អ្នកឆ្លងជំងឺកូវីដ-១៩បំប្លែងថ្មី ក្នុងរយៈពេលជាង៥ខែមកនេះបានកើនដល់ជាង១ ៥០០នាក់ នៅក្នុងរាជធានី-ខេត្តចំនួន២៣។
សេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី២៧ ខែសីហា ឆ្នាំ២០២១ បានឱ្យដឹងថា យោងតាមលទ្ធផលនៃការវិភាគដោយវិទ្យាស្ថានប៉ាស្ទ័រកម្ពុជា គិតចាប់តាំងពីថ្ងៃទី៣១ ខែមីនា រហូតដល់ថ្ងៃទី២៦ ខែសីហានេះ បានរកឃើញករណីឆ្លងវីរុសកូវីដ-១៩បំប្លែងថ្មី ប្រភេទ B.1.6172 (Delta) ទៅលើប្រជាពលរដ្ឋនិងអ្នកមកពីបរទេសសរុបចំនួន១ ៥៣៤នាក់ ហើយបង្កផលប៉ះពាល់ដល់ទៅ២៣រាជធានី-ខេត្ត លើកឡើងតែខេត្តកែប និងខេត្តក្រចេះប៉ុណ្ណោះ។
ក្រសួងបន្តថា វីរុសកូវីដ-១៩ ប្រភេទ “ដែលតា” (Data) នេះ កំពុងតែរាតត្បាតវាយលុកចូលក្នុងសហគមន៍ ជាពិសេសរាជធានីភ្នំពេញ ខេត្តឧត្ដរមានជ័យ សៀមរាប ព្រះវិហារ កំពង់ចាម កំពង់ធំ កណ្ដាល បន្ទាយមានជ័យ និងបណ្ដាខេត្តមួយចំនួនទៀត ហើយការឆ្លងរីករាលដាលពេលបច្ចុប្បន្ននេះមានសន្ទុះកើនឡើងខ្លាំងទៅលើយុវវ័យ ដែលភាគច្រើនក្រុមនេះតែងតែដើរចេញក្រៅផ្ទះនិងមានការជួបជុំមិត្តភក្តិជាដើម។
ករណីនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានក្រើនរម្លឹកជាថ្មីដល់ប្រជាពលរដ្ឋទាំងអស់បន្តការប្រុងប្រយ័ត្ននិងការពារខ្លួន ដោយត្រូវអនុវត្តតាមវិធានសុខាភិបាល ជាពិសេសចៀសវាងការប្រមូលផ្តុំមនុស្សច្រើន។
បើតាមរបាយការណ៍របស់ក្រសួងសុខាភិបាល គិតត្រឹមព្រឹកថ្ងៃសុក្រនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៩១ ៣៦៩នាក់ ក្នុងនោះ អ្នកជំងឺព្យាបាលជាសះស្បើយចំនួន៨៧ ២៩៩នាក់ អ្នកស្លាប់កើនដល់ចំនួន១ ៨៥៨នាក់ និងករណីនាំចូលពីក្រៅប្រទេសចំនួន១៤ ៧០៨នាក់៕