ក្រសួងសុខាភិបាលផ្តល់សិទ្ធិដល់សេវាសុខាភិបាលឯកជនដែលមានច្បាប់អនុញ្ញាតត្រឹមត្រូវ អាចមានសិទ្ធិផ្តល់សេវាថែទាំនិងព្យាបាលអ្នកជំងឺកូវីដ-១៩កម្រិតស្រាលនៅតាមផ្ទះបាន ប៉ុន្តែត្រូវគោរពលក្ខខណ្ឌចាំបាច់មួយចំនួន។
សេចក្តីជូនព័ត៌មានរបស់ក្រសួងសុខាភិបាល ចុះថ្ងៃទី៣០ ខែសីហា ឆ្នាំ២០២១ បានលើកឡើងថា ការអនុញ្ញាតនោះគឺធ្វើឡើងសម្រាប់តែមូលដ្ឋានសុខាភិបាល រួមមាន មន្ទីរពេទ្យ មន្ទីរពហុព្យាបាល និងមន្ទីរសម្រាកព្យាបាល ដែលមានច្បាប់អនុញ្ញាតពីក្រសួងសុខាភិបាល និងត្រូវមានគ្រូពេទ្យនិងបុគ្គលិកបានបណ្តុះបណ្តាលត្រឹមត្រូវសម្រាប់ផ្តល់សេវានិងព្យាបាលពីក្រុមគ្រូបង្គោលថ្នាក់ជាតិនៃក្រសួងសុខាភិបាលតែប៉ុណ្ណោះ។
ក្រសួងបន្តថា៖ «ក្រុមគ្រូពេទ្យទាំងនោះត្រូវបានចាត់ដោយឡែកពីក្រុមគ្រូពេទ្យព្យាបាលអ្នកជំងឺធម្មតា ហើយក្រុមគ្រូពេទ្យទាំងនោះត្រូវធ្វើចត្តាឡីស័ករយៈពេល១៤ថ្ងៃ បន្ទាប់ពីបានថែទាំព្យាបាលអ្នកជំងឺកូវីដ-១៩»។
ក្រសួងសុខាភិបាលបន្តថា មូលដ្ឋានសេវាសុខាភិបាលឯកជនទាំងនោះត្រូវត្រៀមទុកជាមុន ក្នុងករណីជំងឺវិវត្តធ្ងន់ធ្ងរ ដោយធានាឱ្យមានប្រព័ន្ធបញ្ជូនជំងឺតាមបទដ្ឋានបច្ចេកទេសត្រឹមត្រូវពីផ្ទះ ទៅសេវាសុខាភិបាលឯកជនដែលមានច្បាប់អនុញ្ញាតឱ្យផ្តល់សេវា ឬសេវាសាធារណៈដែលមានព្យាបាលកូវីដ-១៩។
ក្រៅពីនោះ ក្រសួងថា ការផ្តល់សេវាថែទាំព្យាបាលអ្នកជំងឺកូវីដ-១៩កម្រិតស្រាលនៅតាមផ្ទះ ក៏ត្រូវមានការអនុញ្ញាតពីអាជ្ញាធរមូលដ្ឋាន ដូចជា ចៅសង្កាត់ឬមេឃុំ និងមន្ត្រីសុខាភិបាលនៃការិយាល័យសុខាភិបាលស្រុកប្រតិបត្តិដែលអ្នកជំងឺតាំងនៅផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃចន្ទនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៩២ ៦១៦នាក់ ក្នុងនោះ អ្នកជំងឺព្យាបាលជាសះស្បើយចំនួន៨៨ ៤៤៣នាក់ អ្នកស្លាប់កើនដល់ចំនួន១ ៨៩២នាក់ និងករណីនាំចូលពីក្រៅប្រទេសចំនួន១៥ ០២៩នាក់៕