អង្គភាព CMAC ក្នុងរយៈពេល៧ខែនេះ បានរុករកឃើញនិងកម្ទេចចោលគ្រាប់មីននិងយុទ្ធភណ្ឌមិនទាន់ផ្ទុះគ្រប់ប្រភេទបានជាង៣១ ០០០គ្រាប់ លើផ្ទះដីចម្ការមីនឬចម្ការគ្រាប់សរុបចំនួនជាង៦៤ ០០០ ០០០ម៉ែត្រក្រឡា។
អគ្គនាយកអង្គភាពស៊ីម៉ាក់ លោក ហេង រតនា បានឱ្យដឹងនៅលើទំព័រហ្វេសប៊ុករបស់លោកកាលពីថ្ងៃទី៣០ ខែសីហា ថា គិតត្រឹមរយៈពេល៧ខែ ឆ្នាំ២០២១នេះ លទ្ធផលកិច្ចប្រតិបត្តិការបោសសម្អាតមីននិងសំណល់ជាតិផ្ទុះពីសង្គ្រាម បានប្រព្រឹត្តទៅដោយរលូននិងទទួលបានលទ្ធផលល្អ ក្នុងនោះ អង្គភាពនេះបានរំដោះផ្ទៃដីចម្ការមីនសរុបចំនួន៦៤ ៥៦២ ៥៣៩ម៉ែត្រក្រឡា ស្មើនឹង៩៨,៦០%។
លោកបន្តថា កិច្ចប្រតិបត្តិការនេះក៏បានរុករកឃើញនិងកម្ទេចចោលគ្រាប់មីននិងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន៣១ ៦៦៥គ្រាប់ និងបានធ្វើការអប់រំនិងផ្សព្វផ្សាយពីគ្រោះថ្នាក់ដោយសារគ្រាប់មីននិងសំណល់ជាតិផ្ទុះពីសង្គ្រាម ដល់ក្រុមគោលដៅបានចំនួន៨ ៩៩៧លើក ស្មើនឹង៣០០ ៤៣០ខ្នងផ្ទះ និងមានប្រជាពលរដ្ឋចូលរួមចំនួន៦០០ ០០០នាក់។
លោកបន្តថា ទោះស្ថិតក្នុងស្ថានភាពជំងឺកូវីដ-១៩ ក៏អង្គភាពនៅតែទទួលបានជំនួយកៀរគរនិងអនុវត្តគម្រោងនានាជាបន្តបន្ទាប់សរុបចំនួន៤៣គម្រោង ក្នុងនោះរួមមាន គម្រោងកំពុងដំណើរការចំនួន២៣គម្រោង កំពុងចរចាចំនួន២៣គម្រោង និងមានគម្រោងមួយចំនួនមានការយឺតយ៉ាវ។
សម្រាប់ស្ថានភាពហិរញ្ញវត្ថុរបស់អង្គភាពទាំងមូល ក្នុងរយៈពេល៧ខែដើមឆ្នាំ២០២១នេះ លោក ហេង រតនា បញ្ជាក់ថា អាចដំណើការបាន និងមិនប៉ះពាល់ដល់កម្លាំងប្រតិបត្តិការឡើយ ទោះបីគម្រោងមួយចំនួនមានការយឺតយ៉ាវខ្លះក៏ដោយ៕