ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រយៈពេលជាង១ឆ្នាំមកនេះ ក្រុមហ៊ុនជិត៨០០០បានចុះបញ្ជីអាជីវកម្មរបស់ពួកគេតាមថ្នាលបច្ចេកវិទ្យាព័ត៌មាន ក្នុងនោះមានដើមទុនសរុបជិត៣ ០០០លានដុល្លារអាមេរិក។
យោងតាមសុន្ទរកថារបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ក្នុងពិធីប្រកាសដាក់ដំណើរការជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដំណាក់កាលទី២ នៅថ្ងៃពុធនេះ បានឱ្យដឹងថា កម្ពុជាបានដាក់ឱ្យដំណើរការប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដំណាក់កាលទី១ កាលពីថ្ងៃទី១៥ ខែមិថុនា ឆ្នាំ២០២០ ដើម្បីកែសម្រួលបិរយាកាសធុរកិច្ចនិងវិនិយោគនៅកម្ពុជា និងចួលរួមចំណែកដល់ការរក្សានិរន្តរភាពនៃសកម្មភាពសេដ្ឋកិច្ច ក្នុងបរិការណ៍នៃការឆ្លងរាលដាលជំងឺកូវីដ-១៩។
លោកបន្តថា ក្នុងរយៈពេលជាង១ឆ្នាំកន្លងមក ប្រព័ន្ធចុះបញ្ជីអាជីវកម្មបានដំណើរការឥតដាច់ និងបានអនុញ្ញាតឱ្យធុរជន អាចស្នើសុំចុះបញ្ជីអាជីវកម្មបាន ក្នុងនោះ គិតត្រឹមថ្ងៃទី២៤ ខែសីហា ឆ្នាំ២០២១ ក្រុមហ៊ុនដែលបានចុះបញ្ជីអាជីវកម្មតាមថ្នាល់បច្ចេកវិទ្យាព័ត៌មាន មានចំនួន៧ ៧១៥ក្រុមហ៊ុន និងមានដើមទុនសរុបជិត៣ ០០០លាន់ដុល្លារអាមេរិក។
លោករដ្ឋមន្ត្រីបន្តថា វិស័យចំនួន៥ ដែលមានទំហំដើមទុនធំជាងគេ ក្នុងនោះ វិស័យសំណង់ចំនួន២៥,៣២ភាគរយ, អាហរ័ណនីហរ័ណ ទិញលក់ ជួសជុលយានយន្តនិងទោចក្រយានយន្តគ្រប់ប្រភេទ ចំនួន១៦,៤៤ភាគរយ, សកម្មភាពអចលនវត្ថុ ចំនួន១៥,៥៣ភាគរយ, កម្មន្តសាល ចំនួន១៤,៣ភាគរយ និងសកម្មភាពហិរញ្ញវត្ថុ និងធានារ៉ាប់រង ចំនួន៨,២២ភាគរយ។
លោកបានគូសបញ្ជាក់ថា៖ «សម្រាប់ដំណាក់កាលទី២នេះ នឹងអនុញ្ញាតឱ្យធុរជនអាចចាប់ផ្តើមអាជីវកម្មរបស់ខ្លួនបានពេញលេញ ស្របតាមបទប្បញ្ញត្តិដែលមានជាធរមាន តាមរយៈការដាក់ស្នើសុំអាជ្ញាបណ្ណឬលិខិតអនុញ្ញាតផ្សេងៗ បង់ថ្លៃសេវាតាមរយៈប្រព័ន្ធទូទាត់បង់ប្រាក់ឌីជីថល និងទាញយកវិញ្ញាបនបត្រឬលិខិតអនុញ្ញាត ជាទម្រង់ឌីជីថលពីទីណាក៏បាន នៅពេលណាក៏បាន ដោយមិនចាំបាច់ធ្វើដំណើរឬមកជួបជាមួយមន្ត្រី»។
ជាមួយគ្នានេះដែរ លោក អូន ព័ន្ធមុនីរ័ត្ន ក៏បានស្នើដល់ក្រុមការងារអន្តរក្រសួងរៀបចំការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន បន្តខិតខំផ្តល់ការគាំទ្រជាប្រចាំ និងដោះស្រាយបញ្ហាប្រឈមផ្នែកបច្ចេកទេសឬបញ្ហាប្រឈមផ្សេងទៀត ដើម្បីឱ្យប្រព័ន្ធនេះដំណើរការដោយរលូន ឆ្លើយតបនឹងតម្រូវការជាក់ស្តែងរបស់អ្នកប្រើប្រាស់។ លោកក៏បានជំរុញដល់ក្រុមការងារនេះពង្រីកវិសាលភាពនៃប្រព័ន្ធអាជ្ញាបណ្ណឬលិខិតអនុញ្ញាត និងបន្តគ្របដណ្តប់ដល់វិស័យផ្សេងៗទៀត និងបញ្ចូលនូវសេវាសំខាន់ៗនិងចាំបាច់នានាសម្រាប់ផ្តល់នូវការសម្រួលបន្ថែមដល់ការធ្វើធុរកិច្ចនៅកម្ពុជាផងដែរ៕