ក្រសួងសុខាភិបាល អនុញ្ញាតឱ្យសណ្ឋាគារមួយចំនួនក្នុងរាជធានីភ្នំពេញ និងខេត្តសៀមរាប ទទួលថែទាំនិងព្យាបាលអ្នកជំងឺកូវីដ-១៩ កម្រិតស្រាល ដោយដាក់ដំណើរការសាកល្បងសិន។
យោងតាមលិខិតរបស់ក្រសួងសុខាភិបាលផ្ញើទៅកាន់អភិបាលរាជធានីភ្នំពេញ និងខេត្តសៀមរាប ចុះថ្ងៃទី០១ ខែកញ្ញា ឆ្នាំ២០២១ បានលើកឡើងថា ក្រសួងសុខាភិបាលនឹងអនុញ្ញាតដាក់ឱ្យដំណើរការសាកល្បងទីតាំងសណ្ឋាគារមួយចំនួនក្នុងរាជធានីភ្នំពេញ និងខេត្តសៀមរាប ជាកន្លែងផ្ដល់សេវាថែទាំនិងព្យាបាលអ្នកជំងឺកូវីដ-១៩ កម្រិតស្រាល។
លិខិតដដែលបញ្ជាក់ថា ឈ្មោះសណ្ឋាគារដែលនឹងដាក់ឱ្យដំណើរការសាកល្បងនេះ នឹងត្រូវចេញផ្សាយដោយរដ្ឋបាលរាជធានីភ្នំពេញ និងរដ្ឋបាលខេត្តសៀមរាប ផ្ទាល់តែម្តង។
ករណីនេះ ក្រសួងបានណែនាំដល់ម្ចាស់សណ្ឋាគារដែលមានបំណងរៀបចំជាកន្លែងផ្ដល់សេវាថែទាំនិងព្យាបាលអ្នកជំងឺកូវីដ-១៩ កម្រិតស្រាល អាចទាក់ទងមកកាន់ក្រសួងសុខាភិបាល តាមរយៈអនុគណៈកម្មការបច្ចេកទេស និងព្យាបាល ដើម្បីទទួលបាននូវការណែនាំអំពីរបៀបនៃការដាក់ពាក្យស្នើសុំការអនុញ្ញាតនេះ៕