រដ្ឋមន្ត្រីក្រសួងមហាផ្ទៃ លោក ស ខេង បានធ្វើដំណើរមកដល់ប្រទេសកម្ពុជាវិញហើយ ក្រោយពីបានធ្វើដំណើរទៅប្រទេសបារាំង ដើម្បីពិនិត្យសុខភាពនិងវះកាត់ដោយជោគជ័យ។
សេចក្តីជូនដំណឹងរបស់ក្រសួងមហាផ្ទៃ ចុះថ្ងៃទី០៦ ខែកញ្ញា ឆ្នាំ២០២១ បានលើកឡើងថា លោក ស ខេង បានធ្វើដំណើរទៅកាន់ប្រទេសបារាំង អស់រយៈពេល២សប្តាហ៍ ដោយមានធុរៈផ្ទាល់ខ្លួន ដើម្បីពិនិត្យសុខភាពនិងវះកាត់ដោយជោគជ័យ ហើយបានត្រលប់មកដល់កម្ពុជាវិញនៅព្រឹកថ្ងៃចន្ទនេះ។
តែយ៉ាងណា ក្រសួងមិនបានបញ្ជាក់លម្អិតថាតើលោក ស ខេង មានបញ្ហាសុខភាពនិងវះកាត់ជំងឺអ្វីនោះទេ។
បើតាមក្រសួងមហាផ្ទៃ នៅពេលមកដល់កម្ពុជា លោក ស ខេង កំពុងធ្វើចត្តាឡីស័កស្របតាមការណែនាំរបស់ក្រសួងសុខាភិបាល។
គួរបញ្ជាក់ថា រដ្ឋមន្ត្រីក្រសួងមហាផ្ទៃ លោក ស ខេង បានចាកចេញពីប្រទេសកម្ពុជាទៅកាន់ប្រទេសបារាំង កាលពីថ្ងៃទី២២ ខែសីហា ឆ្នាំ២០២១៕