សាលាដំបូងរាជធានីភ្នំពេញ បានបើកសវនាការជំនុំជម្រះកំបាំងមុខ លើសំណុំរឿងអតីតសកម្មជនគណបក្សសង្គ្រោះជាតិចំនួន៧រូប ពាក់ព័ន្ធករណីបង្ហោះសាររិះគន់លោកនាយករដ្ឋមន្រ្តី ហ៊ុន សែន លើបណ្តាញសង្គមហ្វេសប៊ុក ដែលថាបានលាក់បាំងអ្នកស្លាប់ដោយសារជំងឺកូវីដ -១៩ កាលពីអំឡុងខែមីនាឆ្នាំ២០២០។
សវនាការប្រមាណ ៣០នាទី ដែលគ្មានវត្តមានជនជាប់ចោទ និងមេធាវីការពារក្តីចូលរួម ដោយមានតែមន្រ្តីប៉ូលីសម្នាក់និងអ្នកកាសែតពីរនាក់ ព្រមទាំងមន្រ្តីម្នាក់មកពីស្ថានទូតអាមេរិកនោះ ចៅក្រមជំនុំជម្រះនៃសាលាដំបូងរាជធានីភ្នំពេញ លោកស្រី អ៊ុក រ៉េតគន្ធា បានសម្រេចបន្តការដេញដោល ដោយស្នើឱ្យមន្ត្រីប៉ូលីសដែលជាម្ចាស់បណ្តឹងបញ្ជាក់អំពីអង្គហេតុនៅក្នុងសំណុំរឿងនេះ។
ប្រធានការិយាល័យស៊ើបអង្កេត និងអនុវត្តនីតិវិធីនៃអគ្គស្នងការដ្ឋាននគរបាលជាតិ លោក ចាន់ ដារិទ្ធ បានប្រាប់ចៅក្រមថា មន្រ្តីប៉ូលីសបានស៊ើបអង្កេត ដោយរកឃើញ ព្រះសង្ឃ នូ សុធា គង់នៅប្រទេសកាណាដាតែងតែបង្ហោះព័ត៌មានក្លែងក្លាយនៅលើទំព័រហ្វេសប៊ុក ដោយរិះគន់រដ្ឋាភិបាល អំឡុងពេលមានការរីករាលដាលជំងឺកូវីដ-១៩ នៅខែមីនា ឆ្នាំ២០២០ ក៏ដូចជានៅពេលមានការឆ្លងមេរោគនេះទៅក្នុងចំណោមពលរដ្ឋខ្មែរឥស្លាម។
លោក ដារិទ្ធ បន្តថា ព្រះសង្ឃ នូ សុធា បានបង្ហោះសារដោយអះអាងថា មានមនុស្សស្លាប់ច្រើននៅកម្ពុជាហើយនាយករដ្ឋមន្រ្តីហ៊ុន សែន បានលាក់បាំងព័ត៌មាននេះ និងប្រើប្រាស់បញ្ហាកូវីដ-១៩ ដើម្បីសងសឹកប្រជាជនខ្មែរឥស្លាមផងដែរ។ លោក ដារិទ្ធ អះអាងថា នេះគឺជាចេតនាបង្កភាពវឹកវរក្នុងសង្គម។
ប្រធានការិយាល័យស៊ើបអង្កេតរូបនេះ បានដកស្រង់ការបង្ហោះមួយពីហ្វេសប៊ុករបស់ព្រះសង្ឃ នូ សុធា ដែលបានបង្ហោះនៅថ្ងៃទី២០ ខែមីនា ឆ្នាំ២០២០ ដោយចោទប្រកាន់លោកនាយករដ្ឋមន្រ្តី ហ៊ុន សែន ថាបានសងសឹកជាមួយប្រជាជនខ្មែរឥស្លាមតាំងពីរបបខ្មែរក្រហម ខណៈលោកជាមន្រ្តីជាន់ខ្ពស់ខ្មែរក្រហមទទួលខុសត្រូវនៅតំបន់បូព៌ា។
លោកបានបញ្ជាក់ថា ការបង្ហោះនេះក៏បានចោទប្រកាន់លោកនាយករដ្ឋមន្រ្តីថា បានធ្វើយុទ្ធនាការសម្លាប់មនុស្សរាប់ម៉ឹននាក់នៅស្រុកក្រូចឆ្មា ខេត្តកំពង់ចាម ក្នុងឆ្នាំ១៩៧៧ មុនពេលដែលគាត់បានភៀសខ្លួនទៅប្រទេសវៀតណាម។
ក្រៅពីការបង្ហោះនេះ លោកចាន់ ដារិទ្ធ លើកឡើងទៀតថា ព្រះសង្ឃ នូ សុធា ក៏បានចេញសេចក្តីអធិប្បាយមួយទៀត នៅថ្ងៃទី១៩ ខែមីនា ឆ្នាំ២០២០ ដោយចោទលោកនាយករដ្ឋមន្រ្តី ហ៊ុន សែន ថាបានព្យាយាមលាក់បាំងចំនួននៃការស្លាប់ដោយជំងឺកូវីដ-១៩ និងការហូរចូលរបស់ប្រជាជនចិន។
លោក ដារិទ្ធ បន្ថែមថា ក្រសួងសុខាភិបាល ទើបតែរកឃើញករណីស្លាប់ដំបូងនៃជំងឺកូវីដ-១៩ នៅថ្ងៃទី ១១ ខែមីនា ឆ្នាំ២០២១ ខណៈនៅឆ្នាំ ២០២០ មិនទាន់មានអ្នកស្លាប់ដោយសារផ្លូវដង្ហើមនេះនៅឡើយ។
លោក ចាន់ ដារិទ្ធ បាននិយាយថា បន្ទាប់ពីការស៊ើបអង្កេតរបស់មន្រ្តី ក៏បានរកឃើញមនុស្ស ៦នាក់ផ្សេងទៀត ដែលបានបង្ហោះសារដែលមានខ្លឹមសារស្រដៀងនឹងសាររបស់ព្រះសង្ឃ នូ សុធា ដែរ។
លោក ដារិទ្ធ បានគូសបញ្ជាក់ថា៖«ប្រសិនបើមិនចាត់វិធានការទាន់ពេលវេលាទេ វានឹងបង្កឱ្យមានភាពវឹកវរក្នុងសង្គម។ រហូតមកដល់ពេលនេះ មនុស្សទាំងនេះ នៅតែសកម្មក្នុងការផ្សព្វផ្សាយព័ត៌មានមិនពិតដើម្បីបង្កឱ្យមានភាពវឹកវរក្នុងសង្គម» ។
នៅក្នុងការបង្ហោះនៅលើហ្វេសប៊ុកព្រះសង្ឃ នូ សុធា នៅថ្ងៃទី ២០ ខែមីនា ឆ្នាំ២០២០ ដែលមានចំណងជើងថា៖« [លោក]ហ៊ុន សែន នៅតែជាឃាតករ បន្ទាប់ពីការសម្លាប់រង្គាលនៅស្រុកក្រូចឆ្មា» ។
ព្រះសង្ឃ នូ សុធា បានសរសេរថា៖«[លោក]ហ៊ុនសែននៅមានគំនុំចងអាឃាតជាមួយពលរដ្ឋខ្មែរឥស្លាមតាំងពីសម័យខ្មែរក្រហមមកម៉្លេះ។ កាលណោះ គាត់គឺជាកម្មាភិបាលខ្មែរក្រហមជាន់ខ្ពស់នៅតំបន់បូព៌ាដឹកធ្វើយុទ្ធនាបាញ់សម្លាប់ពលរដ្ឋខ្មែរឥស្លាមរាប់ម៉ឺននាក់។ ក្នុងស្រុកក្រូចឆ្មា ខេត្តកំពង់ចាម នាឆ្នាំ១៩៧៧ មុននឹងភៀសខ្លួនទៅប្រទេសវៀតណាម។ ប៉ុន្តែឥឡូវនេះ គាត់កំពុងបន្តចង់គំនុំនេះដល់ខ្មែរទាំង៧៩នាក់ដោយដាក់បញ្ជាឱ្យមានកូវីដ-១៩ ហាក់ដូចជាធ្វើបាបពលរដ្ឋរបស់ខ្លួន ដើម្បីសងសឹកនឹងម៉ាឡេស៊ីទៅវិញ»។
លោកចាន់ដារិទ្ធ បាននិយាយថា ព្រះសង្ឃ នូ សុធា នៅប្រទេសកាណាដា ហើយឈ្មោះ រិន រដ្ឋ , ឈ្មោះ រុន ចន្ធី , ម៉ៅ វិបុល , ស៊ឹម សុភា និងឈ្មោះនាង សុឃុន នៅប្រទេសថៃ ខណៈឈ្មោះ ពេជ្រ សំបូរ កំពុងរស់នៅប្រទេសបារាំង។
ប្រធានការិយាល័យស៊ើបអង្កេតលោក ដារិទ្ធ បាននិយាយទៀតថា អាជ្ញាធរបានកំណត់ឈ្មោះ ម៉ៅ វិបុល, រិន រដ្ឋ និង រុន ចន្ធី គឺជាម្ចាស់គណនីហ្វេសប៊ុកឈ្មោះក្រុមអ្នកប្រយុទ្ធ CNRP ដែលមានមូលដ្ឋាននៅប្រទេសថៃ និងតែងតែបង្ហោះបញ្ចេញមតិរិះគន់រដ្ឋាភិបាល។
បន្ទាប់ពីលោកចាន់ដារិទ្ធបានបំភ្លឺរួច ដោយមិនមានសំណួរអ្វីបន្ថែមនោះ ព្រះរាជអាជ្ញាលោក ទី មុនិន្ទ បានធ្វើការសន្និដ្ឋានចុងក្រោយ ដោយអះអាងថា សកម្មជនបក្សប្រឆាំងទាំង ៧នាក់នោះ បានបង្ហោះសារក្នុងន័យញុះញង់ពលរដ្ឋ និងបង្កឱ្យមានការព្រួយបារម្ភ ហើយផលប៉ះពាល់ដល់សង្គម។
លោកបានមានប្រសាសន៍ថា៖ «អំពើរបស់ជនជាប់ចោទទាំង ៧នាក់ ពិតជាប៉ះពាល់ដល់សណ្តាប់ធ្នាប់សាធារណៈ និងសន្តិសុខសង្គម ទាក់ទងនឹងជំងឺកូវីដ-១៩»។
លោកបានបន្ថែមថា៖ «ដូច្នេះ តំណាងអយ្យការរក្សាបទចោទប្រកាន់លើមនុស្សទាំង ៧នាក់ និងសុំឱ្យតុលាការផ្តន្ទាទោសជនទាំង ៧នាក់នេះ តាមច្បាប់»។
សកម្មជនគណបក្សសង្គ្រោះជាតិដែលកំពុងភៀសខ្លួននៅប្រទេសថៃ លោក រិន រដ្ឋ បានប្រាប់វីអូឌីតាមបណ្ដាញសង្គមនៅថ្ងៃនេះថា លោកបានទាក់ទងមេធាវីរបស់គណបក្សប្រឆាំងសង្គ្រោះជាតិ កាលពីសប្តាហ៍មុន ដើម្បីតំណាងលោក និងមនុស្សបួននាក់ផ្សេងទៀត។ លោកបន្តថា ពួកគាត់មិនអាចទទួលយកបទចោទ«ញុះញង់» ដោយសារ ពួកគាត់មិនប្រព្រឹត្តបទល្មើសដូចតុលាការចោទប្រកាន់ឡើយ។
លោកថា៖ «រាល់ការបញ្ចេញមតិលើបណ្ដាញសង្គមហ្វេសប៊ុក ក៏ដូចជា ការធ្វើសកម្មភាព និងចលនារបស់ខ្ញុំហ្នឹងអនុឡោមតាមច្បាប់ដែលមានចែងក្នុងរដ្ឋធម្មនុញ្ញ អ៊ីចឹងខ្ញុំអត់មានធ្វើអីហួសព្រំដែននៃច្បាប់ទេ»។
ចំណែក សកម្មជនម្នាក់ទៀត លោក នាង សុឃុន លើកឡើងថា រូបលោក និងអ្នកផ្សេងមិនជំនឿទៅលើតុលាការថា អាចនឹងផ្ដល់យុត្តិធម៌ឱ្យពួកគាត់ឡើយ ។
លោកថា៖ «ចំពោះខ្ញុំមើលឃើញប្រព័ន្ធយុត្តិធម៌នៅកម្ពុជាបច្ចុប្បន្ននេះ វាលែងទៅជាប្រព័ន្ធយុត្តិធម៌សម្រាប់បម្រើ និងការពារផលប្រយោជន៍ ប្រជាពលរដ្ឋ វាទៅជាប្រព័ន្ធអយុត្តិធម៌សម្រាប់ធ្វើទុក្ខបុកម្នេញប្រជាពលរដ្ឋ។ ចំពោះការ បើកសវនាការឬកាត់ក្ដី លើរូបខ្ញុំ ក៏ដូចជាសកម្មជនផ្សេងៗទៀត ខ្ញុំមើលឃើញថា តុលាការមិនអាចផ្ដល់ជូនខ្ញុំក៏ដូចជា បងប្អូនដែលត្រូវតុលាការកាត់ទោសទេ»។
លោកមេធាវី សំ សុគង់ មិនអាចទាក់ទងសុំការអត្ថាធិប្បាយបានទេ ជុំវិញអវត្តមានរបស់លោកនៅក្នុងអង្គសវនាការនៅថ្ងៃព្រហស្បតិ៍នេះ។
យ៉ាងណាក៏ដោយ ក្រោយពីសាកសួរប្រធានការិយាល័យស៊ើបអង្កេត និងអនុវត្តនីតិវិធីនៃអគ្គស្នងការដ្ឋាននគរបាលជាតិលោក ចាន់ ដារិទ្ធ រួចនោះ ចៅក្រមជំនុំជម្រះលោកស្រី អ៊ុក រ៉េតគន្ធា បានលើកពេលប្រកាសសាលក្រមទៅថ្ងៃទី៩ ខែកញ្ញា ខាងមុខនេះ ៕