ស្ថានទូតកម្ពុជាប្រចាំសហរដ្ឋអាមេរិក អំពាវនាវដល់ប្រជាពលរដ្ឋនិងសិស្សនិស្សិតដែលកំពុងរស់នៅលើទឹកដីសហរដ្ឋអាមេរិក ឈប់ទិញនិងប្រើប្រាស់ផលិតផលគុយទាវក្រៀមកញ្ចប់ដែលមានឈ្មោះថា «គុយទាវភ្នំពេញ» ក្រោយស្ថានទូតរកឃើញថា ជាប្រភេទផលិតផលក្លែងក្លាយ។
យោងតាមសេចក្តីប្រកាសព័ត៌មានរបស់ស្ថានទូតខ្មែរប្រចាំសហរដ្ឋអាមេរិក នៅថ្ងៃទី២៦ ខែសីហា បានលើកឡើងថា ថ្មីៗនេះ ស្ថានទូតបានរកឃើញនូវផលិតផលគុយទាវកញ្ចប់ក្រៀមដែលមានឈ្មោះថា «គុយទាវភ្នំពេញ» និងមាន «រូបសញ្ញាប្រាសាទអង្គរវត្ត» កំពុងដាក់លក់នៅតាមបណ្តាផ្សារអាស៊ី ក្នុងតំបន់ឆ្នេរខាងកើតសហរដ្ឋអាមេរិក ដែលវាមិនមែនជាផលិតផលរបស់កម្ពុជាទេ។
សេចក្តីប្រកាសព័ត៌មានដដែលបញ្ជាក់ថា ផលិតផលទាំងនេះមិនមានការអនុញ្ញាតពីអាជ្ញាធរកម្ពុជានោះទេ ដែលករណីនេះ ជាការរំលោភយ៉ាងធ្ងន់ធ្ងរទៅកិច្ចព្រមព្រៀងនិងសន្ធិសញ្ញាអន្តរជាតិ ជាពិសេសការប្រើប្រាស់ម៉ាក«គុយទាវភ្នំពេញ» ធ្វើឱ្យអ្នកប្រើប្រាស់ទូទៅមានការភ័ន្តច្រឡំអំពីប្រភពដើមនៃផលិតផលគុយទាវកញ្ចប់របស់កម្ពុជា។
យ៉ាងណា គិតមកដល់ពេលនេះ ស្ថានទូតបានស្រាវជ្រាវឃើញនិងកំណត់មុខសញ្ញាអ្នកក្លែងបន្លំម៉ាកយីហោរួចហើយ ព្រមទាំងបានចាត់អនុពន្ធពាណិជ្ជកម្មអមស្ថានទូតជួបដោះស្រាយជាមួយភាគីក្រុមហ៊ុនហើយដែរ។ ទន្ទឹមនឹងនេះ ស្ថានទូតខ្មែរប្រចាំសហរដ្ឋអាមេរិកក៏បានព្រមានដែរថា ប្រសិនបើរកឃើញថា ក្រុមហ៊ុននេះនៅតែបន្តសកម្មភាពទៀតនោះ ស្ថានទូតនឹងដាក់ចេញវិធានការចាំបាច់ទៅតាមនីតិវិធីច្បាប់៕
