ក្រសួងប្រៃសណីយ៍ និងទូរគមនាគមន៍ ប្រកាសបើកទូលាយការចែកចាយឧបករណ៍តេស្តរហ័សរកអង់ទីហ្សែនកូវីដ-១៩ ចំនួនពីរប្រភេទសម្រាប់សាធារណជន ដើម្បីបន្តចូលរួមទប់ស្កាត់ការឆ្លងរាលដាលនៃជំងឺកូវីដ-១៩ឱ្យបានទាន់ពេលវេលា។
នៅក្នុងសេចក្ដីជូនដំណឹងរបស់ក្រសួងប្រៃសណីយ៍ និងទូរគមនាគមន៍ កាលពីថ្ងៃទី២៣ ខែសីហា ឆ្នាំ២០២១ បានលើកឡើងថា ការចែកចាយឧបករណ៍តេស្តរហ័សរកអង់ទីហ្សែនកូវីដ-១៩ មានពីរប្រភេទ រួមមាន ឧបករណ៍តេស្តរហ័សរកអង់ទីហ្សែនកូវីដ-១៩ «SD Biosensor (Standard Q)» ផលិតនៅប្រទេសកូរ៉េ ដែលមួយប្រអប់មានចំនួន២៥ឧបករណ៍តេស្ត និងមានតម្លៃ ៣,៧ដុល្លារអាមេរិកក្នុងមួយប្រអប់ ដោយត្បារយកសំណាកពីក្នុងរន្ធច្រមុះ។
រីឯឧបករណ៍តេស្តមួយប្រភេទទៀត គឺឧបករណ៍តេស្តរហ័សរកអង់ទីហ្សែនកូវីដ-១៩ «Healgen Antigen Rapid Test» ផលិតនៅប្រទេសចិន ដោយមួយប្រអប់មានចំនួន២០ឧបករណ៍តេស្ត និងមានតម្លៃ២ដុល្លារអាមេរិក ដោយត្បារយកសំណាកពីក្នុងរន្ធច្រមុះដូចគ្នា។
ក្រសួងដដែលបានជូនដំណឹងដល់ក្រសួង-ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថាន ឱសថស្ថានរង ភ្នាក់ងារចែកចាយ និងសាធារណជន អាចបញ្ជាទិញចាប់ពីមួយប្រអប់ឡើងទៅ តាមរយៈប្រព័ន្ធស្វ័យប្រវត្តិកម្មដែលមានតំណភ្ជាប់ mptc.gov.kh/rt ឬអញ្ជើញទៅទិញផ្ទាល់នៅឯទីស្ដីការក្រសួងប្រៃសណីយ៍ និងទូរគមនាគមន៍តែម្តង។
យ៉ាងណា យោងតាមសេចក្ដីប្រកាសព័ត៌មានរបស់ក្រសួងប្រៃសណីយ៍ និងទូរគមនាគមន៍ កាលពីថ្ងៃទី២១ ខែកក្កដា ឆ្នាំ២០២១ បានព្រមានចាត់វិធានការទៅលើជនឆ្លៀតឱកាសដែលបានយកឧបករណ៍ធ្វើតេស្តរហ័សកូវីដ-១៩ ទៅធ្វើអាជីវកម្មបន្តដោយខុសច្បាប់ និងលក់បន្តក្នុងតម្លៃខ្ពស់ ស្របពេលស្ថានភាពប្រទេសកំពុងជួបការលំបាក៕
