សមាគមអ្នកសារព័ត៌មានមួយបានអំពាវនាវទៅក្រសួងមហាផ្ទៃ ឱ្យពិនិត្យឡើងវិញពីតួនាទីរបស់មន្ត្រីនៅថ្នាក់មូលដ្ឋាន ដើម្បីធានាថា ការចុះបំពេញភារកិច្ចរបស់អ្នកសារព័ត៌មានមិនត្រូវបានគំរាមកំហែងពីមន្ត្រីនៅថ្នាក់មូលដ្ឋាន។
ការអំពាវនាវរបស់សមាគមសម្ព័ន្ធអ្នកសារព័ត៌មានកម្ពុជា (ខេមបូចា) នេះ ធ្វើឡើងតាមលិខិតចំហមួយ ចុះថ្ងៃទី៦ ខែកញ្ញា ឆ្នាំ២០២១នេះ។
តាមរយៈលិខិតចំហនោះ ខេមបូចា បានលើកឡើងថា កាលពីម៉ោង៣និង៣០នាទីរសៀល ថ្ងៃទី៤ ខែកញ្ញា ឆ្នាំ២០២១នេះ លោក ពក ខឺយ អ្នកហាត់ការនៅសារព័ត៌មានសំឡេងប្រជាធិបតេយ្យ វីអូឌី បានចុះទៅយកព័ត៌មាននៅកន្លែងមានជម្លោះដីធ្លី ក្នុងតំបន់ព្រលានយន្តហោះអន្តរជាតិថ្មី ស្ថិតនៅក្នុងភូមិកំពង់តាឡុង ឃុំបឹងខ្យាង ស្រុកកណ្ដាលស្ទឹង ខេត្តកណ្តាល។
ខេមបូចា បន្តថា ប៉ុន្តែអ្នកសារព័ត៌មានរូបនោះត្រូវបាននគរបាល២នាក់ ស្លៀកពាក់ស៊ីវិលជិះម៉ូតូដេញពីក្រោយ និងខ្លះទៀតបានស្ទាក់ចាប់អំឡុងពេលអ្នកសារព័ត៌មានរូបនោះសម្ភាសពលរដ្ឋចប់រួចធ្វើដំណើរត្រលប់មកការិយាល័យវិញ។
លិខិតនោះបន្តថា អ្នកសារព័ត៌មានមួយរូបទៀត ឈ្មោះ លោក លួស សេង ចាងហ្វាងផ្សាយទូរទស្សន៍អន ឡាញ LSN ក៏គ្រោងចុះទៅយកព័ត៌មាននៅទីតាំងដែលពលរដ្ឋធ្វើសន្និសីទសារព័ត៌មាននោះដែរ ប៉ុន្តែបានលុបចោលគម្រោងវិញ ក្រោយពីប្រជាពលរដ្ឋប្រាប់ថា មានកម្លាំងជាច្រើនបានដាក់ពង្រាយ ដើម្បីមានវិធានការទៅលើអ្នកសារព័ត៌មាន។
ខេមបូចា បានចាត់ទុកទង្វើរបស់អាជ្ញាធរទាំងនោះ ថាជាការរារាំង គំរាមកំហែងទៅលើអ្នកសារព័ត៌មាន និងធ្វើឱ្យប៉ះពាល់យ៉ាងធ្ងន់ធ្ងរលើសេរីភាពអ្នកសារព័ត៌មាន ស្ថានភាពបញ្ចេញមតិនៅក្នុងប្រទេសកម្ពុជានិងប៉ះពាល់ធ្ងន់ធ្ងរដល់សិទ្ធិទទួលបានព័ត៌មាន និងប្រជាពលរដ្ឋ។
បញ្ហានេះ នាយកប្រតិបត្តិខេមបូចា លោក ណុប វី ជំរុញទៅក្រសួងមហាផ្ទៃពិនិត្យមើលឡើងវិញពីតួនាទីរបស់មន្ត្រីនៅថ្នាក់មូលដ្ឋាន ដើម្បីទប់ស្កាត់កុំឱ្យពួកគេប្រើប្រាស់តួនាទីទៅរំលោភបំពានសិទ្ធិអ្នកសារព័ត៌មាននិងសិទ្ធិពលរដ្ឋដែលធានាដោយរដ្ឋធម្មនុញ្ញ។
លោកថា៖ «នៅក្នុងរូបភាពហ្នឹង វាបានរំលោភធ្ងន់ធ្ងរទៅដល់រដ្ឋធម្មនុញ្ញមាត្រា៤១»។
លោក ណុប វី ព្រួយបារម្ភថា បើក្រសួងគ្មានវិធានការជាក់លាក់ទប់ស្កាត់បញ្ហានេះទេ អ្នកសារព័ត៌មាននឹងមិនអាចអនុវត្តតួនាទីរបស់ខ្លួនដោយសេរីដោយមិនមានការភ័យខ្លាចបាននោះទេ ហើយវានឹងប៉ះពាល់ធ្ងន់ធ្ងរទៅដល់សេរីភាពសារព័ត៌មាន ប៉ះពាល់ទៅដល់សិទ្ធិទទួលបានព័ត៌មានត្រឹមត្រូវរបស់ប្រជាពលរដ្ឋ និងជាដើមចមប៉ះពាល់សង្គមទាំងមូល ជាពិសេសគណនេយ្យភាពសង្គម ព្រមទាំងធ្វើឱ្យប៉ះពាល់ដល់ការខិតខំប្រឹងប្រែងការធ្វើកំណែទម្រង់របស់រដ្ឋាភិបាល។
លោក ពក ខឺយ បានអះអាងថា សំឡេងពលរដ្ឋនិងរូបភាពដែលលោកប្រមូលបានពីកន្លែងធ្វើសន្និសីទ ជាភស្តុតាងរឹងមាំសម្រាប់ឱ្យស្ថាប័នថ្នាក់ជាតិពិចារណាពីបញ្ហាពួកគេនិងស្វែងរកដំណោះស្រាយក្រោយលោកចេញផ្សាយ ទើបលោកព្យាយាមជិះម៉ូតូគេចពីសមត្ថកិច្ច មិនឱ្យអាជ្ញាធរដកហូតយកសំឡេងនិងរូបភាពទាំងនោះបាន។
លោកថា៖ «ការដែលពួកគាត់ជួបទុក្ខលំបាកនេះ គាត់មិនអាចប្រើសំឡេងរបស់ពួកគាត់ទៅនិយាយជាមួយអាជ្ញាធរបាន ដោយសារតែអាជ្ញាធរកន្លងមកហ្នឹងតែងតែគេចវេះមិនព្រមដោះស្រាយ។ អ៊ីចឹងអ្វីដែលខ្ញុំបានសម្ភាសថ្ងៃនោះ ខ្ញុំគិតថា ជាសារដ៏រឹងមាំមួយសម្រាប់ជម្រាបជូនទៅខាងអ្នកពាក់ព័ន្ធ ក៏ដូចជារដ្ឋាភិបាលហ្នឹង ឱ្យគាត់មើលឃើញពីក្តីទុក្ខលំបាករបស់ប្រជាពលរដ្ឋជាក់ស្តែង»។
វីអូឌី មិនអាចទាក់ទងអធិការនគរបាលស្រុកកណ្តាលស្ទឹង លោក ឡេង សុខរុន ដើម្បីសុំបំភ្លឺជុំវិញបញ្ហានេះបាននៅឡើយទេ គិតត្រឹមថ្ងៃចន្ទនេះ។
យ៉ាងណា អ្នកនាំពាក្យអគ្គស្នងការដ្ឋាននគរបាលជាតិនៃក្រសួងមហាផ្ទៃ លោក ឆាយ គឹមខឿន មានប្រសាសន៍ថា ក្រសួងនឹងមានវិធានការ បើមានពាក្យបណ្តឹងផ្លូវការ ហើយពិនិត្យឃើញថា មន្ត្រីពិតជាបានធ្វើខុសមែននោះ។
លោកថា៖«ដាក់បណ្តឹងមក! អាហ្នឹងយើងនឹងចាត់ការដើម្បីស៊ើបអង្កេតហើយ ត្រូវពិន័យ ត្រូវអប់រំ ត្រូវមានទោសយ៉ាងម៉េចតាមការល្មើសច្បាប់ ទាំងក្មួយឯងផងដែរ! មានការអីយើងមិនព្រមប្តឹង យើងគិតពីបង្ហោះអំពាវនាវអ៊ីចឹង បើគេមិនយកចិត្តទុកដាក់ អាហ្នឹងចាំនិយាយគ្នាទៀត»។
ក្នុងឆ្នាំ២០២១នេះ គិតពីខែមករា ដល់ខែកញ្ញានេះ ខេមបូចា បានកត់ត្រាករណីបៀតបៀននិងគំរាមកំហែងទៅលើអ្នកសារព័ត៌មានចំនួន៣៨ករណី លើអ្នកសារព័ត៌មានចំនួន៥៨នាក់ ក្នុងនោះមានស្ត្រី៤នាក់ដែលភាគច្រើនជាករណីចាប់ឃុំខ្លួននិងការប្រើអំពើហិង្សា៕
