង ដោយសារមូលហេតុពលរដ្ឋខ្លះជាពលករ ប្រជាពលរដ្ឋ ឬនិស្សិតដែលបានត្រឡប់មកពីបរទេស ហើយទើបបានបញ្ចប់ការធ្វើចត្តាឡីស័ក និងស្ត្រីទើបសម្រាលកូនរួច ជាដើម។
ករណីនេះ ក្រសួងសុខាភិបាលបានបង្កើតទីតាំងចាក់វ៉ាក់សាំងកូវីដ-១៩ ដូសទី១ និងដូសទី២ ជូនប្រជាពលរដ្ឋនិងពលករដែលនៅសេសសល់ ដោយសារបច្ចុប្បន្ននេះ ចំនួនពលរដ្ឋដែលមានអាយុចាប់ពី១៨ឆ្នាំឡើងទៅ ហើយបានទទួលការចាក់វ៉ាក់សាំងកូវីដ-១៩ មិនទាន់បានគ្រប់តាមផែនការដែលគ្រោងទុកចំនួន ១០លាននាក់នៅឡើយ។
ទាក់ទិននឹងបញ្ហានេះ ក្រសួងសុខាភិបាលអំពាវនាវទៅអាជ្ញាធររាជធានី-ខេត្តទាំងអស់កៀរគរប្រជាពលរដ្ឋដែលមិនទាន់បានចាក់វ៉ាក់សាំងដូសទី១ នៅតាមមូលដ្ឋានភូមិ ឃុំ-សង្កាត់របស់ខ្លួន ព្រមទាំងរៀបចំផែនការ និងចលនាលើកទឹកចិត្តពួកគេឱ្យទៅចាក់វ៉ាក់សាំងដោយស្ម័គ្រចិត្តឱ្យបានទាន់ពេលវេលា នៅតាមទីតាំងដែលកំពុងដំណើរការចាក់វ៉ាក់សាំង។
លិខិតក្រសួងបញ្ជាក់ថា៖ «អភិបាលរាជធានី-ខេត្តទាំងអស់ត្រូវចាត់ចែងរៀបចំជាប់ជាប្រចាំចាក់វ៉ាក់សាំងកូវីដ-១៩ នៅតាមមូលដ្ឋានសុខាភិបាលសាធារណៈ ដែលប្រជាពលរដ្ឋងាយស្រួលទៅទទួលយកវ៉ាក់សាំង ដូចជា នៅមណ្ឌលសុខភាព មន្ទីរពេទ្យបង្អែកស្រុក មន្ទីរពេទ្យបង្អែករាជធានី-ខេត្ត ឬទីតាំងមួយចំនួនទៀតដែលអាចផ្តល់លទ្ធភាពដល់ពលរដ្ឋដែលនៅសេសសល់បានទៅចាក់វ៉ាក់សាំងគ្រប់ៗគ្នា»។
ក្រសួងសុខាភិបាល ឱ្យដឹងថា គិតត្រឹមថ្ងៃទី២២ ខែសីហា ឆ្នាំ២០២១ ចំនួនពលរដ្ឋទៅចាក់វ៉ាក់សាំងចាប់ពីអាយុ១៨ឆ្នាំឡើងទៅ មានចំនួន ៨៧,២៦% ធៀបជាមួយចំនួនប្រជាជនគោលដៅ១០លាននាក់ ខណៈកុមារ-យុវវ័យអាយុពី១២ឆ្នាំ ទៅក្រោម១៨ឆ្នាំមានចំនួន ៥០,៣៩% ធៀបជាមួយនឹងប្រជាជនគោលដៅ ១ ៩៦៦ ៩៣១នាក់៕
