រដ្ឋាភិបាលសម្រេចច្រានចោលសំណើរបស់ក្រុមហ៊ុនសំណង់ «ឈ្នះឈ្នះ» ដែលស្នើទិញដីបឹងជាង១ ០០០ហិកតា នៅស្រុកល្វាឯម ខេត្តកណ្តាល ដើម្បីអភិវឌ្ឍជាទីក្រុងរណបបែបទំនើបនិងហេដ្ឋារចនាសម្ព័ន្ធសំខាន់ៗ។
លិខិតរបស់ទីស្តីការគណៈរដ្ឋមន្ត្រីដែលវីអូឌីទទួលបាននៅថ្ងៃទី២ ខែកញ្ញានេះ បានលើកឡើងថា ក្រុមហ៊ុនសំណង់ «ឈ្នះឈ្នះ» បានស្នើតាមរយៈក្រសួងកសិកម្ម និងរដ្ឋបាលខេត្តកណ្តាល ថាខ្លួនចង់ទិញដីរដ្ឋជាង១ ០០០ហិកតា នៅក្នុងឃុំបារុង ស្រុកល្វាឯម ខេត្តកណ្តាល ដើម្បីអភិវឌ្ឍជាទីក្រុងរណបបែបទំនើបនិងហេដ្ឋារចនាសម្ព័ន្ធសំខាន់ៗ។
ករណីនេះ ទីស្តីការគណៈរដ្ឋមន្ត្រីបានច្រានចោលការស្នើសុំទិញដីរដ្ឋនោះ ព្រមទាំងប្រាប់ទៅក្រសួងកសិកម្ម និង រដ្ឋបាលខេត្តកណ្តាល ត្រូវបញ្ឈប់ទទួលសំណើរបស់ក្រុមហ៊ុនសំណង់ «ឈ្នះឈ្នះ» ដែលស្នើទិញដីផ្ទៃបឹងធម្មជាតិនេះបន្តទៀត ព្រោះរដ្ឋសម្រេចរក្សាទីតាំងដីនោះសម្រាប់បម្រើប្រយោជន៍សាធារណៈ ខណៈរដ្ឋាភិបាលគ្រោងជីកបឹងនោះឱ្យបានជ្រៅ ដើម្បីរក្សាទឹកទុកថែមទៀតផង។
លិខិតមានខ្លឹមសារដូច្នេះថា៖ «ក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តកណ្តាល ត្រូវបញ្ឈប់ការទទួលនិងលើកសំណើដីតំបន់នោះមកទៀត»។
អ្នកនាំពាក្យប្រតិកម្មរហ័ស នៃទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃព្រហស្បតិ៍នេះ បន្ថែមលើលិខិតនោះថា ដើមចមដែលរដ្ឋាភិបាលសម្រេចមិនលក់ដីផ្ទៃបឹងធម្មជាតិទៅឱ្យក្រុមហ៊ុនឯកជន ដោយសាររដ្ឋាភិបាលរក្សាទុកទឹកនិងត្រីទុកជាប្រយោជន៍ជូនប្រជាពលរដ្ឋទូទៅ។
លោកថា៖ «មិនមែនថានាយករដ្ឋមន្ត្រីគ្មានការវិនិច្ឆយពីផលប៉ះពាល់ដល់សាធារណជនដែលជាប្រជារាស្ត្ររបស់លោកនោះទេ លោកតែងតែថ្លឹងថ្លែងអំពីផលចំណេញនិងផលខាតដែលវាប៉ះពាល់ក្នុងការសម្រេចចិត្ត។ ជួនកាលយើងមានការលុបចោលនៃ ស.ជ.ណ ដែលជាជំហររបស់រដ្ឋាភិបាល ដើម្បីឆ្លើយតបទៅនឹងសេចក្តីត្រូវការរបស់ប្រជាពលរដ្ឋ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត គាំទ្ររដ្ឋាភិបាលដែលច្រានចោលការលក់ដីបឹងរបស់រដ្ឋទៅឱ្យក្រុមហ៊ុនឯកជន ព្រោះបឹងធម្មជាតិនេះអាចជួយមួយផ្នែកក្នុងការរំដោះជំនន់ទឹកភ្លៀង រក្សាបាននូវជីវចម្រុះផ្សេងៗ និងផ្តល់ប្រយោជន៍ច្រើនដល់ពលរដ្ឋរស់នៅជុំវិញបឹងធម្មជាតិនោះជាដើម។
លោក អំ សំអាត បន្ថែមថា កន្លងមក រដ្ឋាភិបាលសម្រេចអនុញ្ញាតឱ្យក្រុមហ៊ុនវិនិយោគលុបបឹងមួយចំនួនក្នុងរាជធានីភ្នំពេញ ធ្វើឱ្យមានបញ្ហាប្រឈមច្រើន ដូចជា ជំនន់ទឹកភ្លៀង លិចទីក្រុងទៀតផង។ លោកបញ្ជាក់ថា បើរដ្ឋលក់បឹងនៅខាងល្វាឯម ខេត្តកណ្តាល នឹងជួបបញ្ហាប្រឈមច្រើនដូចការលុបបឹងនៅរាជធានីភ្នំពេញផងដែរ ។
លោកមានប្រសាសន៍ថា៖ «បើសិនជាលក់ផ្ទៃបឹងរបស់រដ្ឋនេះទៅឱ្យក្រុមហ៊ុនឯកជន ថ្ងៃក្រោយទៅ រដ្ឋាភិបាលចង់រកបឹងបម្រុងទុកបញ្ចៀសលូទឹកស្អុយ ជំនន់ទឹកភ្លៀង និងពិបាក ព្រោះនៅប៉ែកអរិយក្សត្រ គម្រោងអភិវឌ្ឍន៍ថ្ងៃក្រោយ បើគ្មានផ្ទៃបឹងស្តុកទឹកទុកទេ វានឹងជួបបញ្ហាច្រើនផងដែរ»។
របាយការណ៍អង្គការសមាគមធាងត្នោតដែលបានចេញផ្សាយកាលពីថ្ងៃទី២៦ ខែធ្នូ ឆ្នាំ២០១៩ ថាបឹងចំនួន២៦ ក្នុងរាជធានីភ្នំពេញ ត្រូវបានលុបទាំងស្រុងចំនួន១៦ ដោយស្មើនឹង៦០%នៃផ្ទៃបឹងសរុប និងបឹងចំនួន១០ផ្សេងទៀតត្រូវបានលុបផ្នែកមួយចំនួននៃបឹង។
របាយការណ៍ដដែលបានបញ្ជាក់ថា មូលហេតុនៃការលុបបឹងទាំងនោះបណ្តាលមកពីការសាងសង់បុរី តំបន់លំនៅឋាន និងទីក្រុងរណប។ របាយការណ៍នេះបង្ហាញថា ការលុបបឹងទាំងនោះជាការបាត់អាងស្តុកទឹកដ៏សំខាន់សម្រាប់រាជធានីភ្នំពេញ និងបង្កឱ្យមានការជន់លិចពេលមានភ្លៀងធ្លាក់ខ្លាំងម្តងៗ៕
