មេបញ្ជាការយោធភូមិភាគទី៥ នៃកងទ័ពជើងគោក បានចេញបទបញ្ជាមួយចំនួនក្នុងការទប់ស្កាត់ការនាំចូលរថយន្តចង្កូតស្តាំមកក្នុងប្រទេសកម្ពុជា ក្រោយរដ្ឋាភិបាលបានណែនាំឱ្យទប់ស្កាត់។
យោងតាមបទបញ្ជារបស់កងទ័ពជើងគោកយោធភូមិភាគទី៥ ចុះថ្ងៃទី០១ ខែកញ្ញា បានបញ្ជាទៅមន្ត្រីរបស់ខ្លួនសហការជាមួយកងអង្គភាពនិងស្ថាប័នពាក់ព័ន្ធ ទប់ស្កាត់ឱ្យបានដាច់ខាតនូវការលួចនាំចូលរថយន្តចង្កូតស្តាំ តាមច្រករបៀងនៃបណ្តោយព្រំដែនរវាងកម្ពុជានិងប្រទេសជិតខាង។
បទបញ្ជាដដែលនោះបានព្រមានថា៖ «ករណីមានយោធិនណាគប់គិតក្នុងការលួចនាំចូលរថយន្តចង្កូតស្តាំតាមច្រករបៀងនៅតាមខ្សែបណ្តោយព្រំដែន ល្មើសនឹងសេចក្តីសម្រេចនេះ មេបញ្ជាការកងឯកភាពនោះនឹងត្រូវប្រឈមចំពោះមុខច្បាប់»។
ការចេញបទបញ្ជានេះបានធ្វើឡើងក្រោយពីរដ្ឋាភិបាល កាលពីដើមខែសីហានេះ បានយល់ព្រមលើសំណើរបស់ក្រសួងសេដ្ឋកិច្ច និងហិរញ្ញវត្ថុ ដែលស្នើសុំអនុវត្តវិធានការប្រមូលពន្ធលើមធ្យោបាយដឹកជញ្ជូននិងយានយន្តជំនិះគ្រប់ប្រភេទសម្រាប់ឆ្នាំ២០២១ ដើម្បីពង្រឹងសក្តានុពលចំណូលពន្ធនិងទប់ស្កាត់ការរត់ពន្ធរថយន្តចង្កូតស្តាំដោយខុសច្បាប់។
ក្នុងលិខិតនោះ ក្រសួងបានណែនាំដល់អាជ្ញាធរដែនដី និងកងកម្លាំងប្រដាប់អាវុធ ឱ្យគាំទ្រដល់កម្លាំងរបស់គយក្នុងការទប់ស្កាត់និងបង្ក្រាបការរត់ពន្ធរថយន្តចង្កូតស្តាំចូលមកកម្ពុជា ដោយត្រូវអនុវត្តឱ្យបានម៉ឺងម៉ាត់នូវវិធានការច្បាប់និងគោលនយោបាយហាមឃាត់ការនាំចូលនិងការប្រើប្រាស់រថយន្តចង្កូតស្តាំ ហើយមិនត្រូវជាប់ពាក់ព័ន្ធដោយផ្ទាល់ឬប្រយោល ក្នុងទម្រង់ណាមួយក្នុងការទទួលស្គាល់រថយន្តចង្កូតស្តាំដែលជាប្រភេទរថយន្តខុសច្បាប់នោះឡើយ៕
