ក្រសួងសុខាភិបាលបានឱ្យដឹងថា គិតត្រឹមថ្ងៃទី២៥ ខែសីហា ឆ្នាំ២០២១ កម្ពុជាបានរកឃើញអ្នកឆ្លងមេរោគកូវីដ-១៩ បំប្លែងថ្មី «ដែលតា» សរុប១ ៣២៥នាក់ នៅក្នុង២៣រាជធានី-ខេត្ត ខណៈខេត្តកែប និងខេត្តក្រចេះ នៅតែជាខេត្តមិនទាន់មានអ្នកឆ្លងជំងឺបំប្លែងថ្មីនេះនៅឡើយទេ។
សេចក្តីប្រកាសព័ត៌មានរបស់ក្រសួងសុខាភិបាលបានឱ្យដឹងនៅថ្ងៃទី២៥ ខែសីហានេះថា វិទ្យាស្ថានស្រាវជ្រាវសុខភាពសាធារណៈ បានរកឃើញករណីឆ្លងវីរុសកូវីដ-១៩ បំប្លែងថ្មី “ដែលតា” នៅក្នុងប្រទេសកម្ពុជា រួមមាន អ្នកដំណើរមកពីបរទេសតាមជើងហោះហើរ ពលករខ្មែរត្រលប់ពីប្រទេសថៃនិងវៀតណាម ប្រជាជនអ្នកភូមិនៅក្នុងសហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជន ជនបរទេស បុគ្គលិករោងចក្រកាត់ដេរ ជាដើម។
ក្រសួងសុខាភិបាលបញ្ជាក់ថា វីរុស “ដែលតា” បាននិងកំពុងបន្តរាតត្បាតចូលក្នុងសហគមន៍ ជាពិសេសរាជធានីភ្នំពេញ ខេត្តឧត្ដរមានជ័យ សៀមរាប ព្រះវិហារ កំពង់ចាម កំពង់ធំ កណ្តាល បន្ទាយមានជ័យ និងបណ្តាខេត្តមួយចំនួនទៀត។
ករណីនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក្រើនរម្លឹកបន្ថែមទៀតដល់សាធារណជនទូទាំងប្រទេសកម្ពុជា ឱ្យបន្តប្រុងប្រយ័ត្នខ្ពស់ការពារខ្លួន កុំភ្លេចខ្លួនឱ្យសោះ ដោយត្រូវចេះផ្លាស់ប្ដូរទម្លាប់រស់នៅរបស់ខ្លួនឱ្យ ស្របតាមពាក្យស្លោកថា «រៀនរស់នៅធម្មតាជាមួយវីរុសកូវីដ-១៩តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩» សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេសពពួកប្រភេទបំប្លែងថ្មីនេះឬក៏ប្រភេទថ្មីផ្សេងទៀតដែលអាចកើតមាននៅកម្ពុជាជាយថាហេតុ។
លោករដ្ឋមន្ត្រីអំពាវនាវដូច្នេះថា៖ «បន្តអនុវត្តឱ្យបានខ្ជាប់ខ្ជួននូវ ៣ការពារ [ពាក់ម៉ាស់ លាងដៃឱ្យញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង] និង ៣កុំ [កុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា] តាមការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា»។
ចំណែកបុគ្គលដែលតម្រូវឱ្យធ្វើចត្តាឡីស័ក ត្រូវតែគោរពតាមគោលការណ៍ការធ្វើចត្តាឡីស័កឱ្យបានត្រឹមត្រូវ និងគោរពទៅតាមការណែនាំរបស់គណៈកម្មការគ្រប់គ្រងនៅទីតាំងនោះ ដើម្បីទប់ស្កាត់ការចម្លងបន្តគ្នានៅក្នុងសហគមន៍ក្នុងទ្រង់ទ្រាយធំផងដែរ។
គិតត្រឹមព្រឹកថ្ងៃទី២៥ ខែសីហា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៩០ ៥៣៥នាក់ អ្នកជាសះស្បើយសរុបចំនួន៨៦ ៧០២នាក់ និងអ្នកស្លាប់សរុបចំនួន១ ៨៣៥នាក់៕