រាជរដ្ឋាភិបាលពង្រឹងការអនុវត្តយុទ្ធនាការជាតិចាក់វ៉ាក់សាំងកូវីដ-១៩ ជុំទី១ ដើម្បីបើកដំណើរការប្រទេសពេញលេញឡើងវិញលើគ្រប់វិស័យ ដោយយុទ្ធនាការចាក់វ៉ាក់សាំងកូវីដ-១៩ជុំទី១នេះ ត្រូវបានគេរំពឹងថា នឹងអាចបញ្ចប់នៅចុងខែតុលាឬដើមខែវិច្ឆិកាខាងមុខនេះ មុនផែនការដែលបានគ្រោងទុក។
សេចក្ដីណែនាំរបស់រដ្ឋាភិបាលកាលពីចុងសប្តាហ៍មុន ដែលបានផ្ញើជូនដល់គ្រប់ក្រសួង-ស្ថាប័ន គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ គណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេស គណៈអភិបាលរាជធានី-ខេត្ត និងយន្តការដែលមានការពាក់ព័ន្ធផ្សេងទៀត បានលើកឡើងថា រាជរដ្ឋាភិបាលពង្រឹងការអនុវត្តនេះ ក្នុងគោលបំណងបង្កើនល្បឿននៃការចាក់វ៉ាក់សាំងឱ្យបានឆាប់រហ័ស និងអាចឈានទៅបិទបញ្ចប់យុទ្ធនាការជាតិចាក់វ៉ាក់សាំងកូវីដ-១៩ ជុំទី១ នាពេលដ៏ខ្លីខាងមុខនេះ។
ដើម្បីយកចិត្តទុកដាក់ក្នុងការពង្រឹងការអនុវត្តការងារមួយចំនួនបន្ថែមទៀត រដ្ឋាភិបាលបានគូសបញ្ជាក់ក្នុងសេចក្តីណែនាំថា៖ «គណៈអភិបាលរាជធានី-ខេត្ត ត្រូវប្រមូលផ្ដុំការយកចិត្តទុកដាក់និងការខិតខំប្រឹងប្រែងលើការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ ដោយចាត់ទុកជាការងារស្នូលអាទិភាពខ្ពស់បំផុតរបស់ខ្លួន ជាពិសេសត្រូវសម្រេចឱ្យបានឆាប់រហ័សនូវការចាក់វ៉ាក់សាំងជូនប្រជាជននៅក្នុងមូលដ្ឋានក្រោមសមត្ថកិច្ចរបស់ខ្លួន ដែលជាខ្សែក្រវាត់ការពារទី១ និងជាយុទ្ធសាស្រ្តគន្លឹះរបស់រាជរដ្ឋាភិបាលក្នុងសមរភូមិប្រយុទ្ធនឹងជំងឺកូវីដ-១៩»។
សេចក្ដីណែនាំដដែលបន្តថា គណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេស ត្រូវពង្រឹងយន្តការតាមដាននិងត្រួតពិនិត្យលើវឌ្ឍនភាពនៃការអនុវត្តការងារចាក់វ៉ាក់សាំងកូវីដ-១៩ប្រចាំថ្ងៃរបស់ខ្លួន ព្រមទាំងត្រូវពង្រឹងយន្តការឆ្លើយតបឱ្យបបានទាន់ពេលវេលាជូនប្រជាជនជាក់ស្ដែងនៅក្នុងមូលដ្ឋាននីមួយៗ និងតាមអភិក្រម «មិនអនុញ្ញាតឱ្យមានវ៉ាក់សាំងដេកក្នុងឃ្លាំង ក្នុងពេលដែលប្រជាជនត្រូវការវ៉ាក់សាំងនោះទេ»។
បន្ថែមពីនេះ គណៈអភិបាលរាជធានី-ខេត្តត្រូវរៀបចំធ្វើបច្ចុប្បន្នភាពឡើងវិញឱ្យបានច្បាស់លាស់និងឆាប់រហ័សអំពីចំនួនប្រជាជនជាក់ស្ដែងនៅមូលដ្ឋានដែលត្រូវចាក់វ៉ាក់សាំងកូវីដ-១៩ ជាពិសេសនៅកម្រិតថ្នាក់ឃុំ-សង្កាត់ និងញែកចេញចំនួនប្រជាជនចំណាកស្រុកដែលអាចទទួលការចាក់វ៉ាក់សាំងកូវីដ-១៩នៅទីកន្លែងផ្សេងៗ ដើម្បីមានមូលដ្ឋានច្បាស់លាស់ក្នុងការកែសម្រួលផែនការចាក់វ៉ាក់សាំង ដោយផ្អែកតាមចំនួនប្រជាជនជាក់ស្ដែងនៅក្នុងមូលដ្ឋាន ក៏ដូចជាឈានទៅសម្រេចបិទបញ្ចប់យុទ្ធនាការចាក់វ៉ាក់សាំងកូវីដ-១៩នៅមូលដ្ឋាននោះ ព្រមទាំងពង្រឹងនូវវិធានការមួយចំនួនទៀតផងដែរ។
របាយការណ៍ស្តីពីចំនួនអ្នកចាក់វ៉ាក់សាំងការពារជំងឺកូវីដ-១៩នៅក្នុងក្របខណ្ឌក្រសួងសុខាភិបាល និងក្រសួងការពារជាតិ គិតត្រឹមយប់ថ្ងៃទី២៩ ខែសីហា ឆ្នាំ២០២១ បង្ហាញថា មានពលរដ្ឋនៅទូទាំងប្រទេសសរុបចំនួន១០ ៥៦២ ៩៩៥នាក់ ដែលបានចាក់វ៉ាក់សាំងប្រឆាំងជំងឺផ្លូវដង្ហើមមួយនេះ៕