ឈ្មួញខ្មែរដែលនាំទំនិញពីកម្ពុជាទៅប្រទេសវៀតណាមតាមច្រកព្រំដែនក្នុងស្រុកកំពង់ត្រាច ខេត្តកំពត អះអាងថា វៀតណាមនៅតែបន្តរឹតត្បិតមិនឱ្យពលរដ្ឋកម្ពុជានាំទំនិញចូលប្រទេសរបស់ខ្លួនទេ ខណៈដែលឈ្មួញវៀតណាមបាននាំទំនិញចូលកម្ពុជាដោយសេរីនិងគ្មានការទប់ស្កាត់ពីអាជ្ញាធរកម្ពុជា។
លោក តឹង យិន ជាឈ្មួញនាំគ្រឿងសមុទ្រពីកម្ពុជាទៅប្រទេសវៀតណាម តាមច្រកព្រំដែនតន់ហន់ និងច្រកព្រែកចាក ខេត្តកំពត បានប្រាប់ វីអូឌី នៅថ្ងៃសុក្រនេះថា ភាគីវៀតណាមនៅតែបន្តបិទមិនឱ្យពលរដ្ឋកម្ពុជានាំទំនិញចូលវៀតណាមដដែល ក្រោមហេតុផលទប់ស្កាត់ការឆ្លងរាលដាលជំងឺកូវីដ-១៩ ខណៈដែលឈ្មួញវៀតណាមអាចនាំទំនិញចូលកម្ពុជាដោយសេរី។
ឈ្មួញរូបនេះឱ្យដឹងទៀតថា វៀតណាមបានបិទមិនឱ្យពលរដ្ឋកម្ពុជានាំទំនិញចូលវៀតណាមតាំងពីថ្ងៃទី១៨ ខែកក្កដា ឆ្នាំ២០២១ រហូតមកដល់ពេលនេះ គឺមិនទាន់បើកឡើងវិញទេ ដែលធ្វើឱ្យឈ្មួញនិងអ្នកនេសាទកម្ពុជាជួបបញ្ហាលំបាកក្នុងជីវភាព។
លោកបន្ថែមថា៖ «វា[វៀតណាម]ឱ្យយើងចូលដោយលួចលាក់មានការក្បិតក្បៀតខ្លាំង ហើយវាទារលុយយើងយ៉ាងច្រើន។ ខាងគេដឹកមក ធម្មតាអត់មានយកលុយយកកាក់អីផង។ អាមួយឱ្យចូលដោយសេរី អាមួយឱ្យចូលមិនពេញមុខមិនពេញមាត់។ ខាងយើងវិញបើកចំហឱ្យចូលពេញៗ»។
ឈ្មួញនាំចេញគ្រឿងសមុទ្រពីកម្ពុជាទៅវៀតណាមតាមច្រកតន់ហន់ និងច្រកព្រែកចាកម្នាក់ទៀត រស់នៅខេត្តកែប ដែលសុំមិនប្រាប់ឈ្មោះដោយបារម្ភពីសុវត្ថិភាព បានឱ្យដឹងថា លោកបានផ្អាកទិញទំនិញពីប្រជានេសាទ និងខាននាំទំនិញទៅវៀតណាម ចាប់តាំងពីប្រទេសមួយនេះបានបិទច្រកព្រំដែនមកម្ល៉េះ។
ឈ្មួញកណ្តាលរូបនេះនិយាយថា ករណីវៀតណាមបិទមិនឱ្យពលរដ្ឋកម្ពុជានាំទំនិញចូលប្រទេសរបស់ខ្លួននេះ ជារឿងអយុត្តិធម៌មួយសម្រាប់ពលរដ្ឋកម្ពុជា ដោយបានធ្វើឱ្យប៉ះពាល់ដល់សេដ្ឋកិច្ចពួកគេនិងប្រជានេសាទផងដែរ ខណៈដែលពលរដ្ឋវៀតណាមអាចនាំទំនិញចូលកម្ពុជាដោយសេរី។ លោកអំពាវនាវដល់អាជ្ញាធរកម្ពុជាចរចាជាមួយភាគីវៀតណាម ដោយធ្វើយ៉ាងណាអនុញ្ញាតឱ្យពលរដ្ឋកម្ពុជានិងពលរដ្ឋវៀតណាមអាចដោះដូរទំនិញដោយស្មើភាពគ្នាបាន។
លោកបន្ថែមថា៖ «ប្រជានេសាទភាគច្រើន គាត់ខ្ចីលុយធនាគារមកធ្វើដើមទុន ដើម្បីរកស៊ីធ្វើនេសាទ។ ដល់ពេលខាងវៀតណាមគេមិនឱ្យយើងទៅ អ៊ីចឹងយើងឈ្មួញកណ្តាលនាំចេញទៅហ្នឹង ផ្អាកទិញទំនិញពីគាត់ អ៊ីចឹងខ្វះខាតលុយបង់ធនាគារ។ ខ្ញុំសំណូមពរទៅរដ្ឋាភិបាលថា បើខាងគេមិនឱ្យយើងនាំទំនិញទៅ យើងត្រូវមិនឱ្យគេនាំទំនិញចូលដែរ អ៊ីចឹងយើងអាចលក់ទំនិញហ្នឹងនៅក្នុងស្រុកបានហើយ។ បើគេនាំចូលច្រើនពេក យើងនៅក្នុងស្រុកលក់អត់បាន ធ្វើឱ្យទំនិញយើងនៅសល់ច្រើន ហើយយើងមិនអាចនាំចេញទៅក្រៅប្រទេសបានទៀត»។
វីអូឌី មិនអាចសុំការឆ្លើយតបពីអភិបាលខេត្តកំពត លោក ជាវ តាយ និងអ្នកនាំរដ្ឋបាលខេត្ត លោក ភូ លិ និងនាយករដ្ឋបាលខេត្ត លោក វិត វឌ្ឍនា បានទេ នៅថ្ងៃសុក្រនេះ។
មន្ត្រីសមាគមអាដហុកប្រចាំខេត្តកំពត លោក យន់ ផល្លី មានប្រសាសន៍ថា ករណីពលរដ្ឋវៀតណាមអាចនាំចូលទំនិញមកកម្ពុជាបាន ប៉ុន្តែពលរដ្ឋកម្ពុជាមិនអាចនាំទំនិញចូលវៀតណាមបាននេះ គឺមិនមានតម្លាភាពក្នុងការនាំទំនិញចេញចូលរវាងប្រទេសជិតខាងឡើយ។
មន្ត្រីសិទ្ធិមនុស្សរូបនេះបានជំរុញដល់អាជ្ញាធរកម្ពុជាឱ្យពិចារណាឡើងវិញក្នុងការដោះស្រាយរឿងនេះ ដើម្បីជួយដល់ពលរដ្ឋកម្ពុជាដែលនាំទំនិញទៅប្រទេសវៀតណាម។
លោកបន្ថែមថា៖ «មន្ត្រីរបស់កម្ពុជាយើងគួរតែធ្វើការសម្របសម្រួលជាមួយភាគីវៀតណាម ប្រសិនបើភាគីវៀតណាមគាត់បិទមិនឱ្យខ្មែរនាំទំនិញចូល តើយើងគួរមានវិធានការអីចំពោះវៀតណាមវិញ ដើម្បីទប់ស្កាត់កុំឱ្យមានការនាំចូលមកប្រទេសកម្ពុជាដែរ។ យើងត្រូវដាក់វិធានការតានតឹងដូចគ្នាដែរ បើយើងបើកធូររលុងឱ្យវៀតណាមចូល តែវៀតណាមគេអត់បើកឱ្យយើងចូល សួរថា តើអាជីវករយើងរកស៊ីក្នុងកម្រិតណា? ដូចជាប្រជានេសាទ លោកទៅនេសាទបានហើយ តើយកទៅលក់ឱ្យអ្នកណា»៕