ស្ថានទូតកម្ពុជាប្រចាំប្រទេសវៀតណាម អំពាវនាវដល់ប្រជាពលរដ្ឋខ្មែរឱ្យប្រុងប្រយ័ត្នចំពោះព្យុះចំនួន៤ដែលនឹងបោកបក់ចូលដែនដីគោករបស់ប្រទេសវៀតណាម ចាប់ពីពេលនេះរហូតដល់ចុងឆ្នាំ២០២១។
ក្នុងសេចក្ដីជូនដំណឹងរបស់ស្ថានឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម នៅថ្ងៃទី២៣ ខែសីហា ឆ្នាំ២០២១ ដល់ប្រជាពលរដ្ឋខ្មែរដែលកំពុងរស់នៅ ធ្វើការងារ ឬមានវត្តមាននៅវៀតណាម បានឱ្យដឹងថា ចាប់ពីពេលនេះ រហូតដល់ចុងឆ្នាំ២០២១ ព្យុះចំនួន៧ទៅ៩ និងសម្ពាធត្រូពិកទាប នឹងបោកបក់សមុទ្រខាងកើត ហើយក្នុងនោះមានព្យុះចំនួន៤នឹងបោកបក់ចូលដីគោករបស់ប្រទេសវៀតណាមផងដែរ។
សេចក្ដីជូនដំណឹងដដែលក៏បានបញ្ជាក់ថា តាមបណ្ដាខេត្តនិងទីក្រុងនៅភាគកណ្ដាល និងតំបន់កណ្ដាលឈៀងខាងត្បូង នឹងមានភ្លៀងធ្លាក់ខ្លាំងចាប់ពីខែតុលា វិច្ឆិកា និងធ្នូ ឆ្នាំ២០២១ ប៉ុន្តែភ្លៀងនឹងមិនធ្លាក់ខ្លាំងដូចឆ្នាំ២០២០ទេ។ បន្ថែមពីនេះ ស្ថានទូតថា អាកាសធាតុនឹងចុះត្រជាក់លឿនជាងធម្មតា ដែលនឹងចាប់ផ្ដើមពីចុងខែកញ្ញាឬនៅដើមខែតុលា ហើយការចុះត្រជាក់ខ្លាំងនេះអាចនៅពាក់កណ្ដាលខែធ្នូ ឆាប់ជាងបណ្ដាឆ្នាំមុនៗ។
ហេតុដូច្នេះ ស្ថានទូតកម្ពុជាប្រចាំវៀតណាម បានអំពាវនាវដល់ប្រជាពលរដ្ឋខ្មែរដែលកំពុងមានវត្តមានក្នុងប្រទេសក្បែរខាងមួយនេះ ឱ្យប្រុងប្រយ័ត្នខ្ពស់ដើម្បីសុវត្ថិភាពនិងចៀសវាងកើតមានបញ្ហាជាយថាហេតុ។
លើសពីនេះ ស្ថានទូតកម្ពុជាក៏បានក្រើនរម្លឹកដល់ប្រជាពលរដ្ឋខ្មែរថែរក្សាសុខភាពឱ្យបានល្អ ដោយអនុវត្តវិធានការការពារសុវត្ថិភាព ពាក់ម៉ាស់ រក្សាអនាម័យឱ្យបានខ្ជាប់ខ្ជួន ដើម្បីការពារកុំឱ្យឆ្លងជំងឺកូវីដ-១៩ដ៏កាចសាហាវផងដែរ៕