ពលរដ្ឋជិត១០០នាក់ដែលមានជម្លោះដីធ្លីនៅស្រុកកណ្ដាលស្ទឹង ខេត្តកណ្ដាល បានលើកគ្នាតវ៉ាប្រឆាំងនឹងបុគ្គលិកក្រុមហ៊ុនធ្វើព្រលានយន្តហោះថ្មី (OCIC) ដែលយកគ្រឿងចក្រទៅឈូសឆាយផ្តាច់ផ្លូវលើដីមានជម្លោះ ខណៈពួកគាត់នៅមិនទាន់ទទួលបានការដោះស្រាយសមរម្យនៅឡើយ។
តំណាងពលរដ្ឋមានជម្លោះដីធ្លីនៅស្រុកកណ្តាលស្ទឹងម្នាក់ លោក សួង ពៅ បានអះអាងថា ការតវ៉ានេះធ្វើឡើងនាព្រឹកថ្ងៃទី០១ ខែកញ្ញានេះ ខណៈបុគ្គលិកក្រុមហ៊ុន OCIC បានប្រើគ្រឿងចក្រឈូសឆាយផ្តាច់ផ្លូវនៅក្នុងទីតាំងដីដែលកំពុងមានជម្លោះ។
លោកបន្តថា បើសិនជាអាជ្ញាធរមិនព្រមរកដោះស្រាយឱ្យក្រុមហ៊ុនលុបផ្លូវដែលបានជីកនោះឡើងវិញទេ ប្រជាពលរដ្ឋនឹងប្រមូលម្ដុំគ្នាជីកកកាយលុបដោយខ្លួនឯង។ លើសពីនេះ លោកថា ពលរដ្ឋនៅតែទាមទារឱ្យក្រុមហ៊ុនផ្តល់សំណងសមរម្យដល់ពួកគាត់ មុនធ្វើសកម្មភាពឈូសឆាយណាមួយបន្តទៀត។
លោកបន្តថា៖ «អាជ្ញាធរនៅតែមាននិន្នាការទៅខាងក្រុមហ៊ុន នៅតែលើកឡើងថា ផ្លូវហ្នឹងជាផ្លូវរដ្ឋ។ អ៊ីចឹងក្រុមហ៊ុនកាយៗផ្លូវរដ្ឋ បើជាផ្លូវរបស់រដ្ឋ ប្រជាពលរដ្ឋក៏មានសិទ្ធិប្រើប្រាស់ផ្លូវហ្នឹង ក្រុមហ៊ុនក៏មានសិទ្ធិក្នុងការប្រើប្រាស់ផ្លូវហ្នឹងដូចគ្នា។ នៅពេលដែលក្រុមហ៊ុនកាយផ្លូវហ្នឹងផ្ដាច់ ប្រជាពលរដ្ឋមានផ្លូវណាចូលទៅផ្ទះ? មានផ្លូវណាចូលទៅស្រែ? គាត់ [អាជ្ញាធរ] នៅតែថា ក្រុមហ៊ុនធ្វើហ្នឹងត្រូវ»។
លោក សួង ពៅ បានអះអាងថា កាលពីល្ងាចម្សិលមិញ លោកបានឃើញអភិបាលស្រុកកណ្តាលស្ទឹង លោក អួច សៅវឿន និងអធិការស្រុក ដែលមានកម្លាំងជិត៣០នាក់ បានចុះទៅពិនិត្យកន្លែងកើតហេតុ ហើយព្រឹកថ្ងៃនេះ ក៏ស្រាប់តែឃើញមានកាយដីផ្ដាច់ផ្លូវចូលទៅដីរបស់ពួកគាត់តែម្តង។
លោកបន្តថា៖ «បើសិនជាអាជ្ញាធរអត់លុបវិញទេ ប្រជាពលរដ្ឋគាត់នឹងនាំគ្នាយកចប យកបង្គី កាយលុបវិញហើយ យ៉ាងយូរបំផុតព្រឹកស្អែក។ ដំបូង ពួកគាត់អត់ធ្វើអ៊ីចឹងទេ ប៉ុន្តែបើអាជ្ញាធរមិនមានសមត្ថភាពសម្របសម្រួលជាមួយក្រុមហ៊ុន មានតែប្រជាពលរដ្ឋធ្វើខ្លួនឯង»។
ឆ្លើយតបបញ្ហានេះ អភិបាលស្រុកកណ្ដាលស្ទឹង លោក អ៊ូច សៅរឿន បានលើកឡើងថា បញ្ហាកាយដីផ្ដាច់ផ្លូវនេះជាផែនការរបស់រដ្ឋាភិបាល ហើយរដ្ឋក៏បានសម្រេចធ្វើផ្លូវវាងជូនពលរដ្ឋរួចហើយដែរ។ លោកបន្តថា មិនមានដំណោះស្រាយអ្វីផ្សេងនោះទេ ព្រោះផ្លូវនេះជាផ្លូវរបស់រដ្ឋ ដូច្នេះរដ្ឋអាចដោះដូរបាន ដូចដែលមានចែងនៅក្នុងច្បាប់រួចមកហើយដែរ។
លោកបន្តថា៖ «ដីគាត់ដែលក្រុមហ៊ុនអត់ទាន់ទិញ ក្រុមហ៊ុនអត់ឈូសទេ ដីគាត់ដែលអត់ទាន់ដោះស្រាយ។ ប៉ុន្តែទំនប់ប្រឡាយជាទ្រព្យរបស់រដ្ឋ រដ្ឋមានសិទ្ធិចាត់ចែង ហើយការដោះស្រាយ ផ្លូវវាង គេទើបតែធ្វើឱ្យហើយ ខាងរដ្ឋាភិបាលធ្វើសងវិញហើយ»។
លោកបានអះអាងថា ចំពោះការទាមទាររបស់ប្រជាពលរដ្ឋ គឺជារឿងរបស់ពលរដ្ឋ ចំណែករដ្ឋាភិបាលបានដោះស្រាយរួចមកហើយ ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សូផាត មានប្រសាសន៍ថា សកម្មភាពរបស់អាជ្ញាធរធ្វើមកលើពលរដ្ឋបែបនេះ មិនមែនជាការដោះស្រាយដ៏ត្រឹមត្រូវនោះទេ។ លោកថា បញ្ហានេះ គួរតែរកការដោះស្រាយមួយសមរម្យដែលមានកិច្ចសហការល្អជាមួយនឹងពលរដ្ឋជាមុន។
លោក វណ្ណ សូផាត បន្តថា៖ «គួរតែអាជ្ញាធររកដំណោះស្រាយសមស្របដែលពលរដ្ឋរងផលប៉ះពាល់ហ្នឹង គាត់គួរតែទទួលបានតម្លៃណាដែលសមរម្យ យុត្តិធម៌ ដើម្បីទិញដីនៅខាងក្រៅបាន ដើម្បីគាត់រករបរទទួលទានបន្តទៅទៀត ឬមួយក៏ដោះដូរដីក៏ដោយ ឱ្យតែគាត់អាចទទួលយកបាន»។
គម្រោងសាងសង់អាកាសយានដ្ឋានអន្តរជាតិភ្នំពេញថ្មី គឺជាគោលការណ៍សម្រេចរបស់រាជរដ្ឋាភិបាលលើផ្ទៃដីទំហំ២ ៦០០ហិកតា ក្នុងនោះ ស្ថិតក្នុងខេត្តកណ្តាល ទំហំ២ ៤២៦ហិកតា និងខេត្តតាកែវ ១៧៤ហិកតា។
ក្នុងខេត្តកណ្តាល ផ្ទៃដីនៅក្នុងគម្រោងអភិវឌ្ឍន៍នេះ រួមមាន ស្រុកកណ្តាលស្ទឹង និងស្រុកស្អាង ដែលមាន៤ឃុំ ស្មើនឹង១៣ភូមិ មានផ្ទៃដីសរុបទំហំ២ ៤២៦ហិកតា ស្មើនឹង ៩៣% នៃទំហំផ្ទៃដីគម្រោងសរុប៕
